जनकपुर- जनकपुरधाममा हुन लागेको दक्षिण एशियाली खेलकुद (साग) प्रतियोगितास्थल धनुषा जिल्ला खेलकुद विकास समितिको कवर्ड हलमा संसदीय समितीले सोमबार निरीक्षण तथा अनुगमन गरेको छ।
प्रतिनिधिसभा सांसद जीवनराम श्रेष्ठको संयोजकत्वमा गठित ओलम्पिक कमिटीको टोलीले सोमबार जनकपुरधाम १३ पिडारीस्थित कवर्ड हल पुगेर अनुगमन तथा निरीक्षण गरेका हुन्।
सांसदहरू जीवनराम श्रेष्ठ संयोजक, गजेन्द्र बहादुर महत, नमिता चौधरी र राष्ट्रिय खेलकुद परिषदका उपाध्यक्ष पिताम्बर तिमल्सिना, संसदीय समिती सचिव पुष्पराज खनाल, नेकपाका केन्द्रिय सदस्य श्रीप्रसाद साहलगायतको टोलीले स्थलगत अनुगमन गरेका हुन्।
अनुगमन गर्दै संयोजक सांसद जीवनराम श्रेष्ठले देशकै गौरवको रुपमा पहिलो पटक उपत्यका बाहिर हुन लागेको खेलको लागि सम्पूर्ण तयारी कार्यक्रम हुने मितिसम्म सम्पन्न हुने बताए। उनले भने‚ ‘अहिले द्रुत गतिमा काम भइरहेकाले लगभग ९० प्रतिशत काम सम्पन्न भएको पाएको छु,’ खेल हुने कवर्ड हलको क्षमता कम भएको तर दर्शकहरुको चाप बढी हुने अनुमान गरिएकाले ठुलो ठुलो स्क्रिनमा बाहिर कसरी प्रदर्शन गर्न सकिन्छ भन्नेबारेमा व्यवस्था मिलाउन व्यवस्थापनलाई निर्देशन दिएको खेलकुद परिषदका उपनिर्देशक बाबुराम नेपालले जानकारी दिए।
यसैबीच, संसदीय टोलीले जनकपुरमै प्रदेश २मा करिब साढे ६ अर्बको लगानीमा निर्माण हुन लागेको श्री रामजानकी अन्तराष्ट्रिय रंगशाला रजौलको समेत अनुगमन गरेका छन्। रंगशाला निर्माण अभियन्ता दिनेश पूर्वेका अनुसार ५ सय १ मिटरको धनुष आकारमा निर्माण हुने रंगशालामा ५ हजार ५ सय सिट क्षमता हुनेछ, स्विमिङ्गपुलमा ३ हजार ५ सयलगायत ६५ हजार दर्शक अट्ने क्षमता हुने रंगशलाको निर्माण १७ बिघा जमिनमा ६ अर्ब उन्नाइस करोड १८ लाख ६ हजार ५ ससय १२ रुपैयाँको प्रस्ताव गरिदिन युवा तथा खेलकुद मन्त्रालयको खेलकुद प्रवर्धन शाखाले अर्थ मन्त्रालयमा प्रस्ताव समेत पेश गरि सकेको छ।
जनकपुरमा साग प्रतियोगिताको तयारी अन्तिम चरणमा
जनकपुरधाममा हुन लागेको दक्षिण एशियाली खेलकुद (साग)को तयारी अन्तिम चरणमा पुगेको छ।
आउँदो मंसिर १५ गतेदेखि नेपालमा हुन लागेको साग प्रतियोगिता जनकपुरधाममा २० गतेदेखि २३ गतेसम्म आयोजना हुनेछ। जसका लागि खेल हुने स्थलहरुमा भौतिक पूर्वाधार निर्माण लगायतका कार्यहरु अन्तिम चरणमा पुगेको छ।
आठौँ सागपछि नेपालमा दोश्रो पटक भइरहेको १३औँ सागमा काठमाडौँ बाहेक उपत्यका बाहिर ललितपुर, पोखरा र जनकपुरधाममा समेत प्रतियोगिता हुन लागेको हो। जसमध्ये जनकपुरधाममा कुस्ति खेलको सम्पूर्ण प्रतियोगिता हुनेछ। साग अन्तर्गत हुने कुस्ति खेलको तयारीका लागि जिल्ला खेलकुद विकास समितिका खेलाडीहरु अहोरात्र खटिरहेका छन्।
जनकपुरधाममा पहिलो पटक सात देश सम्मिलित साग प्रतियोगिता हुन लागेकोले यो अवसरलाई राम्ररी प्रयोग गर्न समिति दिनरात खटेको जिल्ला खेलकुद विकास समितिका अध्यक्ष कमल चौधरीले बताए।
अध्यक्ष कमल चौधरीका अनुसार यहाँ कबड्डी र कुस्ति दुई खेल बाहेक अन्य खेलहरु पनि आयोजना गरिने योजना रहेको थियो। तर राष्ट्रिय खेलकुद परिषदले यहाँ भौतिक पूर्वाधारको अभाव रहेको भन्दै कबड्डी र कुस्तिमात्र खेलाउने निर्णय गरेको हो। सो खेलहरु जिल्ला खेलकुद विकास समितिको कवर्ड हलमा आयोजना हुनेछ।
प्रतियोगिताका लागि कवर्ड हलको मर्मत सम्भार, रंगरोगन, भौतिक पूर्वाधार निर्माण, झ्याल ढोका निर्माण, स्टेज, भिआइपी कक्षको मर्मत सम्भार लगायतका कार्यहरु ८० प्रतिशतभन्दा बढी सकिएकाले अन्तिम चरणमै रहेको अध्यक्ष चौधरीको भनाइ छ। उनले मंसिर १० गतेसम्म मर्मत सम्भारका सम्पूर्ण तयारी पुरा भइसक्ने दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
