काठमाडौं- विभिन्न बैंकमा खाता खोली अरुको हस्ताक्षर नक्कल गरेर लाखौं रुपैयाँ निकाल्ने ६ जना पक्राउ परेका छन्। महानगरीय प्रहरी परिसर काठमाडौंले काभ्रेपलाञ्चाेककाे पाँचखाल नगरपालिका वडा नंम्बर १३ घर भइ काठमाडौंको कालीमाटी बस्ने १९ वर्षीय सुभाष श्रेष्ठ, वर्ष १९ कै कुमार तामाङ, १८ वर्षका मनिष घिमिरे र २१ वर्षका अन्जन बराललाई पक्राउ गरेकाे हो।
गिरोहमा रहेका बागलुङ गलकोट नगरपालिका वडा नंम्बर ३ घर भइ काठमाडौं बुद्धनगर बस्ने २५ वर्षका सुमन पौडेल र सिन्धुपाल्चोककाे साविक ज्यामिरे गाविस वडा नंम्बर ९ घर भइ काठमाडौंको सुविधानगर बस्ने वर्ष ३० का गोविन्द घिमिरे पनि पक्राउ परेका छन्। पक्राउ परेका व्यक्तिहरुबाट बरामद गरिएका विभिन्न बैंकका चेक, खाता खोल्न तयार पारिएका फारम, एटिएमलगायतकाे विवरण हेर्दा उनीहरुले बैंकबाट ठूलो रकम लुट्ने योजना बनाइरहेको देखिएको छ।
उक्त गिरोहबाट प्रहरीले नगद १८ लाख ५० हजार रुपैयाँ, विभिन्न व्यक्तिको नागरिकताको प्रतिलिपि २ सय ९० पाना, विभिन्न व्यक्तिको नाम र रकम उल्लेख गरिएको २६ थान रजिस्टर, विभिन्न प्रकारका हस्ताक्षर नमुना र नाम उल्लेख गरिएको २ थान डायरी बरामत गरेको छ। विभिन्न व्यक्तिको नाममा खाता खोल्न फोटो टाँसेको सय थान तयारी फारम, १ सय ९५ जनाको बैंक स्टेटमेन्ट, जनता बैंकबाट विभिन्न व्यक्तिको नाममा जारी भएको नकाटिएको अवस्थाको चेकबुक १६ थान र काटिएको अवस्थाको चेकबुक ४१ थान बरामत भएको छ।
त्यस्तै एभरेष्ट बैंकबाट विभिन्न व्यक्तिको नाममा जारी भएको नकाटिएको अवस्थाको २० थान र काटिएको अवस्थाको ३ थान, माछापुच्छ्रे बैंकबाट विभिन्न व्यक्तिका नाममा जारी भएको नकाटिएको अवस्थाको १७ थान र काटिएको अवस्थाको २ थान, मुक्तिनाथ विकास बैंकबाट विभिन्न व्यक्तिका नाममा जारी भएको नकाटिएको चेक ४१ थान र काटिएको चेक २ थान, एनआइसी एसिया बैंकको विभिन्न व्यक्तिका नाममा जारी भएको ६८ थान चेक बरामद भएको छ।
एनआइसी एसिया बैंकको ८२ थान एटिएम र अन्य बैंकको ७ थान एटिएमसमेत बरामत गरिएको महानगरीय प्रहरी परिसरले जनाएको छ। सो गिरोहले विभिन्न व्यक्तिका नाममा खाता खोल्न संकलन गरेका ८ सय २५ वटा फोटो र बैंकसँग सम्बन्धित विभिन्न डकुमेन्टहरु २ बोरा भन्दा बढी बरामद गरेको छ।
कसरी पक्राउ परे?
मंसिर ८ गते राती साढे २ बजे जनता बैंकमा खाता रहेका गोपालमान राजबाहकको खाताबाट पटक-पटक गरी १९ लाख ९ हजार रुपैयाँ निकालेको मोबाइलमा म्यासेज आयो। उनले आफैले कुनै चेक कसैलाई नदिएको, आफूले चेक नसाटेको तर अरु कसैले आफ्नो खाताबाट रकम झिकेको भन्ने सूचना प्रहरीलाई दिए।
यस्तो सूचना आएलगत्तै महानगरीय प्रहरी परिसर काठमाडौंको विशेष टोलीले जनता बैंक तथा नेपाल राष्ट्र बैंकका अधिकारीहरुसँग छलफल गर्याे र अनुसन्धान अगाडि बढायो। अनुसन्धानका क्रममा पीडितलाई दिइएको चेकबुकबाट नयाँ चेकबुक लिएर पैसा निकालेको देखिएको थियो।
गोपालमान राजबाहकको खाताबाट पैसा झिक्ने तिनै व्यक्ति मंसिर ९ गते फेरी त्यस्तै चेक बोकेर जनता बैंकको न्युरोड शाखा पुगे। बैंकले उक्त सूचना तत्काल प्रहरीलाई दियो। प्रहरीले नियन्त्रणमा लिई थप अनुसन्धान गर्ने क्रममा अरु ६ जना व्यक्तिले सोही दिन विभिन्न स्थानबाट १८ लाख ५० हजार नगद, विभिन्न बैंकको ठूलो परिमाणमा चेकबुक, खाता खोल्न तयार पारिएका फारमहरु, एनआइसी एसिया बैंकको भिसाकार्ड, विभिन्न व्यक्तिको नामका नागरिकताका फोटोकपी बरामद गर्याे।
ती व्यक्तिहरुले बैंक खाता रहेका विभिन्न व्यक्तिहरुको चेकमा रहेको हस्ताक्षर चोरी, सोही व्यक्तिका नाममा चेक हराएको निवेदनसमेत दिई नयाँ चेकबुक निकाल्ने र हस्ताक्षर मिलाई लाखौं रकम निकाल्ने गरिएको देखिएको छ। महानगरीय प्रहरी परिसरले पक्राउ परेका व्यक्तिलाई बैंकिङ कसुर सम्बन्धि मुद्दा अगाडि बढाउन उच्च अदालत पाटनबाट म्याद थप गरी अनुसन्धान गरिरहेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
