भैरहवा- रुपन्देहीमा प्रहरीकै मिलेमतोमा प्याज तस्करी मौलाएको छ। ०७६ असोजयता भैरहवा भन्सार कार्यालयबाट प्याज आयात नभए पनि तस्करहरुले दिनहँु बोराका बोरा प्याज भारतबाट विभिन्न सीमा नाका हँुदै नेपाल भित्राईरहेका छन्।
तस्करहरुले एउटै साइकल तथा मोटरसाइकलमा ३÷४ वटा बोरासम्म प्याज ल्याउने गरेका छन्।
भारतबाट अबैध रुपमा बच्चादेखि युवासम्म, महिलादेखि वृद्धसम्मले दैनिक रुपमा प्याज ओसार्ने गरेका छन्। दिनहुँ खुलेआम प्याज तस्करी हुँदासमेत सरोकारवाला निकाय मौन छन् ।
रुपन्देहीका सबैजसो नाकाबाट प्याज तस्करी हुने गरेको छ । प्रहरीको मिलेमतोमा तस्करहरुले भारतीय बजार सुनौली, नौतनवालगायतका स्थानबाट प्याज तस्करी गरेर नेपाल भित्र्याउने गरेका छन् । यसरी चोरीपैठारी गरेर प्याज भित्र्याउने तस्करसँग जिल्ला प्रहरी कार्यालयका घुमुवाहरुले मासिक असुल्ने गर्ने गरेको पाईएको छ । तस्करहरुले प्रहरी प्रमुख एसपी हेमकुमार थापासँगको मिलेमतोमा प्याज तस्करी गर्ने गरेको बताएका छन्।
‘हामीले एकजना बराबर दिनको एक हजार रुपैयाँसम्म प्रहरीका घुमुवालाई बुझाउँछौं। कोहीले ५ सय पनि दिने गरेका छन्’, तस्करी गरी प्याज ल्याउँदै गरेका एक व्यक्तिले भने।
रुपन्देहीको सेमलपानी नाकाबाट विना भन्सार प्याज भित्राउँदै गरेका अस्लिम मुसलमानले प्रहरीलाई पैसा दिएर आफूुहरुले प्याज नेपाल भित्राउने गरेको उल्लेख गरे ।
यो नाकाबाट मात्रै दैनिक डेढसयभन्दा बढी तस्करहरुले विना भन्सार नेपालमा प्याज भित्र्याउने गरेका छन् । डेढ सयजनाबाट प्रहरीले दैनिक यही नाकाबाट मात्रै ७५ हजारदेखि १ लाख ५० हजार रुपैयाँसम्म असुल्ने गरेको छ। स्थानीय राजेश मल्लाहले लाइन लागेर दिनहुँ खुलेआम तस्करी हुँदासमेत प्रहरी प्रशासन मौन बसेको बताए । ‘घुमुवा प्रहरीहरु पैसा बुझ्नेबेला मात्रै आउँछन् । अन्यबेला फर्केर आउँदैनन् । खुलेआम यसरी राजस्व छलेर तस्करी भईरहँदा प्रहरी असुलीमै व्यस्त रहेका कारण प्रहरी मौन छ’, उनले भने ।
.jpg)
अहिले, धकधई, पजरकट्टी, बेलहिया, मेउडिहवा, एयरपोर्ट, लुम्बिनी क्षेत्रका नाकाबाट प्याज तस्करी भइरहेको छ। यी ठाउँबाट प्रहरीले तस्करहरुसँग दैनिक २ लाखभन्दा बढी पैसा असुल्ने गरेको छ। यसका लागि एसपी थापाले प्रहरी जवान शंकरराज गिरीलाई खटाएको स्रोतको दाबी छ । उनैले अहिले जिल्लाको हरेक तस्करीको सेटिङ मिलाउने गरेको बुझिएको छ । दैनिक तस्करहरुसँग असुल गरी एसपी थापाकोमा रकम पु¥याउने गरेको स्रोतको दाबी छ। गिरी घुमुवाहरुमा एसपीका सबैभन्दा विश्वासपात्र मानिन्छन् ।
यसरी अवैधरुपमा तस्करी गरि नेपाल भित्र्याइएको प्याज धकधई, गल्लामण्डी लगायतका ठाउँमा बिक्री हुँदै आएको छ । कतिपयले भण्डार गरेर राखेर नक्कली कागजात बनाई काठमाडौंसम्म पठाउने गरेका छन्। खुलेयाम प्रहरीको संरक्षणमा तस्करी हुँदा दैनिक लाखौं राजस्व गुमेको छ । ‘सीमित प्रहरी अधिकृतको स्वार्थले गर्दा राज्यलाई लाखौं राजस्व गुम्नु दुःखद् हो । प्रहरीको माथिल्लो निकायको तुरुन्त ध्यान जाओस्’, भैरहवा भन्सार कार्यालयका एक अधिकृतले भने ।
भारतीय बजारमा प्रतिकिलो ५० भारतीय रुपैयाँमा पाइने प्याज नेपाली बजारमा १२० देखि १५० सम्म पर्ने गर्दछ । मूल्यको अन्तरकै कारण प्याज तस्करी भइरहेको हो ।
अवैध रुपमा भित्रिने प्याजले राजस्व त गुमेको छ नै, मानव स्वास्थ्यमासमेत नकारात्मक प्रभाव पार्ने गरेको छ । विषादी परीक्षणविनै धमाधम तस्करीको प्याज नेपाल भित्रिँदा यो सिधै उपभोक्ताको भान्सामा पुग्छ । यसले मानव स्वास्थ्यलाई पनि दीर्घकालीन असर पार्नसक्ने चिकित्सकहरु बताउँछन् । सरकारले भारतबाट आयात गरिने तरकारी तथा फलफूलमा विषादी परीक्षण गरेरमात्रै आयात गर्ने नीति गत असारमै लागू गरेको हो । चेकजाँचका क्रममा आलु र प्याजमा विषादी पाइएको थियो।
प्लान्ट क्वारेन्टाईन कार्यालय बेलहियाका प्रमुख बिष्णु काफ्ले भन्सार नाकाबाट वैधानिक रुपमा असोजयता नेपालमा प्याज नआएको बताउछन्। उनले असोजयता अहिलेसम्म प्याजको परीक्षण नगरिएको बताए। अबैध रुपमा विनापरीक्षण भित्रिएको प्याजले मानव स्वास्थ्यमा समेत समस्या पार्ने गरेको छ।
भैरहवा भन्सार कार्यालयका प्रमुख भन्सार अधिकृत कमलकुमार भट्टराईले पनि असोजयता प्याज नभित्रिएको बताए।
जिल्ला प्रहरी कार्यालय रुपन्देहीका प्रहरी नायव उपरीक्षक एवं प्रहरी प्रवक्ता खड्गबहादुर खत्रीले तस्करीको रुपमा प्याज नभित्रिएको दाबी गरे। उनले खुल्ला सिमानाका भएका कारण कुनै–कुनै स्थानमा सानो परिणाममा प्याज भित्रिएको भए पनि प्रहरीको संरक्षणमा तस्करी नभएको बताए । खत्रीले प्याजमात्र नभई सामानको तस्करीमा पनि कडाइ गरिएको दावी गरे। ‘भन्सार नतिरी आएको जुनसुकै सामान हामीले समातेर बुझाएका छौं, भन्सारमा बुझाइएको विवरण हेर्दा त्यो सबै पुष्टि हुन्छ,’ खत्रीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
