पोखरा- आसन्न १३औं दक्षिण एशियाली खेलकूद सागका लागि पोखरामा ८ सय ४० खेलाडी सहभागी हुने भएका छन्। यसअघि आर्चरीमा भारत सहभागी नहुने जनाएकाले ८ सय २४ खेलाडीमात्रै पोखरा आउने तय भएकोमा अन्तिम समयमा भारत पनि सो खेलमा भाग लिने भएपछि खेलाडी सङ्ख्या बढेको १३औँ साग प्राविधिक समितिका सचिव बलराम लामाले जानकारी दिए।
आर्चरीका लागि ८ पुरुष र ८ महिला खेलाडी भारतबाट आउने भएका छन्। आर्चरीको १० स्वर्ण पदकका लागि भारतसहित, नेपाल, बङ्गलादेश, पाकिस्तान, भुटान र श्रीलङ्काले प्रतिस्पर्धा गर्ने भएका छन्।
पोखरामा हुने आर्चरी, भारोत्तोलन, ह्याण्डबल, फुटबल, बिच भलिबल, ट्राइयाथोलन, ब्याडमिन्टन र महिला क्रिकेट खेलमा प्रतिस्पर्धाका लागि पुरुषभन्दा महिला खेलाडीको सङ्ख्या बढी छ। आठ खेलका लागि ४ सय ९ जना महिला र ३ सय २९ जना पुरुष खेलाडी सहभागी हुने छन्।
भारतबाट पाँच खेलको लागि १ सय ८० जना खेलाडी तथा अफिसियलको सहभागिता रहने छ, जसमा ४९ जना पुरुष, ६९ जना महिला खेलाडी तथा २५ जना अफसियल रहेका छन्। भारतले महिला क्रिकेटमा भने सहभागिता जनाएको छैन।
माल्दिभ्सबाट पाँच खेलमा १ सय ३६ खेलाडी तथा अफियलको सहभागिता रहेको छ ,जसमा पुरुष ४१, महिला ६१ र ३४ अफिसियलको सहभागिता रहेको छ। माल्दिभ्सले आर्चरी, भारोत्तोलन र ट्राइयाथोलनमा सहभागिता जनाएको छैन।
बङ्गलादेशबाट ६ खेलको लागि खेलाडी तथा अफिसियल गरी १ सय ५० जनाको सहभागिता रहेको छ जसमा पुरुष ५९ जना, महिला ५५ र ३६ जना अफिसियल रहेका छन्। बङ्गलादेशले महिला फुटबल र ट्राइयाथोलनमा सहभागिता जनाएको छैन।
पाकिस्तानबाट ५ खेलमा ९४ जना खेलाडी तथा अफिसियलको सहभागिता रहेको छ, जसमा पुरुष ३८ जना, महिला ३५ र अफिसियल २१ जनाको सहभागिता रहेको छ । पाकिस्तानले महिला फुटबल, महिला क्रिकेट र ट्राइयाथोलनमा सहभागिता जनाएको छैन।
श्रीलङ्काबाट ८ खेलमा १ सय ७५ जना खेलाडी तथा अफिसियलको सहभागिता रहेको छ। पुरुष खेलाडी ६१, महिला खेलाडी ८१ र अफिसियल ३३ जनाको सहभागिता रहेको छ।
भुटानबाट ४ खेलको लागि खेलाडी तथा अफिसियल गरी ४२ जनाको सहभागिता रहेको छ। जसमध्ये पुरुष २९, महिला ६ तथा अफिसियल ७ जनाको सहभागिता रहेको छ। प्रतियोगितामा सबैभन्दा कम सहभागिता भूटानको रहेको छ। भूटानले ह्याण्डबल, महिला फुटबल, बिच भलिबल र ट्राइयाथोलनमा सहभागिता जनाएको छैन।
पोखरामा ९ खेल हुने भनिए पनि नेपालले स्वर्णपदकको आश गरेको प्याराग्लाइडिङ भने नहुने भएको छ। सागमा २७ खेल हुने भनिए पनि २६ खेलमात्र हुने भएको छ। यसमध्ये पोखरामा ८ खेल हुनेछ। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
