विराटनगर– बजेट अभावका कारण निर्माण कार्यले अपेक्षित गति लिन नसकेको रानी–विराटनगर–इटहरी–धरान सडक निर्माणको कामलाई तीव्रता दिन रात–दिन दुवै सिफ्टमा काम गर्ने तयारी थालिएको छ। आन्तरिक मामिला तथा कानुन मन्त्रालयले रात्रीकालिन कामको तयारी थाल्न सोमबारदेखि नै सम्बन्धित निकायसँग समन्वय गरिरहेको छ।
प्रदेश १ को मन्त्रीपरिषद् बैठकले सडक निर्माणको काम छिटो सक्नका लागि आन्तरिक मामिला तथा कानुन मन्त्रालयको संयोजकत्वमा अनुगमन समिति समेत गठन गरेको छ। टोलीले सोमबार निर्माण क्षेत्रमा भइरहेको प्रगति, समस्या र समस्या समाधानका लागि अवलम्बन गर्नुपर्ने उपायका विषयमा विभिन्न क्षेत्रको अनुगमन तथा सुझाव पनि संकलन गरेको थियो।
‘सडक निर्माणको अवस्था, समस्या र समस्या समाधानका उपायको विषयमा जानकारी लिइरहेका छौं’, टोलीमा सहभागी प्रदेश १ का मुख्यमन्त्री शेरधन राईले भने, ‘अवरोध र समस्याको पहिचान गरी समाधानका प्रयास पनि तत्कालै सुरु गरिने छ।’
बजेट निकासा गर्ने तथा प्रदेशले मात्र गर्न नसक्ने कामका लागि संघिय सरकारसँग समन्वय गर्ने काम पनि एकैपटक अघि बढाइएको उनले जानकारी दिए।
पूर्वाञ्चल क्षेत्रीय सडक निर्देशनालय दमकका क्षेत्रीय निर्देशक दीपककुमार भट्टराईले समयमा बजेट निकासा नहुँदा काममा समस्या भएको गुनासो गरेपछि मुख्यमन्त्री राईको यस्तो प्रतिक्रिया आएको हो। भट्टराईले ४० देखि ४५ करोड रकम निर्माण कम्पनीलाई भुक्तानी गर्नै बाँकी रहेको विषयमा मुख्यमन्त्री राईको ध्यानाकर्षण गराएका थिए।
उनले भने, ‘बजेटकै कारण निर्माणको काम प्रभावित भएको छ। समयमै यसको समाधान नखोजे काम रोकिन सक्छ।’
टोलीले विराटनगरको रानीदेखि सुनसरीको चतरासम्म निर्माण कामको अनुगमन गरेको छ। टोलीका सदस्य तथा आन्तरिक मामिला तथा कानूनमन्त्री हिक्मत कार्कीले प्रदेशको समग्र विकास निर्माणसँग जोडिएको सडकको निर्माण कार्य जुनसुकै सर्तमा छिटो सक्नका लागि सरकार लागि परेको प्रतिक्रिया दिए।
रानी–धरान ६ लेन सडक निर्माणका लागि १० अर्ब ९६ करोडको लागत अनुमान गरिएको छ। निर्माण कार्य सुरु भएको ४ वर्षमा ७ अर्बको काम ठेक्का लागेको र ३८ प्रतिशत बजेट खर्च भएको क्षेत्रीय सडक निर्देशनालयले जनाएको छ। सम्झौता अनुसार ६ लेन (५० मिटर)को ४९ किलोमिटर सडक निर्माणको काम २०७६ भित्र सम्पन्न गर्नुपर्ने छ। ३३ किलोमिटर सडकको ठेक्का लागेको छ भने सुरु भएको ४ वर्ष बितिसक्दा पनि विभिन्न अवरोधका कारण १६ किलोमिटर क्षेत्रमा ठेक्का लाग्न सकेको छैन।
दुहबी बजारमा सडक विस्तार, इटहरीदेखि खनारसम्मको टेंग्रा खोलाको व्यवस्थापन, विराटनगर बजार क्षेत्रमा ५० मिटर सडकका लागि जमिन अभावजस्ता समस्याले निर्माण कार्य प्रभावित भएको छ। ५० मिटरको सम्भावना नै नरहेको विराटनगर बजार क्षेत्रमा ३० मिटर र दुहबी बजारमा १७ मिटर सडक बनाउने सहमति भएको छ। सडकको जग्गा ५० मिटर नै कायम राख्दा दुहबीका झण्डै २ सय घर–टहरा भत्काउनु पर्ने बाध्यता रहेको रानी–विराटनगर–इटहरी–धरान सडक परियोजना कार्यालयले जनाएको छ।
यसैगरी, इटहरीदेखि खनारसम्मको ५ किलोमिटर सडक टेंग्रा खोलाका कारण एकातर्फी मात्रै बढाउनु पर्ने बाध्यता छ। जसका लागि आसपासको जग्गा अधिग्रहण गर्नुपर्ने र लागत खर्च बढ्ने परियोजना प्रमुख विनोदकुमार मौवारले बताए। उनले भने, ‘यो विषयमा सडक विभाग र मन्त्रीपरिषद्ले नै निर्णय गरेर अघि बढ्नुपर्ने आवश्यकता छ।’
विद्युतको पोल, टेलिकमको तार, खानेपानीको पाइप, सडक विस्तार क्षेत्रमा रहेका रुखका कारण पनि सडक निर्माणमा अवरोध भईरहेको मौवारले जानकारी दिए। उनले थपे,‘आयोजना सम्पन्न गर्नका लागि करिब ५ सय ५० वटा रुख काट्नु पर्ने देखिएको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
