बागलुङ– जैमिनी नगरपालिकास्थित ठेउलेखोला जलविद्युत आयोजनाले परीक्षण उत्पादन शुरु गरेको छ। १ दशमलब ५ मेगावाट क्षमताको आयोजनाबाट उत्पादित विद्युत दुई साताभित्र केन्द्रीय प्रसारण लाइनमा जोडिनेछ।
सिभिल र इलेक्ट्रो मेकानिकतर्फका सबै काम पूरा गरी परीक्षण उत्पादन शुरु गरिएको आयोजनाको प्रवद्र्धक बाराही हाइड्रोपावर लिमिटेडले जनाएको छ।
नेपाल विद्युत प्राधिकरणले प्रसारण लाइन ‘चार्ज’ गरेपछि उत्पादित विद्युत केन्द्रीय ग्रिडमा जोडिने आयोजनाका अध्यक्ष एवम् इन्जिनियर सूर्यप्रसाद अधिकारीले बताए। ‘हामी सबै हिसाबले तयारी अवस्थामा छौँ’, उनले भने,‘२ साताभित्रै परीक्षण प्रसारण शुरु हुन्छ।’
१५ दिन परीक्षण प्रसारण भएपछि आयोजनाबाट व्यावसायिक उत्पादन शुरु हुने उनको भनाइ छ। आयोजनाबाट निस्कने विद्युत अस्थायी रुपमा बागलुङ नगरपालिका–१२ टुनीबोटबाट केन्द्रीय प्रसारणमा जोडिनेछ।
३४ करोड ५० लाख रुपैयाँको लागतमा निर्मित आयोजनाबाट न्यूनतम ५ सय किलोवाटदेखि १ दशमलब ५ मेगावाटसम्म विद्युत उत्पादन हुनेछ। सुख्खायाममा पानीको सतह घट्ने हुँदा उत्पादनमा पनि कमि आउने इन्जिनियर अधिकारीले बताए।
बागलुङ जिल्लाभरिको मागको ४० प्रतिशत माग आयोजनाबाट उत्पादित विद्युतले धान्ने जनाइएको छ। २ वर्षअघि नै सक्ने लक्ष्य लिइएको आयोजना भूकम्प, नाकाबन्दीजस्ता कारणले पछि धकेलिएको थियो। इन्धन अभावले महिनौसम्म आयोजना निर्माण कार्य ठप्प बनेको थियो। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
