फलेवास– पदयात्रा(ट्रेकिङ)का लागि धौलागिरी पदमार्गमा जाँदा बेपत्ता भएका २ विदेशी नागरिक फेला परेका छन्।
हिमालपारिको जिल्ला मुस्ताङको पर्यटकीय गाउँ मार्फाको पश्चिमतर्फ धौलागिरी बेस क्याम्प जाने पदमार्गबाट शुक्रबार रातिदेखि बेपत्ता भएका चेक गणतन्त्रका २ नागरिक शनिबार साँझ भेटिएका जिल्ला प्रहरी कार्यालय मुस्ताङका प्रहरी नायब उपरीक्षक रामहरि पाण्डेले जानकारी दिए।
उनीहरुलाई मार्फाभन्दा २ किलोमिटर माथिको जंगलमा फेला पारिएको हो। प्रहरी नायब उपरीक्षक पाण्डेले भने,‘हामीले खोज्दै जाँदा उनीहरुलाई फेला पार्यौँ। पदमार्गमा हिँड्दै गर्दा १ जना लडेर तल खसेपछि खुट्टा भाँचिएर ढुंगामा च्यापिएको अवस्थामा भेट्टाइयो। साथमा गएका साथी पनि त्यहीँ नै रहेछन्। उनीहरुको उद्धार गरेर जोमसोम ल्याएका छौँ।’
उनीहरु बेपत्ता भएको खबर पाएलगत्तै शनिबार बिहानैबाट प्रहरीले उनीहरुको खोजी शुरु गरेको थियो। सिम्रिक एयरको हेलिकप्टरबाट पनि उनीहरुको दिनभर खोजी गरिए पनि भेट्न सकिएको थिएन। उनीहरु धौलागिरी पदमार्ग हुँदै धौलागिरी बेस क्याम्पमा जाँदै गरेका बेला हराएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
