जनकपुर- मिथिलाञ्चलको सबैभन्दा ठूलो उत्सवहरु मध्येको विवाहपञ्चमी महोत्सव मंगलबारदेखि भव्य रुपमा सुभारम्भ हुँदैछ।
मंसिर शुक्ल पञ्चमीका दिन त्रेतायुगमा भगवान राम र सीताको विवाह भएको सम्झनामा प्रत्येक वर्ष जनकपुरधाममा विवाहपञ्चमी महोत्सव धुमधामका साथ मनाइने गरिन्छ। यस पटक विवाहपञ्चमी महोत्सवका लागि भव्य तयारी गरिएको जानकी मन्दिरका उत्तराधिकारी महन्थ रामरोशनदास वैष्णवले बताए।
यस वर्ष भारतको सर्वोच्च अदालतले अयोध्यामा राम मन्दिर निर्माणको पक्षमा फैसला सुनाएपछि श्रद्धालु भक्तजनहरु भारी संख्यामा सहभागी हुने उनको भनाइ छ। उनका अनुसार यसपटक अयोध्याबाट ५ सयको संख्यामा जन्ती आउने छन्। बिहिबारबाट नै अयोध्याबाट प्रस्थान गरेको जन्ती मंसिर ११ गते साँझसम्म जनकपुरधाम आइपुग्ने सोमबार जानकी मन्दिरमा आयोजित पत्रकार सम्मेलनमा उत्तराधिकारी महन्थ रामरोशन दासले बताए।
जन्तीमा सहभागीहरुलाई जानकी मन्दिरले मंसिर १३ गते औपचारिक कार्यक्रम गरेर तिलकोत्सव महोत्सवमा स्वागत गर्ने उत्तराधिकारी महन्थ वैष्णवले बताए। विवाहपञ्चमी महोत्सवको प्रमुख अतिथिको रुपमा राष्ट्रपति विद्यादेवी भण्डारी सहभागी हुन लागेको उत्तराधिकारी महन्थ वैष्णवले जानकारी दिए।
उनी मंसिर १३ गते विवाहपञ्चमी महोत्सवमा सहभागी हुनका लागि जनकपुरधाम आउन लागेकी हुन्। भारतको अयोध्याबाट आउने जन्तीहरुलाई राष्ट्रपति भण्डारीले रंगभूमि मैदानमा आयोजना हुने एक कार्यक्रमका बिच स्वागत गर्ने छिन्। जनकपुरधाममा हुने सप्ताहव्यापी विवाहपञ्चमी महोत्सवका लागि जानकी मन्दिर तयारी अन्तिम चरणमा रहेको उत्तराधिकारी महन्थ वैष्णवले जनाकारी दिए।
विवाहपञ्चमी महोत्सवका लागि जानकी मन्दिरलाई सजाउने देखि लिएर विभिन्न कार्यक्रमको तयारी गर्नमा जानकी मन्दिर प्रशासन लागेको छ। मंगलबारबाट सुरु हुन लागेको सप्ताहव्यापी विवाहपञ्चमी महोत्सवका लागि जानकी मन्दिरले १ सय ५१ सदस्यीय मूल समारोह समिति समेत गठन गरेको छ।
प्रशासनले विभिन्न उपसमिति बनाएर मन्दिर महोत्सवलाई भव्यता प्रदान गर्ने तयारीमा रहेको छ। एक सातासम्म मनाइने विवाहपञ्चमी महोत्सव अन्तर्गत मंगलबार नगर दर्शनबाट सुरु हुने छ। दोस्रो दिन फूलवारी लिला, तेस्रो दिन धनुष यज्ञ, चौथो दिन तिलकोत्सव, पाँचौँ दिन मटकोर, छैठौँ दिन स्वयम्बर एवं विवाह र सातौँ दिन राम कलेवा विधिसँगै महोत्सव सम्पन्न हुनेछ।
जन्तीलाई स्वागत गर्न जानकी मन्दिर तयार
विवाहपञ्चमी महोत्सवको सबैभन्दा ठूलो आकर्षण भारतको अयोध्याबाट आउने जन्ती हो।
हुन त प्रत्येक वर्ष अयोध्याबाट विवाहपञ्चमी महोत्सवमा जन्तीहरु सहभागी हुने गर्छन् तर प्रत्येक ५ वर्षमा अत्याधिक संख्यामा त्यहाँबाट जन्ती आउने गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
