भैरहवा– रुपन्देहीको रोहिणी गाउँपालिकाका सम्पूर्ण सडक आगामी ५ वर्षभित्र कालोपत्रे गर्नेगरी नीति तथा कार्यक्रम अगाडि बढाइएको छ।
आर्थिक वर्ष २०७४/०७५ को फागुन मसान्तसम्मको प्रगति विवरण सार्वजनिक गर्न आयोजित पत्रकार सम्मेलनमा गाउँपालिका प्रमुख सनोजकुमार यादवले गाउँपालिकामा पूर्वाधार विकासका लागि विशेष जोड दिइएको बताए। उनले यस वर्षदेखि सडक निर्माण तथा विस्तारलाई प्राथमिकतामा राखी काम अगाडि बढाइएको बताउँदै आगामी ५ वर्षभित्र गाउँपालिकाका सम्पूर्ण सडक कालोपत्रे हुने लक्ष्यका साथ काम भइरहेको जानकारी दिए।
फागुन मसान्तसम्म चालु र पुँजीगततर्फ गरी ३३ प्रतिशत खर्च भएको र असार मसान्तसम्म गाउँपालिकाको सय प्रतिशत बजेट खर्च गर्ने बताए। चालू आर्थिक वर्षमा वित्तीय समानीकरण विकास कार्यक्रमतर्फ प्राप्त हुने २७ करोड ९ लाख ३८ हजारमध्ये ७ वटै वडामा सञ्चालन हुने योजनाका लागि समानुपातिक रुपमा प्रतिवडा १ करोड ६ लाख ५ हजारका दरले ७ करोड ४२ लाख ३५ हजार रुपैयाँ विनियोजन गरी काम भइरहेको जानकारी दिइयो।
गाउँपालिकाले शिक्षामा विशेष सुधार गर्दै लैजाने लक्ष्य राखेको पनि जनाएको छ। जस अनुसार यसै शैक्षिक सत्रदेखि गाउँपालिकाका सामुदायिक विद्यालय तथा मदरसाहरुमा कक्षा १ सम्म अनिवार्य अंग्रेजी विषयमा पठनपाठन गराउने र प्रत्येक शैक्षिक सत्रमा थप कक्षाहरुमा सो विषयलाई विस्तार गर्ने उल्लेख गरिएको छ। यस्तै, प्राविधिक शिक्षालयको स्थापना गर्ने, धकधईमा स्नातक तहको पढाइ यसै शैक्षिक सत्रदेखि सुरु गर्ने, मदरसाहरुलाई विशेष प्राथमिकतामा राखी नेपाल सरकारको पाठ्यक्रम अनुसार सञ्चालन गर्न अनुदानको व्यवस्था गर्ने लगायतका कार्यक्रम अगाडि सारिएको प्रमुख यादवले बताए।
गाउँपालिकामा स्वास्थ्य उपचारलाई ध्यान दिँदै प्रथम चौमासिकमा ५ लाख रुपैयाँको औषधि खरिद गरी प्रत्येक स्वास्थ्य संस्थामा पुर्याएको प्रगति विवरण समेत यादवले सुनाए।
गाउँपालिकाका सम्पूर्ण कृषियोग्य जग्गामा सिंचाइ सुविधा पुर्याउने, २५ वटा स्यालो ट्युबेल जडानका साथै आधुनिक आर्टिजन बोरिङ जडान गरिने ट्युबेल सञ्चालन गरी सबै स्थानमा सिँचाइको पहुँच विस्तार गरिनुका साथै कृषिको व्यावसायीकरणमा स्थानीयहरुलाई अभिप्रेरित गर्न उन्नत जातका बिउबिजनको साथै मलको पनि समुचित व्यवस्थापन गर्ने लक्ष्य रहेको कार्यालयका प्रशासकीय अधिकृत मिनप्रसाद भट्टराईले जानकारी दिए।
उनले आगामी आर्थिक वर्षदेखि रोहिणी गाउँपालिकालाई नमूना गाउँपालिकाको रुपमा विकास गर्ने तथा यसको केन्द्र धकधईलाई मेगासिटीको रुपमा लैजान गुरुयोजना बनाई अगाडि बढ्ने लक्ष्य रहेको उल्लेख गरे। यस्तै, प्राचीन कोलिय तथा शाक्य राज्य छुट्याउने ऐतिहासिक रोहिणी खोलामा बोटिङ गराई यस क्षेत्रको पर्यटन विकासमा जोड दिइनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
