काठमाडौं- सामाजिक सुरक्षा दिवसका अवसरमा दुई दिवंगत योगदानकर्ताका परिवारलाई कोषले सुविधा वितरण गरेको छ।
कोषमा सूचिकृत भई योगदान आरम्भ गरिसकेको अवस्थामा सडक दुर्घटनामा परी ज्यान गुमाएका २ योगदानकर्ताका आश्रित परिवारलाई कोषले सुविधा प्रदान गरेको हो।
आश्रित परिवार योजना अन्तर्गतको सुविधा प्राप्त गर्नेमा इन्जिनियर रुपेन्द्र थापा (सामाजिक सुरक्षा नम्बर २०७६०००३०५१)का परिवार र अर्का योगदानकर्ता प्रकाश तामाङ (सामाजिक सुरक्षा नम्बर २०७६०००१३७९५)का परिवार छन्।
दिवंगत योगदानकर्ता रुपेन्द्र थापाकी श्रीमती र योगदानकर्ता प्रकाश तामाङका बुबाले उपप्रधानमन्त्री ईश्वर पोख्रेलमार्फत सेवा ग्रहण गरेका थिए।
सडक दुर्घटनामा ज्यान गुमाएका मृतकका आश्रित परिवारले योगदानकर्ताको आधारभूत पारिश्रमिकको ६० प्रतिशत मासिक सुविधा पाउने भएका छन्।
रुपेशका परिवारले मासिक १७ हजार र प्रकाशका परिवारलाई मासिक १० हजार २ सयका दरले कोषले भुक्तानी दिनेछ। आश्रित परिवार योजना अन्तर्गत जुनसुकै कारणबाट योगदानकर्ताको मृत्यु भएमा पनि निजको पति वा पत्नीले योगदानकर्ताको अन्तिम आधारभूत पारिश्रमिकको ६० प्रतिशतको दरले निजले जीवनभर सुविधा पाउने व्यवस्था छ।
तर योगदानकर्ताको पति वा पत्नीले अर्को विवाह गरेमा वा निजको वैकल्पिक रोजगार रहेको अवस्थामा भने यो सुविधा दिइँदैन।
योगदानकर्ताको मृत्यु भएको अवस्थामा निजको १८ वर्ष उमेर पूरा नभएका छोराछोरी भएमा १८ वर्षको उमेरसम्म शैक्षिक वृत्ति बापत योगदानकर्ताको अन्तिम आधारभूत पारिश्रमिकको ४० प्रतिशत रकम मासिक रुपमा पाउने व्यवस्था छ।
योगदानकर्ताको पति‚ पत्नी‚ छोरा वा छोरी नभएको अवस्थामा आश्रित परिवार सुरक्षा योजनाको रकम निजको आमाबुबालाई आधारभूत पारिश्रमिकको ६० प्रतिशत रकम जीवनभर मासिक रुपमा प्रदान गरिने व्यवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
