फाइल तस्बिर
काठमाडौं- अंग्रेजी नयाँ वर्षको दिनमा नेपालभर १५ सय ६७ शिशुको जन्म हुने अनुमान गरिएको युनिसेफले जनाएको छ। नेपाली शिशुहरुको हिस्सा संसारभर नयाँ वर्षको दिनमा जन्मिने ३ लाख ९२ हजार ७८ शिशुको शून्य दशमलव ४ प्रतिशत हुने छ।
‘नयाँ वर्ष र नयाँ दशकको सुरुवात हाम्रो आफ्नो भविष्यका लागि हाम्रा आशा र आकांक्षाहरुबारे सोच्ने मात्र नभई हामीपछि आउनेहरुको भविष्यका लागि पनि सोच्ने अवसर हो’, युनिसेफका कार्यकारी निर्देशक हेनरिएटा फोरले भने, ‘पात्रोमा जनवरी फर्किँदै गर्दा हामीलाई जीवनको यात्रा सुरु गरेका हरेक बालबालिकाको उनीहरुलाई दिने अवसर र त्यसले दिने भविष्यको सम्भावनालाई सम्झाउँछ।’
प्रशान्त क्षेत्रको फिजीले सन् २०२० को पहिलो शिशु प्राप्त गरेको छ भने संयुक्त राज्य अमेरिकाले नयाँ वर्षको दिनको अन्तिम शिशु प्राप्त गर्ने छ। संसारभर आज जन्मिने आधाभन्दा धेरै शिशुहरु निम्न आठ देशहरुमा जन्मिने अनुमान गरिएको छः
१. भारत- ६७,३८५
२. चीन- ४६,२९९
३. नाइजेरिया- २६,०३९
४. पाकिस्तान- १६,७८७
५. इन्डोनेसिया- १३,०२०
६. संयुक्त राज्य अमेरिका- १०,४५२
७. डेमोक्रेटिक रिपब्लिक अफ कंगो- १०,२४७
८. इथियोपिया- ८,४९३
हरेक जनवरीमा युनिसेफले नयाँ वर्षको दिनमा जन्मिने शिशुहरुका लागि उत्सव मनाउँछ र यो संसारभर जन्मिने शिशुहरुका लागि एक सुखद दिन हो।
तथापि, संसारभरका लाखौं नवजात शिशुहरुका लागि, उनीहरुको जन्म सुखद हुन सक्दैन। सन् २०१८ मा संसारभरका २५ लाख नवजात शिशुहरु उनीहरु जन्मेको पहिलो महिनामै र तीमध्ये करिब एक तिहाइको उनीहरुको जीवनको पहिलो दिनमै मृत्यु भएको थियो। ती शिशुहरुमध्ये धेरैजसोको मृत्यु समयअगाडि नै जन्मिने, सुत्केरी हुँदाको जटिलता र सेप्सिसजस्ता संक्रमणलगायतबाट कारणबाट भएको थियो।
यसका साथै, हरेक वर्ष २५ लाखभन्दा धेरै शिशुहरु मृत जन्मिन्छन्।
युनिसेफका अनुसार पछिल्ला तीन दशकमा संसारले बाल बचाउको क्षेत्रमा महत्वपूर्ण प्रगति देखेको छ। संसारभर आफ्नो पाँचौं जन्मदिनभन्दा अघि मर्ने बालबालिकाको संख्या आधाभन्दा धेरैले घटेको छ। तर नवजात शिशुहरुको हकमा भने यो प्रगति सुस्त छ। सन् २०१८ मा जन्मेको पहिलो महिनामा मर्ने शिशुहरुको हिस्सा पाँच वर्षमुनि मर्ने बालबालिकाको कूल संख्याको ४७ प्रतिशत थियो जबकी यो संख्या सन् १९९० मा ४० प्रतिशत मात्र थियो।
युनिसेफको एभ्री चाइल्ड अलाइभ अभियानले गर्भावस्था, प्रसव र जन्मको क्रममा हुने जटिलतालाई जोगाउन र उपचार गर्नका साथै हरेक आमा र नवजात शिशुको हेरचाह सुरक्षित हातले गरिएको सुनिश्चित गर्न उपयुक्त तालिम र उपकरणसहित स्वास्थ्यकर्मीमा तत्काल लगानी गर्न आव्हान गरेको छ।
‘धेरै आमा र नवजातहरुलाई तालिमप्राप्त र आवश्यक उपकरण भएका मिडवाइफ वा नर्सले हेरचाह गरिएको छैन, र यसले गर्दा परिणामहरु चिन्ताजनक देखिएका छन्’, फोरले भने, ‘यदि हरेक शिशु सुरक्षित हातले जन्मिएमा लाखौं नवजातहरु उनीहरुको पहिलो दिनसँगै यो दशक र त्योभन्दा पछिसम्म पनि बाँच्ने सुनिश्चित गर्न सक्छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
