काठमाडौं- सरकारका प्रवक्तासमेत रहेका अर्थमन्त्री डा युवराज खतिवडाले तीन महिनाको माग धान्ने पेट्रोलियम पदार्थ मौज्दात रहेको गलत अभिव्यक्ति दिएका छन्।
मंगलबार ‘कोरोना भाइरस रोकथाम नियन्त्रण समन्वय समिति’ बैठकको निर्णय सुनाउने क्रममा उनले यस्तो गलत अभिव्यक्ति दिएका हुन्। सञ्चार तथा सूचना प्रविधि मन्त्रालयको समेत जिम्मेवारी सम्हालेका डा खतिवडाले औषधिमा ६ महिना र पेट्रोलियम पदार्थमा ३ महिना माग धान्न सकिने अवस्था रहेको बताए।
तर मन्त्री खतिवडाको यो भनाइ भने गलत हो। उद्योग वाणिज्य तथा आपूर्ति मन्त्रालयको तथ्यांकलाई आधार मान्ने हो भने अहिले नेपालको पेट्रोलियम पदार्थको मौज्दातले ९ दिन र ग्यासले ७ दिन माग धान्छ। एक दिन मात्रै आयात वा ढुवानी बन्द हुँदा हाहाकारको स्थिति निम्तन्छ। नेपाल आयल निगमले आफ्नो प्रादेशिक संरचनाअनुसार पर्याप्त भण्डारण क्षमता तथा माग धान्ने अवस्था छैन।
पेट्रोल, डिजेल, मट्टितेल र हवाई इन्धन भण्डारण क्षमता ६८ हजार ३ सय ६४ किलोलिटर बराबर मात्र छ। प्रदेश- १ मा भण्डारण क्षमता १० हजार १ सय २० किलोलिटर बराबर छ। उक्त परिमाण बराबरको इन्धनले ८ दिनको माग धान्न सक्छ। त्यस्तै प्रदेश- २ को भण्डारण क्षमता २२ हजार ७ सय ९० किलोलिटर अर्थात् ९ दिनको माग धान्न सक्ने देखिन्छ।
बागमती प्रदेशमा १३ दिन, गण्डकी प्रदेशमा १२ दिन, प्रदेश-५ मा ५ दिन, कर्णाली प्रदेशमा २ दिन र सुदूरपश्चिम प्रदेशमा ८ दिनको माग धान्न सक्ने इन्धन भण्डारण छ। कर्णाली प्रदेशको भण्डारण क्षमता जम्मा १ सय ५ किलोलिटर मात्रै भएका कारण त्यहाँ २ दिनलाई मात्रै धान्ने इन्धन रहेको देखिन्छ। यसरी देशभरको भण्डारण मौज्दातले औसत ९ दिनको पेट्रोलियम पदार्थको धान्न सक्छ।
अहिले पेट्रोलको दैनिक माग ३५ देखि ४ हजारकिलो लिटर र डिजेलको माग प्रतिदिन ३ हजार ५ सय देखि ४ हजार किलोलिटर बराबर छ। त्यस्तै खाना पकाउने एलपी ग्यासको मासिक माग ४० हजार मेट्रिक टन अर्थात् दैनिक १ हजार ३ सय मेट्रिक टन बराबर छ।
खाना पकाउने ग्यास नेपाल आयल निगमले पिडिओ जारी गरेपछि निजी क्षेत्रबाट आयात भइरहेको छ। निजी क्षेत्रका अनुसार अहिलेको मौज्दात क्षमताको अवस्थाले अधिकतम ७ दिनसम्मको माग धान्न सक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749797959.png)
-1749826086.png)
