मनिला– फिलिपिन्समा सम्बन्ध-विच्छेद गर्न पाउने अधिकारलाई कानुनी मान्यता दिने प्रस्तावलाई तल्लो सदनले पारित गरेको छ। तल्लो सदनमा तेस्रो पटकको छलफलपछि मात्रै सो विधेयकलाई निर्णयार्थ पेश गरिएको थियो।
प्रस्ताव पारित भएपनि राष्ट्रपति रोड्रिगो डुतेर्ते भने विपक्षमा उभिएका थिए। उनको कानुनी रुपमा विवाह रद्द भएको मात्र १ वर्ष पुगेको छ।
सम्बन्ध-विच्छेदको नियम लागु हुन भने सो प्रस्तावलाई माथिल्लो सदन ‘सिनेट’ले समेत पारित गर्नुपर्ने हुन्छ। यसका अलावा आफ्नो ‘भिटो पावर’ प्रयोग गरेर समेत राष्ट्रपति डुतेर्तेले सो प्रस्तावलाई सिनेटबाट निस्काषन गरिदिन सक्नेछन्।
हाल विश्वमा फिलिपिन्स र भ्याटिकन सिटीमा मात्रै सम्बन्धविच्छेदलाई कानुनी रुपमा अवैधानिक मानिन्छ। फिलिपिन्समा चर्चको प्रभाव बढि छ र करिब ८० प्रतिशतभन्दा बढी फिलिपिनी नागरिकले आफैलाई क्याथोलिक मान्दै आएका छन्।
कंग्रेस महिला नेत्री इमि डे जिससले अपमानजनक सम्बन्धमा फसेका महिलाहरुको आवाज सुन्न सो विधेयक पेश गरिएको बताइन्। उनले त्यस्ता अपुरणीय विवाह हुनबाट महिलालाई बचाउन सरकारले उचित कदम चाल्नुपर्ने उनले तर्क गरिन्।
सो विधेयकमा १ सय ३४ मत पक्षमा तथा ५७ मत विपक्षमा खसेको थियो। २ जना सांसद अनुपस्थित थिए।
हाल फिलिपिन्समा कानुनी रुपमा विवाहलाई समाप्त गर्ने एक मात्र उपाय अदालती फैसला नै हो। जसका लागि अदालतमा एक नागरिक मुद्दा दायर गर्नुपर्ने हुन्छ। पति–पत्नीको मानसिक स्थिती जाँच गरिएको मेडिकल रिपोर्ट तथा साक्षीहरुको बयानका आधारमा न्यायाधिशले नै विवाह बैध वा अबैधको फैसला सुनाउँछन्।
महंगो मानिएको सो प्रकृया टुंगिन १० वर्षभन्दा लामो समय पनि लाग्नसक्ने बताइन्छ।
राष्ट्रपति डुतेर्ते सम्बन्ध-विच्छेदले बालबालिकामा नराम्रो प्रभाव पार्नेमा चिन्तित रहेको उनका प्रवक्ता ह्यारी रोकले बताए। राष्ट्रपति डुतेर्तेले शक्तिमा आउनुअघि सोहि प्रक्रियाबाटै गत वर्ष मात्रै सम्बन्ध-विच्छेद गराएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
