काठमाडौं– नेपाली फिल्म बजारमा प्रियंका कार्की एक मात्र त्यस्ती अभिनेत्री हुन्, जसका फिल्महरु नेपाली बजारमा एकपछि अर्को गर्दै लागिरहन्छन्। कति सफल हुन्छन्, कति असफल। तर त्यसको कुनै परवाह नगरी उनी फिल्मदेखि म्युजिक भिडियोमा अभिनय गरिरहन्छिन्।
कुनै समय यस्तो थियो कि हिरोइन भनेकै रेखा थापा थिइन्। नेपाली फिल्म बजारमा उनको एकल दबदबा थियो। त्यही दबदबाकै बीच अभिनेत्री प्रियंकाको आगमन भयो।
रेखाको उस्तै अभिनयले दिक्क भएका दर्शकका लागि प्रियंका नयाँ 'टेस्ट' बनेर आइन्। उनको मसलेदार अभिनयले दर्शकको मन जित्यो। बिस्तारै नेपाली फिल्म नगरीमा स्टारकै रुपमा दर्ज भइन्।
एक समय दर्शक वृत्तमा 'सेक्स सिम्बोल' बनेकी प्रियंका कहिले आमाको भूमिका देखिन्छिन् त कहिले टिनएजर प्रेमिका। सबै ठाँउमा उनी सुहाएकै हुन्छिन्। अझ भनौं, उनको अभिनयको जादु ३ पुस्ताको अन्तरमा उतिकै सुहाएको पाइन्छ। २५ बर्षे जवानीका प्रदीप खड्का हुन् या ३५ का आर्यन र दायाहाङ, उनको केमेष्ट्री जमेकै छ। अझ त्योभन्दा पुरानो पुस्ता ४५ को हाराहारीमा दौडिरहेका दीपकराज गिरीसँगको जोडी पनि दर्शकले रुचाएकै छन्।
फिल्ममा जति सक्रिय छिन्, म्युजिक भिडियोमा पनि सक्रियता बढ्दो छ। तर स्टार कलाकारहरुले यसरी 'सानातिना' काममा चासो राख्नु जायज हो? भन्ने जिज्ञासमा प्रियंका जायज नै रहेको बताउँछिन्।नेपालको फिल्म इन्ड्रस्ट्री र फिल्म निर्माताहरुले अन्य अन्तर्राष्ट्रिय इन्ड्रस्ट्रीमा झैं पारिश्रमिक तिर्न नसक्ने हुनाले आफ्नो लेभल अनुसारको जीवन जीउन सानातिना काममा पनि लाग्नु पर्ने तर्क छ, उनको
अभिनयको हिस्साको कुरामा पछिल्लो समय प्रियंका अन्य नेपाली नायिकाभन्दा अगाडि नै भए पनि उनी अभिनित एकदुइ फिल्महरु बाहेक अन्यले दर्शकहरु माझ त्यस्तो कुनै जादु चलाएको पाइँदैन। तर केही निर्माता तथा निर्देशक भने कुनै फिल्ममा प्रियंकाको छोटो भूमिकाले पनि दर्शकका लागि उल्लेख्य खुराक दिन सक्छ भन्ने तर्क पेश गर्न थालेका छन्।
आइतबार फिल्म लिलिबिलीको ‘हावा सरी’ बोलको गीत सार्वजनिक कार्यक्रममा यस्तै एक विषयको उठान भयो। कार्यक्रमा उपस्थित पत्रकारले फिल्मको ट्रेलरमा प्रियंका कार्कीको उपस्थिति मात्र ३ सेकेन्ड छ, जसले गर्दा प्रियंकामा केही गुनासो आएको हल्ला सुनिएको थियो। यस विषयमा प्रियंका स्वयंले भने सरसर झुटो हल्ला चलेको बताइन्।
तर प्रियंकाका लागि सोधिएको प्रश्नमाथि फिल्मका निर्देशक मिलन चाम्स अघि सरेर यो विषयको उत्तर आफूले दिनुपर्ने तर्क राख्दै भने, ‘प्रियंका आफैंमा एक स्टार हो, ट्रेलरमा ३ सेकेन्ड आउनु नै काफी छ।’
उनको यस्तो जवाफ दिने शैलीले बताइरहेको थियो कि प्रियंकाको स्टारडम नेपाली फिल्म बजारमा निकै चुलिएको छ।
तर यस भनाइलाई प्रियंकाले कसरी आत्मसात् गरिन् त्यो उनको व्यक्तिगत बुझाइ हो। तर आम दर्शक र सिने जगतले उनलाई पछिल्लो समय कसरी हेरिरहेको छ त्योचाहिँ अध्ययन गरेरै मात्र स्टारडमका गफ पो गर्ने हो कि?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772193271.png)
-1764146706.png)
