बुटवल- नेपाली कांग्रेस प्रदेश नम्बर ५ को संसदीय दलको नेता चयनका लागि आज मतदान हुँदैछ।
मतदानका लागि अपराह्न ३ बजेदेखि ५ बजेसम्मको समय तोकिएको छ। मतदानअघि दिउँसो साढे २ बजेसम्मका लागि मनोनयन फिर्ताको समय तोकिएको निर्वाचन समितिले जनाएको छ। प्रदेश ५ मा संसदीय दलको नेता बन्ने आकांक्षी धेरै देखिएपछि निर्वाचन हुने निश्चित भएको हो।
दलको नेता बन्नका लागि रुपन्देहीका बलदेव शर्मा र फकरुद्धिन खाँ, कपिलवस्तुका वीरेन्द्रकुमार कनौडिया, पाल्पाका वीरबहादुर राना र दाङका डिल्ली चौधरीले फागुन ६ गते नै मनोनयन दर्ता गराएका थिए। उम्मेदवारी दिएकामध्ये कोही पनि पछि हट्ने सम्भावना नरहेपछि आज मतदान तोकिएको निर्वाचन समितिले जनाएको छ।
प्रदेश नम्वर ५ मा कांग्रेसका १९ सदस्य रहेका छन्। यस प्रदेशमा संसदीय दलको नेता चुन्न केन्द्रले केन्द्रीय सदस्य बालकृष्ण खाँणलाई खटाएको छ भने निर्वाचन प्रक्रिया पूरा गर्न वरिष्ठ अधिवक्ता डा. बुद्धबहादुर थापाको संयोजकत्वमा निर्वाचन समिति गठन गरिएको छ।
सहमतिका लागि प्रदेशसभा सदस्यहरुबीच हिजो अनौपचारिक छलफल भए पनि मनोनयन फिर्ता लिन कोही पनि तयार भएका छैनन्। आज पुन: एक पटक छलफल गर्ने र सहमति भए २ बजेसम्म सहमतिमा र नभए मतदानबाट टुंग्याउनेमा नेताहरु सहमत भएको निर्वाचन समितिका संयोजक डा थापाले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
