स्पोर्टस लाइभ

सन्तोषका ९९ गोल

सराेज तामाङ मंगलबार, पुस ८, २०७६ १९:४९

काठमाडौं- सन्तोष साहुखल। नेपाली फुटबलका स्टार स्ट्राइकर। अझ भनौं लिगमा एक सय गोल पुर्‍याउन एक कदममात्रै पछि रहेका कीर्तिमानी खेलाडी।

‘सय गोल गर्दै छु भनेर धेरै उत्साहित हुनुभन्दा पनि अझ धेरै गोल गरौं भन्नेमा छु’, सन्तोषले भने।

सहिद स्मारक ए डिभिजन लिग फुटबलमा सर्वाधिक गोल गर्ने खेलाडी हुन् सन्तोष। उनले अहिलेसम्म विभिन्न क्लबबाट ९९ गोल गरेका छन्। शतक गोलबाट मात्र एक गोल पछि। २०६० देखि थ्रीस्टार क्लबबाट ए डिभिजन लिग खेल्न थालेका सन्तोष घरेलु प्रतियोगितामा सर्वाधिक सफल खेलाडी हुन्। जारी लिगमा उनले दुई खेलमा तीन गोल गरिसकेका छन्। संकटाविरुद्ध च्यासल युथ क्लबले २–० गोलको जित निकाल्दा दुवै गोल कप्तान सन्तोषको थियो। त्यसपछि मछिन्द्र क्लबविरुद्धको बराबरी खेलमा पनि सन्तोषले गोल गरे।

नेपाली फुटबलका रोल मोडल सन्तोष भन्छन्, ‘यो सिजनमा मात्रै १५–१६ गोल गर्ने लक्ष्यमा छु।’

बिहीबार च्यासलले न्युरोड टिम (एनआरटी) सँग प्रतिस्पर्धा गर्दैछ। यही खेलमा सन्तोषले लिगमा सय गोल पूरा गर्ने लक्ष्यमा छन्।

सय गोल पूरा गरेपछि कस्तो तरिकाले खुसीयाली मनाउनु हुन्छ? उनको जवाफ हुन्छ, ‘साधारण, पहिलाजसरी नै।’

परिवार नै थ्रीस्टार

बाबा बालकृष्ण र आमा सुन्दरीलक्ष्मीको कोखबाट जन्मिएका कान्छा छोरा हुन् सन्तोष साहुखल। उनका दाइ हुन् बालगोपाल।

दाइसँग खेल्दाखेल्दै फुटबलमा होमिए सन्तोष। र, आफूलाई यहाँसम्म ल्याइपुर्‍याउन आफ्नै दाइको मुख्य भूमिका रहेको बताउँछन्। बाबा पनि फुटबल क्रेजी। बेलाबखत सन्तोषलाई लिएर दशरथ रंगशालामा फुटबल हेर्न आउँथे।

अरुले खेलेको देख्दा सन्तोषलाई त्यो रंगशालामा खेल्ने इच्छा तीव्र हुन्थ्यो र मनमनै भन्ने गर्थे– म फुटबल खेल्छु। ‘बाबाले सानैदेखि खेलहरु हेराउन लैजानुहुन्थ्यो। बाबासँग दशरथ रंगशालामा फुटबल खेल हेर्न आउँदा मनमनै लाग्थ्यो यो रंगशालामा एक दिन म पनि फुटबल खेल्नेछु’, पुराना दिन सम्झिन्छन् उनी।

बिस्तारै खेल्दै गए। सिक्दै गए। प्लेटफर्मको रुपमा थ्रीस्टार क्लब पाए, जसले गर्दा सन्तोष अहिले यो स्थानमा छन्।

सन्तोषले क्लब यात्रा थ्रीस्टारबाट सुरु गरे। २०६०, २०६२, २०६३, २०६६–६७, २०६९ र २०७० गरी ६ सिजन थ्रीस्टारबाटै ए डिभिजन लिग खेले।

अझै पनि उनलाई थ्रीस्टार परिवार लाग्छ। थ्रीस्टारका पूर्व अध्यक्ष स्वर्गीय ललितकृष्ण श्रेष्ठको योगदान उनी कहिल्यै भुल्न सक्दैनन्। भन्छन्, ‘अहिले पनि म परिवारकै रुपमा मान्छु थ्रीस्टारलाई। ललितकृष्ण श्रेष्ठले मलाई निकै सहयोग गर्नु भयो। सबै कुरामा नै साथ दिनुभयो, आफ्नै बच्चाजसरी।’

‘राष्ट्रिय टिम फर्किन्छु’

सन्तोषले सन् २००७ मा नेपाली राष्ट्रिय टिममा डेब्यु गरे। विश्वकप छनोटअन्तर्गत ओमानविरुद्धको खेलमा सन्तोष खेलको ७२औं मिनेटमा जुमानु राईको स्थानमा मैदानमा प्रवेश गरे।

३४ क्यापमा ३ गोल गरेका सन्तोष २०१५ देखि राष्ट्रिय टिमबाहिर छन्। काठमाडौंमा भएको विश्वकप छनोटको भारतविरुद्धको खेलपछि राष्ट्रिय टिम बाहिर छन्।

उनलाई राष्ट्रिय टिमबाट खेल्ने इच्छा नभएको भने होइन। इच्छा छ। योजना छ। तर व्यस्तताले समय मिलिरहेको छैन। यदि अखिल नेपाल फुटबल संघ (एन्फा) ले बोलाएमा राष्ट्रका लागि अझै खेल्न तयार रहेको उनी बताउँछन्। भन्छन्, ‘राष्ट्रिय टिमबाट खेल्ने इच्छा छ। तर म जापानमा बसेर पनि काम गरिरहेको छु। तालिका मिल्यो भने खेल्छु।’

नेपाली टिममा परेका बेला पनि सन्तोष अधिकांश समय बेन्चमै रहे। घरेलु फुटबलमा चामत्कारिक नतिजा निकाल्ने खेलाडी बेन्चमा किन? सन्तोष सम्झिन्छन्, ‘मेरो आफ्नै स्टाइल थियो। कोचहरुले चाहिँ जो कुद्न सक्छ। जो खट्न सक्छ त्यसैलाई प्राथमिकतामा राख्नुहुन्थ्यो। तर लिगमा चाहिँ क्लबका प्रशिक्षकले त्यति दबाब दिँदैन थिए। म आफ्नै हिसाबले खेल्न पाउँथे। त्यही भएर धेरै गोलहरु निस्कियो।’

सारथी दाजु

‘नम्बर ९ स्ट्राइकर थोरै नै छन्। जुमानु राई, वसन्त थापा र निराजन रायमाझी जर्सी नम्बर ९ मा देखिने राम्रा स्ट्राइकर हुन्। अहिलेको युवा पुस्तामा जर्सी नम्बर ९ खेलाडी देखेको छैन। सन्तोष नेपाली फुटबलको बेष्ट स्ट्राइकर भन्छु म’, उनका दाइ बालगोपाल भन्छन्।

दाइ बालगोपालसँग सन्तोष साहुखल

सन्तोषको जुन खुबी छ। त्यो नै उनको गहना हो, जुन अरु खेलाडीमा नहुन सक्छ। सबैमा एउटै खुबी हुन सक्दैन। सन्तोष यो सबैको श्रेय दाइलाई दिन्छन्।

यता, दाइ बालगोपाल सन्तोषको खुबी राष्ट्रिय टिमका प्रशिक्षकले बुझ्न नसकेको तर्क गर्छन्। भन्छन्, ‘सुरुमा सन्तोषले लिगहरुमा राम्रोसँग गोल गर्‍यो। तर राष्ट्रिय टिममा चाहिँ प्रशिक्षकहरुले उनको खुबी नै बुझ्न सकेनन्।’

सन्तोषलाई थ्रीस्टार क्लबबाटै ए डिभिजन लिग खेल्ने इच्छा नभएको भने होइन। तर थ्रीस्टारले नबोलाएपछि उनी च्यासल क्लबमा जोडिन आइपुगे। जहाँ उनकै दाइ बालगोपाल मुख्य प्रशिक्षक छन्।

‘हामीसँगै हुर्किएका हौं। उमेरमा पनि खासै फरक छैन। तर खेल्दा हामी दाजुभाइजस्तो हुँदैैनौं। भिडेरै खेल्छौं,’ बालगोपाल थप्छन्, ‘हामी एक अर्काबीचमा मुखले चाहिँ भन्दैनौं तर व्यवहारले माया देखिन्छ। हामी जतिसक्दो सहयोग गर्छौ।’

दाइ–भाइको च्याम्पियन लक्ष्य

च्यासल युथ क्लबले ए डिभिजन लिग दोस्रोपटक खेलिरहेको छ। २०७५ सालमा डेब्यु गरेको च्यासलमा दाइ बालगोपाल प्रशिक्षक छन् भने सन्तोष कप्तान। र, दुवैको लक्ष्य छ लिग च्याम्पियन।

जापानमा जे–८ लिग खेल्ने गरेका सन्तोष नेपालमा लिग हुँदा नेपाल आएर खेल्ने मुडमा थिए। त्यहीबेला उनीसँगै खेलेका शंकर व्यञ्जनकारसँग कुरा भयो। शंकर च्यासलका टिम म्यानेजर छन्।

दाजु प्रशिक्षक, भाइ कप्तान बालगोपाल र सन्तोषलाई योभन्दा राम्रो अवसर कहाँ मिल्छ र?

प्रशिक्षक बालगोपाल भन्छन्, ‘सन्तोषले आफ्नो पोजिसन ड्युटी राम्रोसँग निभाउँछ। सन्तोष टिममा भएका कारण मलाई निकै सजिलो भएको छ। मैले बेष्ट स्ट्राइकर पाएको छु। सन्तोष नभएको भए मैले अफ्रिकन प्लेयरलाई फरवार्डको जिम्मा दिनुपथ्र्यो।’
सन्तोषलाई ए डिभिजन लिगमा सबै क्लब साधारण नै लाग्छ। भन्छन्, ‘सबै साधारण छन्। मछिन्द्र क्लबचाहिँ अलिक राम्रो देख्छु। बल नियन्त्रणमा राखेर खेल्ने प्रयास गर्छ। अरु टिम भनेको ‘आयो गोर्खाली’ भनेजस्तो स्टाइलको छ। अहिले मछिन्द्र र च्यासलले केही राम्रो गर्न खोजिरहेको छ।’

ब्युँतिएको लिग, तर खाली रंगशाला! पहिलोको जस्तो दर्शकविना नै खेल्दा खल्लो लाग्ने त छँदैछ। तर खेल्दै गर्दा उनलाई नेपाली टिमका पूर्व कप्तान हरि खड्कासँग खेलेका याद भने नआउने होइन। हरि खड्कासँग खेल्दा निकै सजिलो महसुस हुने भन्न उनले छुटाएनन्।

‘मैले खेलेकामध्ये हरि खड्का दाइसँग निकै सजिलो भयो। उहाँले मुभहरु बुुझिहाल्नु हुन्थ्यो जुन अरु खेलाडीले बुझ्न निकै गाह्रो पर्छ। हरि दाइले आइकन्ट्याक हुँदा नै बलहरु राम्रोसँग पास दिनुहुन्थ्यो। अहिले त्यस्ता खेलाडीको अभाव महसुस हुन्छ।’

सन्तोष साहुखलले लिगमा गरेका गोल