बागलुङ– ‘उज्यालो बागलुङ, समृद्ध बागलुङ’ भन्ने नारासहित लगानी बहस सम्पन्न भएकाे छ। ठूला लगानीकर्ता आकर्षित गर्नका लागि ‘बागलुङ इन्भेष्टमेन्ट टक’ भएको हाे।
उद्योग वाणिज्य महासंघका वरिष्ठ उपाध्यक्ष शेखर गोल्छा लगायत ठूला उद्योगीहरुको उपस्थितमा पहिलो पटक ‘बागलुङ इन्भेष्टमेन्ट टक’ भएको हो।
दक्षिणमा कालीगण्डकी करिडोर र पश्चिममा मध्यपहाडी लोकमार्गले विकासको ढाँचा परिवर्तन गरिरहेको बागलुङमा बिहीबार देशका ठूला व्यवसायीले यहाँको सम्भावना र लगानीका विषयमा बहस गरे।
बागलुङ महोत्सवकै अवसर पारेर बागलुङ उद्योग वाणिज्य संघले प्रभु बैंकको साझेदारीमा आयोजना गरेको ‘बागलुङ इन्भेष्टमेन्ट टक’मा देशका एकदर्जन ठूला व्यवसायीसहित स्थानीय २०० बढी व्यवसायीको उपस्थिति थियो।
कार्यक्रममा गण्डकी प्रदेशका आर्थिक मामिला तथा योजनामन्त्री किरण गुरुङ, नेपाल उद्योग वाणिज्य महासंघका वरिष्ठ उपाध्यक्ष तथा गोल्छा अर्गनाइजेशनका निर्देशक शेखर गोल्छा, महासंघका उपाध्यक्ष तथा आइएमई ग्रुपका अध्यक्ष चन्द्रप्रसाद ढकाल र भाटभटेनी ग्रुपका अध्यक्ष मीनबहादुर गुरुङले बागलुङको सम्भावना कृषि, पर्यटन, जलविद्युतमा रहेकाले लगानीको प्रतिफल र लगानीको वातावरण भए व्यवसायीहरु जहाँ पनि लगानी गर्न सक्ने बताए।
लगानी बहसमा बागलुङ जिल्लामा अनेक लगानीको सम्भावना रहेको भन्दै लगानी भित्र्याउनका लागि ठूला उद्यमी इच्छुक रहेको बताएका थिए। लगानीको वातावरण गराउन तीन तहको सरकारले आवश्यक कदम चालेमा जलविद्युत, केबलकार, स्टार होटल तथा सुपरमार्केट, कृषि उद्योग सञ्चालनका लागि आफूहरु तयार रहेको लगानीकर्ताले बताएका थिए।
शुक्रबारदेखि सुरु हुने छैटौँ बागलुङ महोत्सवको पूर्वसन्ध्यामा लगानी बहसको आयोजना गरिएको हो। सम्मेलनमा गण्डकी प्रदेशका आर्थिक मामिला तथा योजनामन्त्री किरण गुरुङले लगानीको वातावरण बनाउन प्रदेश सरकार इच्छुक रहेको भन्दै ढुक्क भएर ठूला उद्योगमा लगानी गर्न लगानीकर्तालाई आग्रह गरेका थिए।
उनले व्यवसायीले धैर्य गरेमात्र प्रतिफल प्राप्त गर्न सकिने भएकाले पनि लगानी गर्दा दीर्घकालीन सोचका साथ गर्न आग्रह गरेका थिए। 'रातारात परिवर्तन गर्न सकिँदैन, एक वर्षमा प्रतिफल पाउन धान रोप्नुपर्छ।' उनले भने, 'उद्योगमा लगानी गरेपछि प्रतिफल पाउन धेरै समय लाग्छ'।
कार्यक्रममा प्रभु बैंकका प्रमुख कार्यकारी अधिकृत (सीईओ) अशोक शेरचनले जिल्लाका विषयमा जानकारी गराउँदै कार्यक्रमको सहजीकरण गरेका थिए। कार्यक्रममा महासंघका वरिष्ठ उपाध्यक्ष गोल्छाले बागलुङ रमणीय र सुन्दर रहेको बताउँदै जलविद्युत, पर्यटन र कृषिको सम्भावना रहेकाे बताए। लगानीको प्रतिफल र वातावरण मिल्यो भने व्यवसायीले यहाँ लगानी गर्ने उनकाे भनाइ छ। पछिल्लो पटक मुलुकमै व्यावसायिक वातावरण बिग्रदै गएकाे भन्दै गोल्छाले चिन्ता प्रकट गरेका थिए।
कार्यक्रममा आइएमई ग्रुपका अध्यक्ष चन्द्रप्रसाद ढकालले बागलुङमा पर्यटनसम्बन्धी लगानीका लागि आफुहरुले काम गरिरहेको बताएका थिए। ‘बागलुङमा पर्यटनसम्बन्धी कुनै एउटा क्षेत्रमा लगानी गर्छाैं त्यसका लागि हामी पहिलादेखिनै अध्ययन गरिरहेका छौं,’ उनले भने।
भाटभटेनी सुपरमार्केटका अध्यक्ष मीनबहादुर गुरुङले बागलुङमा जग्गा उपलब्ध गराउन सहयोग गरे यहाँ १० महिनामा भाटभटेनी खुल्ने बताए। जग्गा व्यवस्थापन र कानुनी प्रक्रियामा समस्या भएन भने हामी बागलुङमा १० महिनामा भाटभटेनी खोल्न तयाररहेको उनको भनाइ थियो।
‘निजी क्षेत्रले व्यवसाय गर्ने हो, सरकारले त सहयोग गरेर लगानीको वातावरण तयार गरिदिने हो,’ उनले भने, 'लगानीका लागि जोखिम पनि मोल्नुपर्छ, नेपालमा लगानी गर्नु व्यवसाय गर्नु, फलामको च्युरा चपाउनु सरह हाे।'
यस्तै लगानीको समस्या चुनौती र सम्भावनाको विषयमा सांसद देवेन्द्र पौडेल, डा सूर्य पाठक, पर्यटन अभियानकर्मी खिमानन्द कँडेललगायतले जिज्ञासा राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
