काठमाडौं– मर्स्याङदी–स्यूचाटार १३२ केभी प्रसारण लाइनको २०५ नम्बर टावर पहिरोको जोखिममा परी ढल्ने अवस्थामा पुगेको छ। चितवनको इच्छाकामना गाउँपालिका–५ को कुरिनटारस्थित मनकामना केबलकार जाने गेटनजिकै रहेको जग्गा खन्दा टावर नै ढल्ने अवस्थामा पुगेको हो।
जग्गाधनी पर्शुराम घिमिरेले पृथ्वी राजमार्गसँगै जोडिएको उक्त स्थानमा होटल खोल्न भिरालो जग्गा खनेका थिए। तर त्यसका कारण पहिरो गई त्यहाँभन्दा माथि रहेको टावरको जगमा असर परेपछि ढल्ने जोखिम देखिएको हो। मर्स्याङदी नदी बेसिनमा निर्माण भएका जलविद्युत् आयोजनाको लगभग एक सय मेगावाट विद्युत् मर्स्याङदी-स्यूचाटार १३२ केभी प्रसारण लाइनमार्फत काठमाडौं आइरहेको छ।
टावर ढले काठमाडौ उपत्यकामा एकातर्फ मागअनुसार विद्युत् आपूर्ति गर्न नसकी वाध्यकारी लोडसेडिङ गर्ने अवस्था आउने छ भने अर्कोतर्फ जलविद्युत आयोजनाबाट उत्पादित विद्युत् प्रवाह गर्न नसकी खेर फाल्नुपर्ने छ। नेपाल विद्युत प्राधिकरणका कार्यकारी निर्देशक कुलमान घिसिङले लमजुङबाट आइतबार काठमाडौं फर्कने क्रममा टावरको निरीक्षण गरी टावर ढल्ने जोखिम बढेर गएकाले सुरक्षात्मक उपाय नअपनाइ नखन्न आग्रह गरेका छन्।
‘भिरालो जमिनमा खन्दा पहिरो गइरहेको छ, त्यसलाई रोक्न सुरक्षात्मक उपाय अपनाइएको छैन, पानी पर्नासाथ पहिरो जान सुरु भई टावर नै ढल्न सक्ने अवस्था देखिएको छ’ कार्यकारी निर्देशक घिसिङले जग्गाधनी घिमिरेलाई टेलिफोनमार्फत् भने। ‘जथाभावी खनिएकाले प्रोटेक्सनवाल लगाउँदासमेत पहिरो रोकिने अवस्था देखिंदैन, टावर ढलेर यसबाट उत्पन्न हुने हानी नोक्सानीको जिम्मेवारी तपाईंले नै लिनु पर्ने छ, टावर सार्दा लाग्ने सम्पूर्ण खर्च बेहोर्नु पर्नेछ,’ घिमिरेलाई घिसिङले भने।
जवाफमा घिमिरेले यस्तो अवस्था आउला भनेर नसोचेको र होटल खोल्न बैकबाट ऋंण लिएकाले आफू डुब्ने अवस्थामा पुगी समस्यामा फसेको बताएका छन्। प्राधिकरणले गत वर्षको पुसमा घिमिरेलाई पत्राचार गर्दे तलतिर रहेको जग्गा खन्दा टावर ढल्ने सम्भावना रहेकाले टावरलाई असर पर्ने कार्य रोक्न र सुरक्षात्मक उपाय अपनाउन आग्रह गरेको थियो। तर, खन्ने कार्य नरोकिएको र सुरक्षात्मक उपाय पनि नअपनाइकाले टावर झनै जोखिममा परेको हो।
प्राधिकरणले मंगलबार पुनः पत्र पठाउँदै गत वर्ष गरिएको पत्राचारविपरीत खन्ने कार्य जारी राख्दा र सुरक्षात्मक कदम नचाल्दा टावर ढल्ने जोखिम बढेकाले तत्काल रोकी सुरक्षाका उपाय अपनाउन आग्रह गरेको छ। लगभग एक सय मेगावाट विद्युत आपूर्ति भई रहेको मुलुकको राजधानीकेन्द्रित उक्त प्रसारण लाइनमा अवरोध उत्पन्न भएमा त्यसले ठूलो क्षति निम्त्याउने सक्ने र त्यस्तो अवस्थाबाट सिर्जित अवस्थाको जिम्मेवार स्वयं नै हुने भन्दै प्राधिकरणले जग्गाधनी घिमिरेलाई पत्र पठाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।