काठमाडौ- नेपाल ट्रष्टको कार्यालयले कौडिको भाउमा काठमाडौंको अर्को जग्गा पनि यति ग्रुप अन्तर्गतको थामसेर्कु ट्रेकिङलाई दिएको खुलासा भएको छ।
काठमाडौं महानगरपालिका वडा नम्बर १३ ताहाचलको ५ रोपनी ६ आना २ पैसामध्ये ४ रोपनी ४ आना जग्गा व्यवसायी भवन निर्माण गर्नका लागि थामसेर्कुसँग सम्झौता भएको ट्रष्टका सचिव गजेन्द्र ठाकुरले बताए।
उक्त जग्गामा उसले चाहेको मोडल, तल्ला र डिजाइनमा व्यवसायीक कम्पेक्स बनाउने गरी यति ग्रुप अन्तर्गतको थामसेर्कुलाई दिइएको हो। द्विपक्षीय सम्झौतमा कति तल्ले भवन निर्माण गर्नुपर्ने कुनै प्रावधान राखिएको छैन।
सार्वजनिक खरिद ऐन विपरित प्रतिस्पर्धा
सार्वजनिक खरिद ऐनले सार्वजनिक रुपमा गरिएको टेन्डरमा सामान्यतः दुईभन्दा धेरै कम्पनीका बीचमा प्रतिस्पर्धा हुनुपर्ने भन्दछ। तर नेपाल ट्रष्टले कालिमाटीको यो जग्गा दिदाँ दुईवटा सिमित कम्पनीलाई मात्र प्रतिस्पर्धा गराएर दिइएको पाइएको छ।
दुईभन्दा कम कम्पनी प्रतिस्पर्धामा सहभागी भएमा पुनः टेन्डर गराउनु पर्ने हुन्छ।
सार्वजनिक रुपमा गरिएको टेन्डरमा दुईवटा मात्र प्रस्ताव आएको थियो। टेन्डरमा थामसेर्कु र क्लिन इन्फास्टक्चर प्रालि सहभागी भएका थिए। तर ट्रष्टले उक्त टेन्डर थामसेर्कुलाई दिने निर्णय गरेको थियो। उक्त निर्णयमा ३० वर्षमा ट्रष्टले १८ करोड पाउने उल्लेख छ। २०७४ माघ १२ गते यसरी सम्झौता भएको थियो।
कुन वर्ष कति रकम
१. पहिलो चरण : ३ वर्ष निर्माण अवधी वार्षिक ६ लाख
२. ४-८ वर्षसम्म ६१ लाख ४४ हजार
३. ९-१३ वर्षसम्म ६४ लाख ५१ हजार दुई सय
४. १४-१८ वर्षसम्म ६७ लाख ७३ हजार ७ सय ६०
५. १९ वर्ष देखि २३ वर्षसम्म ७१ लाख १२ हजार ४ सय ४८
६. २४-२८ वर्षसम्म ७४ लाख ६८ हजार ७१
७. २९-३० वर्षसम्म ७८ लाख ४१ हजार ४ सय ७५ रुपैयाँ भाडा लिने सम्झौता भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
