राजविराज– प्रदेश २ का नवनियुक्त भूमि व्यवस्था, कुषि तथा सहकारी मन्त्री शैलेन्द्रप्रसाद साह सोमबार सप्तरीको भारदहस्थित मधेस आन्दोलनका सहिद रामकृष्ण राउतको घर पुगेका थिए। त्यसै क्रममा सहिदका छोरा राजकुमार राउतले मन्त्रीलाई प्रश्न गरे, ‘सहिद परिवारलाई रोजगारीको व्यवस्था कहिले हुन्छ?’
मन्त्री भएपछि मधेस आन्दोलनका सहिद परिवार तथा घाइतेसँग घरै पुगेर भेट्न निस्केका साहलाई राजकुमारले सहिदका नाममा ट्रस्ट स्थापना नभएको, आन्दोलनका समयमा नेताहरुले गरेको प्रतिबद्धता समेत पूरा नभएको गुनासो गर्न छुटाएनन्। रामकृष्णको मधेस आन्दोलनका क्रममा २०७२ भदौ २३ गते प्रहरीले चलाएको गोली लागेर मृत्यु भएको थियो।
यसअघि सहिद राजीव राउतकी पत्नी निलमले पनि आफ्ना २ छोराछोरीको पढाइ–लेखाइको व्यवस्थाबारे मन्त्री साहको ध्यानाकर्षण गराइन्।
५ वर्षीय छोरा आर्यन र तीन वर्षकी छोरी आर्यालाई देखाउँदै उनले पतिको मृत्यु भएपछि छोराछोरीको भविष्य कसरी सुनिश्चित होला भनी चिन्ताले सताउने गरेको सुनाइन्। उनका पति राजीवको २०७२ भदौकै १ गते आन्दोलनका क्रममा प्रहरीको गोली लागेर मृत्यु भएको थियो।
राजीवका वृद्ध पिता भीम राउतले कमाइ गर्ने छोरो आन्दोलनमा मारिएको र बुढेसकालमा नाति–नातिनाको लालनपालनको जिम्मा समेत आफ्नै काँधमा आएको भन्दै आन्दोलनका क्रममा व्यक्त गरेको प्रतिबद्धता पूरा गर्न मन्त्री समक्ष आग्रह गरे।
दुई सहिदका परिवारजनको कुरा सुनेपछि मन्त्री साहले सहिदका परिवारमा एक जनालाई रोजगारी दिने मन्त्रिपरिषदको पहिलो बैठकले नै निर्णय गरिसकेको जानकारी दिँदै यसमा शंका नगर्न र निर्णय कार्यान्वयनको समयसम्म धैर्य गर्न आग्रह गरे। उनले प्रदेश २ को विकासका लागि कृषि, सिँचाइ, शिक्षा र स्वास्थ्य क्षेत्र महत्वपूर्ण रहेको बताउँदै सरकारले यसलाई प्राथमिकतामा राखेर काम गर्ने स्पष्ट पारे।
‘सहिदको सहादतले नै मधेस आन्दोलनको नेतृत्व गर्नेहरु अहिले सत्तामा पुगेका हुन्’, संघीय समाजवादी फोरमका राजनीतिक समिति सदस्य समेत रहेका साहले थपे, ‘त्यसैले उनीहरुको व्यवस्थापन हाम्रो पहिलो प्राथमिकता हुनुपर्छ।’
सप्तरीको निर्वाचन क्षेत्र नम्बर २(क) बाट निर्वाचित मन्त्री साहले मधेस आन्दोलनका क्रममा निकालिएको मानव साङ्लोमा सहभागी भएकै बेला अस्वस्थ भई मृत्यु भएका भारदहकै बालकृष्ण रायको घरमा पुगेर उनकी पत्नी पुष्पा राय, आन्दोलनका क्रममा खुट्टामा गोली लागी घाइते भएका फोरमका कार्यकर्ता देवनारायण विश्वास समेतलाई भेटेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
