काठमाडौं- कार बिक्रीमा सुजुकी र हुन्डाईबीच तीब्र प्रतिस्पर्धा देखिएको छ। २०७५ चैतदेखि २०७६ पुससम्मको १० महिनाको तथ्यांकअनुसार सुजुकी र हुन्डाईबीच कार बिक्रीमा कसिलो प्रतिस्पर्धा रहेको छ। १० महिनामा सुजुकीले ३ हजार ४ सय ७८ वटा कार बिक्री गर्दा प्रतिस्पर्धी हुन्डाईले ३ हजार ५ सय २१ वटा कार बिक्री गरेको हो। नेपाली बजारमा सुजुकीका कार चौधरी समूहअन्तर्गतको सिजी मोटोकर्पले बिक्री गर्दै आएको छ।
त्यस्तै २०७४ चैतदेखि २०७५ पुससम्म सुजुकीका ५ हजार १ सय ३१ वटा कार बिक्री गरेको थियो भने हुन्डाईले ३ सय ३ सय ८९ वटा कार बिक्री गरेको थियो। कोरियाली कार उत्पादक कम्पनी हुन्डाईका कार नेपाली बजारमा लक्ष्मी समूहअन्तर्गतको लक्ष्मी इन्टरकन्टिनेन्टल प्रालिले बिक्री गर्दै आएको छ।
प्रतिशतका आधारमा हेर्ने हो भने २०७४ चैतदेखि २०७५ पुसको अवधिमा नेपाली कार बजारमा सुजुकीको हिस्सा ३० प्रतिशत थियो। तर २०७५-७६ चैत–पुसको अवधिमा आइपुग्दा सुजुकीको बजार हिस्सा २५ प्रतिशतमा सीमित भएको छ। हुन्डाईले भने एक वर्षको अवधिमा ५ प्रतिशत बजार हिस्सा बढाउन सफल भएको छ। २०७४–७५ चैत–पुसमा कारको बजार हुन्डाईको हिस्सा २० प्रतिशत थियो भने २०७५–७६ चैत–पुसमा आइपुग्दा बजार हिस्सा बढेर २५ प्रतिशत पुगेको छ।
त्यस्तै बिक्रीका आधारमा तेस्रो स्थानमा महिन्द्रा देखिएको छ। महिन्द्रका कार नेपाली बजारमा अग्नी समूहअन्तर्गतको अग्नी इन्कर्पोरेटेडले बिक्री गर्दै आएको छ। २०७४–७५ चैत–पुसमा अग्नीले महिन्द्राका २ हजार ७ सय ७९ वटा कार बिक्री गर्दै १६ प्रतिशत बजार हिस्सा ओगटेको थियो। २०७५–७६ चैत–पुसमा महिन्द्राले समग्रमा ३ प्रतिशत बजार हिस्सा गुमाउन पुगेको छ।
यो अवधिमा महिन्द्राका १ हजार ८ सय २२ वटा कार बिक्री गर्दा बजार हिस्सा १३ प्रतिशत रहेको छ। चौथो स्थानमा रहेको टाटा मोटर्सको नेपालका लागि आधिकारिक बिक्रेता सिप्रदी ट्रेडिङले २०७५-७६ चैत-पुसमा १ हजार ७ सय ५० वटा कार बिक्री गर्दै बजारमा आफ्नो हिस्सा १२ प्रतिशत पुर्याउन सफल भएको छ।
२०७४-७५ चैत-पुसको अवधिमा १ हजार ५ सय ७८ वटा कार बिक्री गरेको थियो। यो अवधिमा टाटाको कार बजार हिस्सा ९ प्रतिशतमात्र थियो। एक वर्षको अवधिमा टाटाले समग्र कार बजारमा ३ प्रतिशत हिस्सा बढाउन सफल भएको तथ्यांक छ।
टाटा मोटर्स बस तथा ट्रकका लागि चर्चित ब्रान्डका रुपमा स्थापित भएको हो। तर २००१ देखि टाटाले नेपाली बजारमा कार बिक्री सुरु गरेको हो। त्यसयता कम्पनीले समग्र कार बजारमा १२ प्रतिशत हिस्सासहित आफ्नो उपस्थिति चौथो स्थानमा पुर्याउन सफल भएको छ। टाटापछि धेरै बिक्री हुने कार ब्रान्डमा फोर्ड रहेको छ। गोल्छा अर्गनाइजेशनअन्तर्गतको जिओ फोर्डले बिक्री गर्दै आएको फोर्डका कार २०७४–७५ चैत–पुससम्मको अवधिमा १ हजार १ सय ११ वटा कार बिक्री भएको थियो।
सो अवधिमा फोर्डको बजार हिस्सा ६ प्रतिशत थियो। त्यस्तै २०७५-७६ चैत-पुसमा फोर्डको कार बिक्री ८ सय ८५ वटामा सीमित भएको छ। यो अवधिमा पनि प्रतिशतका आधारमा बजार हिस्सा ६ प्रतिशत नै रहेको छ। २०७५–७६ चैत–पुसमा निसानका ८ सय ३७ वटा कार बिक्री भएको छ। नेपाली कार बजारमा ६ प्रतिशत बजार हिस्सा ओगटेको निसान सारडा समूहअन्तर्गतको पायोनियर मोटोकर्पले बिक्री गर्दै आएको छ।
त्यस्तै पायोनियरले २०७४–७५ चैत–पुससम्मको अवधिमा ९ सय ५९ वटा कार बिक्री गरेको थियो। यो अवधिमा पनि निसानको बजार हिस्सा भने ६ प्रतिशत नै थियो। टोयोटाका कार नेपाली बजारमा वैद्यज् अर्गनाइजेशनअन्तर्गतको युनाइटेड ट्रेडर्स सिन्डिकेटले बिक्री गर्दै आएको छ। २०७४-७५ चैत-पुसमा टोयोटाका ५ सय २३ वटा कार बिक्री भएको थियो भने २०७५-७६ चैत-पुससम्मको १० महिनामा कार बिक्री घटेर ३ सय ७५ वटा सीमित भएको छ।
विशाल ग्रुपअन्तर्गतको एडभान्स अटोमोबाइलले नेपाली बजारमा बिक्री गर्दै आएको फ्रेन्च कार कम्पनी रेनोका कार २०७४-७५ चैत–पुसमा ६ सय ९९ वटा बिक्री गर्न सफल भएको थियो। तर २०७५-७६ चैत–पुससम्मको १० महिनाको अवधिमा कार बिक्री घटेर ३ सय १७ वटामा सीमित भएको छ। त्यस्तै विशाल ग्रुपकै अर्को कम्पनी पारामाउन्ट मोटर्सले बेलायती ब्रान्ड एमजी (मोरिस ग्यारेज) बिक्री गर्दै आएको छ।
२०७५-७६ चैत-पुससम्मको १० महिनाको अवधिमा पारामाउन्ट मोटर्सले १ सय २६ वटा कार बिक्री गर्न सफल भएको छ। अघिल्लो वर्षको सोही अवधिमा भने एमजीका कार नेपाल भित्रिएका थिएनन्। कन्टिनेन्टल ट्रेडिङ प्रालिले आयात गर्दै आएको कियाको कार बिक्री भने वृद्धि भएको छ। २०७४-७५ चैत-पुसको अवधिमा १ सय ४९ वटा कार बिक्री गरेको कन्टिनेन्टलले २०७५-७६ चैत-पुसमा आइपुग्दा ३ सय २३ वटा कार बिक्री गर्न सफल भएको हो।
कियाको इलेक्ट्रिक कार निरो तथा एसयुभी सेल्टोस बजारमा आएपनि कम्पनी आफ्नो बिक्री बढाउन सफल भएको हो। कन्टिनेन्टल ट्रेडिङले नै बिक्री गर्दै आएको इसुजु २०७४-७५ चैत-पुसमा १ सय ७५ वटा बिक्री भएकोमा २०७५-७६ चैत-पुसमा आइपुग्दा इसुजुको बिक्री घटेर ७६ वटामा सीमित भएको तथ्यांक छ।
विशाल समूहअन्तर्गतको पुजा इन्टिरनेशनलले बिक्री गर्दै आएको जर्मन कार ब्रान्ड फक्सवागन २०७४-७५ चैत-पुसको अवधिमा २ सय ५ वटा बिक्री भएकोमा २०७५-७६ चैत-पुसको १० महिनामा कार बिक्री १ सय ५८ वटामा सीमित भएको छ। त्यस्तै लियोन मोटर्सले बिक्री गर्दै आएको मित्सुविसीका कार २०७४-७५ चैत-पुसमा १ सय ४१ वटा बिक्री भएकोमा २०७५-७६ चैत-पुसमा आइपुग्दा ८५ वटामा सीमित भएको छ।
एमएडब्लू लाइफले नेपाली बजारमा भित्र्याएको जिप २०७४-७५ चैत-पुसमा १ सय १५ वटा बिक्री भएको थियो। २०७५-७६ चैत–पुसमा आइपुग्दा जिपको बिक्री केही बढेर १ सय १९ पुगेको छ। ज्योति समूहअन्तर्गतको स्याकार ट्रेडिङले बिक्री गर्दै आएको जापानी कार होन्डा २०७४-७५ चैत-पुसको १० महिनामा ९६ वटा बिक्री भएकोमा २०७५–७६ चैत-पुसमा घटेर ६८ वटामा सीमित भएको छ।
२०७४-७५ चैत-पुसको अवधिमा फोर्स मोटर्स, स्कोडा, सुवारु र माज्दाका कार क्रमशः ९२, ३९, २१ र ७ वटा कार बिक्री भएको छ। त्यस्तै २०७५-७६ चैत–पुसको अवधिमा माथिका कम्पनीको कार बिक्री क्रमशः ९२, ४७, ६ र १ वटामात्र कार बिक्री भएको तथ्यांक छ।
त्यसैगरी ल्यान्ड रोभरका कार गत वर्ष र २०७५-७६ चैत-पुसको अवधिमा समान ३ वटा भित्रिएका छन्। २०७४-७५ चैत-पुसको १० महिनामा एउटा पनि नभित्रिएको मर्सिडिज बेन्ज २०७५-७६ चैत-पुसको अवधिमा ३ वटा भित्रिएका छन्।त्यस्तै चिनियाँ एसयुभी डिएसएफकेका कार अघिल्लो वर्ष नभित्रिएकोमा २०७५-७६ चैत-पुसको अवधिमा १२ वटा भित्रिएका छन्। यो कार नेपाली बजारमा कुजु नेपाल प्रालिले बिक्री गर्दै आएको छ।
साङडोङ लेभडोका ३ वटा, दीगोका ५ वटा, नानजिङ जियाउनका ३ वटा, ज्यागुअरका २ वटा, टेस्लाका एउटा र अउडीका ३ वटा कार २०७५-७६ चैत-पुसको अवधिमा नेपाल भित्रिएका छन्। समग्रमा २०७५-७६ चैत-पुसको १० महिनाको अवधिमा नेपाली बजारमा १४ हजार १ सय ३७ वटा कार नेपाल भित्रिएको तथ्यांक छ।
अघिल्लो वर्षको सोही अवधिमा १७ हजार २ सय ५६ वटा कार नेपाल भित्रिएका थिए। अटो लोनमा गरिएको कडाइका कारण कार बिक्रीमा करिब १८ प्रतिशतले गिरावट आएको छ। भन्सारबाट प्राप्त तथ्यांकमा प्युजो र स्याङयोङका कार एकिकृत तथ्यांकमा समावेश गरिएको भएपनि बेग्लाबेग्लै तथ्यांक भने समावेश गरिएको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1749826086.png)
