विराटनगर– सुनसरीको बराहक्षेत्र नगरपालिका ११ इक्राइस्थित सरदार टोलमा शनिबार राति भएको आगलागीका पीडितको विचल्ली भएको छ। आगलागीबाट लताकपडा, भाँडाबर्तन तथा वर्षभरि खान जोहो गरेर राखेको खाद्यन्न नष्ट भएपछि आगलागीपीडित ४७ परिवार विक्षिप्त बनेका छन्। उनीहरुलाई बस्ने ठाँउ र खाद्यान्नको अभाव छ।
विभिन्न संघ–संस्थाहरुले लताकपडा, चाउचाउ लगायतका सामग्री दिए पनि खाद्यन्न भने कसैले दिएका छैनन्। उनीहरु शनिबारदेखि भुजा खाएर गुजारा गर्दै आएका छन्। खान नपाएर केटाकेटीको विचल्ली भएको गीता चौधरीले बताइन्। उनकी एक वर्षीया छोरी छिन्।
खानाका लागि कतैबाट खाद्यान्न नआएकाले छोरीलाई गीताले भुजा खुवाएर राखेकी छन्। ‘आफ्नो भएको सबै रित्तियो,’ उनले भनिन्, ‘राहतमा भुजा र बिस्कुट पाइयो, त्यही खुवाएर राखेकी छु।'
ल्याउनेले पनि भुजाबाहेक केही नल्याउने ४३ वर्षीया पल्वीदेवी सरदारले गुनासो गरिन्। उनका अनुसार पीडित परिवारमा चामलको चरम अभाव छ।
यसै क्रममा बराहक्षेत्र नगरपालिकाका मेयर निलम खनालले आइतबार घटनास्थलको निरीक्षण गरेका छन्। उनले ४७ परिवारलाई कम्बल वितरण गरेका छन्। सामूहिक खानासमेत खुवाएको मेयर खनालले जानकारी दिए। खाद्यन्न नभएको गुनासोलाई सम्बोधन गर्न सोमबार नगरपालिकाबाट चामल, दाल, तेल र नुन वितरण गर्ने कार्यक्रम भएको उनले जानकारी दिए।
भोक्राहा–४ सिशौली चौकवासीले स्वस्फूर्त रुपमा चाउचाउ, भुजा बिस्कुट वितरण गरेका छन्। आगलागीपछि खुल्ला स्थानमा गुजारा गर्दै आएका पीडितलाई किरा र लामखुट्टेबाट बचाउन झुल र स्वास्थ्य शिविरको आवश्यकता महसुस भएको स्थानीयले जानकारी दिए।
प्रदेश सरकारबाट जनही ५ हजार सहयोग
प्रदेश सरकारका आन्तरिक मामिला तथा कानुन मन्त्री हिक्मत कार्की र उद्योग, पर्यटन, वन तथा वातावरण मन्त्री जगदीशप्रसाद कुसियतले पनि आइतबार नै आगलागी घटनाको निरीक्षण गरेका छन्। प्रदेश सरकारको तर्फबाट ५० घर परिवारलाई जनही ५/५ हजारको दरले नगद वितरण गरेका छन्।
आगलागीमा ४७ परिवारका ७० वटा घर टहरा पूरै खरानी हुँदा १ करोड ३७ लाख ६० बराबरको क्षति भएको छ। उक्त बस्तीमा चौधरी, सरदार, उराव, ऋषिदेवलगायत बसोवास गर्दै आएका थिए। स्थानीय पुरन चौधरीको घरबाट विद्युत सर्ट भई आगलागी हुँदा सिंगो बस्ती खरानी भएको जिल्ला प्रहरी कार्यालय सुनसरीका डिएपी नारायण प्रसाद चिमोरियाले जानकारी दिएका छन्।
विराटनगर, इटहरी, धरान, इनरुवा, दुहवी र राजविराजका ५ वटा दमकल तथा नेपाली सेना, शसस्त्र प्रहरी र जनपथ प्रहरी एवं स्थानिय बासीहरुको सक्रियतामा राति साढे ११ बजे आगो नियन्त्रणमा आएको थियो। आगलागीबाट २० पशु चौपाया जलेर मरेका छन्। आगो नियन्त्रणका क्रममा सिलिन्डर पड्केर कोशी गाउँपालिका ३ का ४१ वर्षीय प्रभु सरदार घाइते भए। उनको नोबेल अस्पताल विराटनगरमा उपचार भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
