डडेल्धुरा- डोटी प्रहरीको हिरासतमा चालकको मृत्यु भएको विषयलाई लिएर स्थानीयले भीमदत्त राजमार्ग अवरुद्ध पारेका छन्।
घटनाको सत्यतथ्य अनुसन्धान गरी दोषीलाई कारबाहीको माग गर्दै स्थानीयले राजमार्गको जरायल गाउँपालिका-१को गैरा बजारमा सडक अवरुद्ध पारेका हुन्।
उनीहरूले बुधबार अपराह्न ४ बजेदेखि राजमार्ग अवरुद्ध पारेका हुन्। स्थानीयले राजमार्गमा अवरोध गरेपछि सवारी साधन बीच सकडमै रोकिएका छन्।
स्थानीयले सुदूरपश्चिमका सात पहाडी जिल्लाको यातायत ठप्प पारेका छन्। उनीहरूले बुधबार २ घण्टाका लागि राजमार्ग अवरुद्ध पारेपनि माग पूरा नभए भोलिदेखि अनिश्चितकालीन बन्द गर्ने चेतावनी दिएका छन्।
मंसिर ८ गते डोटीको गैरामा रहेको घण्टेश्वर प्रहरी चौकीले हिरासतमा लिएका जीप चालक गणेश पालीको शंकास्पद मृत्यु भएको थियो।
डोटीको जोरायल गाउँपालिका-४ घर भएर कैलालीको गोदावरीमा बस्दै आएका २१ वर्षीय चालक पालीले बीच सडकमै गाडी रोकेर अवरोध सिर्जना गरेको भन्दै प्रहरीले उनलाई पक्राउ गरेको थियो तर प्रहरीले थुनामा लिएको केही समयपछि उनको मृत्यु भएको थियो। प्रहरीले भने शौचालयबाट फर्किने क्रममा लडेको र उपचारका लागि डडेल्धुरा लैजाँदै गर्दा मृत्यु भएको दाबी गर्दै आएको छ।
यसैबीच, चालकका बुवाले तिलकबहादुर पालीले घण्टेश्वर प्रहरी चौकीमा कार्यरत ड्यटीमा रहेका प्रहरी जवान दीपक सामन्त र शंकर खड्काविरुद्ध किटानी जाहेरी दर्ता गराएका छन्।
मंगलबार जिल्ला प्रहरी कार्यालय डोटी पुगेर सामन्त र खड्काविरुद्ध जाहेरी दर्ता गराएका हुन्। दुवै प्रहरी जवान प्रहरी निगरानीमा छन्। उक्त घटनाको छानबिनाका लागि जिल्ला प्रहरी कार्यालय डोटीका प्रहरी निरिक्षक कर्ण बोहराको संयोजकत्वमा टोली गठन गरिएको छ। उक्त टोली बुधबार घटनास्थल पुगेको छ। मृतक पालीको शव डडेल्धुरा अस्पताल डडेल्धुरामा पोष्टमार्टमको लागि राखिएको छ। आफन्त नपुगेर पोष्टमार्टम हुन नसकेको जिल्ला प्रहरी कार्यालय डडेल्धुराले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
