काठमाडौं- तेह्रौँ दक्षिण एशियाली खेलकूद प्रतियोगिता (साग) हेर्ने दर्शकका लागि शुक्रबारदेखि टिकट बिक्री सुरु गरिने भएको छ। मङ्सिर १५ गतेदेखि सुरु हुने सागका विभिन्न खेलका लागि स्थानीय व्यवस्थापन तथा सहजीकरण समितिले टिकट बिक्री गर्न लागेको हो।
सागमा कास्कीको पोखरामा ८ खेल हुँदैछन्। टिकट व्यवस्थापनको जिम्मा स्रोतसाधन परिचालन समितिले लिएको छ। साधारणतर्फ रु १ सय र सिजनलतर्फ रु ५ सय टिकट दर कायम गरिएको समितिका संयोजक सञ्जिवबहादुर कोइरालाले जानकारी दिए। यसैगरी बीच भलिबलको टिकट दर रु २ सय तय गरिएको छ। पोखराको विभिन्न ठाउँका चोकमा १४ टिकट बिक्री कक्ष राखिएको छ।
पोखरामा हुने विभिन्न ८ खेलका लागि ८ सय ४० खेलाडी तथा अफिसियल पोखरा आउँदैछन्। पोखरामा महिला फुटबल र क्रिकेट, बीच भलिबल, भारोत्तोलन, ह्याण्डबल, ट्रायथलन, आर्चरी र ब्याडमिन्टन खेल हुनेछ। नेपालले स्वर्ण आश गरेको प्याराग्लाइडिङ भने नहुने भएको छ।
पोखरास्थित रङ्गशालामा फुटबल, क्रिकेट, ब्याडमिन्टन, ह्याण्डबल र धनुकाण खेल हुनेछन् भने भारोत्तोलन पोखरा-१२ माटेपानीमा तथा ट्रायथलन र बीच भलिबल लेकसाइडमा हुने साग खेल प्रचारप्रसार समितिका संयोजक केशव पाठकले जानकारी दिए।
ट्रायथलनको तयारी अन्तिम चरणमा
तेह्रौँ सागअन्तर्गत पोखरामा हुने ट्रायथलन खेलको तयारी अन्तिम चरणमा पुगेको छ। मङ्सिर १६, १७ र १८ गते हुने ट्रायथलनका लागि पूर्वाधार निर्माण भइसकेको र आवश्यक सामग्री सबै खेलस्थलमा पुगिसकेको जिल्ला ट्रायथलन सङ्घका सचिव प्रकाश बरालले जानकारी दिए।
फेवातालमा पौडीका लागि प्लाष्टिकका ब्लक हाल्ने काम सकिएको छ। पोखरामा पुरुष र महिला पौडी, २० किलोमिटरको साइकिलिङ र पाँच किलिमिटरको दौड हुनेछ।
प्रतियोगितामा ५ स्वर्ण, ५ रजत र ५ कास्य पदकका लागि प्रतिस्पर्धा हुने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
