स्पोर्टस लाइभ

९९ रन पुगेपछि मात्र शतकको सोच!

पोखरा- दोस्रो सिजनको पोखरा प्रिमियर लिग (पिपिएल) टी ट्वान्टी क्रिकेटमा लगातार दुई खेल हारेपछि काठमाडौं गोल्डेन वारियर्सका कप्तान ज्ञानेन्द्र मल्लले भनेका थिए- ‘अब हाम्रो बाटो झनै सजिलो भएको छ, हरेक खेल जित्नुको विकल्प छैन।’

उनले भनेजस्तै आफ्नो तेस्रो खेलमा काठमाडौंले धनगढी ब्लुजलाई १ सय ६ रनले हरायो। जसमा पिपिएलकै पहिलो शतक बनाएका कप्तान ज्ञानेन्द्र केन्द्रमा रहे। यसअघि दुई खेल हारेको काठमाडौंले पहिलो जित बनायो।

ऐतिहासिक शतक बनाएका कप्तान मल्ल आफूले जितको विकल्प नदेखेकैले धेरै रन बनाउन अघि बढेको बताए। ९९ रन हुँदासम्म शतकबारे नसोचे पनि त्यसपछि एक रन लिएर शतक पूरा गर्न लागेको उनले सुनाए।

३७ बल खेलेका मल्लले ८ चौका ९ छक्का हानेका थिए। २४ बलमा ५४ रन बनाएका उनले पछिल्लो १३ बलमा ४६ रन हानेका हुन्।

पोखरा रंगशाला क्रिकेट मैदानमा हुस्सुका कारण एक घन्टा ढिलो गरी सुरु भएको खेल १७ ओभरमा झारिएको थियो। ओपनिङमा आएका गौरव तमोर ३ बल खेलेर बिनारन आउट भएका थिए। तेस्रो क्रममा ब्याटिङमा आएका अमित श्रेष्ठले ६ चौका १ छक्कासहित ३४ रन हाने।

ज्ञानेन्द्रलाई साथ दिइरहेका जयकिशन कोल्सावालाले ३७ बलमा ४६ रन हाने। जसमा उनले ४ चौका २ छक्का बनाएका थिए। १ सय ८६ रनको लक्ष्य पछ्याएको धनगढीले ७९ रन मात्र बनाउन सक्यो। जसमा काठमाडौंका बसन्त रेग्मीले ३ विकेट लिए। पवन सर्राफ र सुवोथ भाटीले दुई–दुई साथै अमृत भट्टराई र सुशन भारीले एक–एक विकेट लिए।

कसिलो बलिङसमेत जितको आधार भए पनि पहिले ब्याटिङमा ज्ञानेन्द्रले बनाएको शतक नै खेलमा सबैभन्दा महत्वपूर्ण क्षण रह्यो। ज्ञानेन्द्र शतकसँगै जारी पिपिएलमा सर्वाधिक रन बनाउने खेलाडी बने। उनले ३ खेलमा दुई सयको स्ट्राइक रेटमा १ सय १६ रन बनाएका छन्।

गएको वर्ष पहिलो पिपिएलमा ६ खेलमा ५ इनिङ ब्याटिङ गरेका उनले १ सय ३३ रन बनाएका थिए। जसमा उनको सर्वाधिक रन ३१ मात्र थियो। त्यसमा १२ चौका र ३ छक्का थियो। उनले जारी सिजन १० चौका ९ छक्का हानिसकेका छन्। यसपटकको शतकले उनले ३ खेलमा नै १ सय १६ रन बनाउन सके।

जारी पिपिएलको पहिलो खेलमा पोखरा पल्टनसँग ९ विकेटले हार्दा ज्ञानेन्द्रले ५ बल खेलेर १ रन मात्रै बनाएका थिए। बुटवल ब्लास्टरसँग सुपर ओभरमा हारेको दोस्रो खेलमा उनले १५ बलमा १५ रन बनाएका थिए।

दोस्रो खेल हारेपछि फाइनलसम्म पुग्न अप्ठ्यारो हुने हो कि भन्ने प्रश्नमा उनले भनेका थिए– ‘होइन, बाटो अब झन सजिलो भएको छ। अब सबै खेल जित्ने र अगाडि बढ्ने। जित्नुबाहेक अरु केही पनि रहेन। टिमहरु सबै राम्रो छन् त्यो दिन जो चल्यो खेल उसैले जित्ने हो।’

नभन्दै आजको दिन ज्ञानेन्द्र चले। ज्ञानेन्द्रले कसरी शतकीय पारी खेले त? उनी भन्छन्– ‘सुरुमा त पिचको कन्डिसन कस्तो छ त्यसलाई विचार गर्ने भन्ने नै थियो। आज अलिकति ‘अट्याकिङ मुड’मा हुन पनि जरुरी थियो। हामीसँग जित्नेबाहेक अर्को विकल्प पनि थिएन। त्यसैले पनि म रन हान्नुपर्छ भन्नेमा नै थिएँ।’

आफूले रन बन्न थालिसक्दा पनि शतक बारे नसोचेको बताएका ज्ञानेन्द्र भन्छन्– ‘९९ मा पुगेपछि बल्ल शतकका लागि सोचेको थिएँ। त्यसभन्दा अघि त जति सकिन्छ त्यति रन बनाउनुपर्छ भन्ने मात्र थियो। किनभने धनगढीको पनि केही ब्याट्सम्यान हिट हान्न सक्ने नै थिए।’

सक्दो रन बनाउनुको विकल्प नभएको र आफूहरुले रन बनाउन सकेको पिचमा धनगढीले पनि रन हान्न सक्ने सम्भावना उति नै रहेको उनको सोच थियो। ‘हामीले सक्दो धेरै रन बनाउनुको विकल्प थिएन। हामीले रन हानिरहेको ठाउँमा उनीहरुले पनि हान्न सक्छन् भन्ने नै थियो। ९९ मा पुग्दा ननस्ट्राइकमा रहेका जयकिशन कोल्सावालाले पनि एक रन लिएर त्यसपछि हिट हान्दा हुन्छ भनिरहेका थिए। मैले त्यसै गरेँ।’

टिमकै प्रदर्शन राम्रो रहेको भन्दै उनी भन्छन्– ‘कुनै खेलमा रन लाग्दा राम्रो नै हुन्छ। म जानुअघि अमित श्रेष्ठले पनि हिट हानिरहेको थियो। त्यसैले धनगढीका बलरलाई सजिलो थिएन। कहिले काहीँ ब्याट्सम्यान चल्दा बलरलाई असर नै गर्छ।’

पिपिएलमा ओसिलो मैदानका कारण बिहानको खेलमा टस जित्ने टिमले फिल्डिङमा रोज्ने भए पनि पहिले ब्याटिङ गरेर काठमाडौंले मैदानबारेको भ्रम पनि चिरिदियो। ‘यसमा ब्याटिङ पिच बलिङ पिच भन्नुभन्दा पनि रन लागेको कुरा नै महत्वपूर्ण हो। रन लाग्दा पनि बिग हिटमार्फत लागिरहेको थियो। त्यसले गर्दा आज ‘क्लिक’ भयो’, ज्ञानेन्द्रले भने,

‘टस जितेको भए हामीले पनि पहिले बलिङ नै गथ्र्यौं होला तर पहिले ब्याटिङ गर्दा के गर्ने भन्ने सोच पनि बनाएका थियौं। मैदानको शितले गर्दा बलरलाई सजिलो मात्र हुने होइन अप्ठ्यारो पनि त हुन सक्छ।’