सिओल– दक्षिण कोरियाका राष्ट्रपति मुन–जाए इनको विशेष दूतका रुपमा दक्षिण कोरियाका राष्ट्रिय सुरक्षा सल्लाहकारले उत्तर कोरियाको भ्रमण गर्ने भएका छन्।
दक्षिण कोरियाली राष्ट्रपतिको कार्यालय ब्ल्यु हाउसलाई उद्धृत गर्दै दक्षिण कोरियाको सरकारी समाचार समिति, योनहापले आइतबार सम्प्रेषण गरेको समाचारमा सोमबार नै पाँच सदस्यीय एक प्रतिनिधिमण्डलले उत्तरको भ्रमण गर्ने बताएको छ। सो भ्रमण दलमा दक्षिण कोरियाको गुप्तचर विभागका प्रमुख पनि रहने बताइएको छ।
दक्षिण कोरियाली राष्ट्रपति इनका राष्ट्रिय सुरक्षा सल्लाहकार चुङ यी योङ्को नेतृत्वमा रहने भ्रमण दलमा पाँच अन्य अधिकारीहरु रहेका छन्।
उत्तर कोरियाले दुई देशबीच उच्चस्तरीय बैठकका लागि प्रस्ताव गरिसकेको छ। तर बैठक अहिले नै गर्नु अलिक चाँडो हुनसक्ने प्रतिक्रिया राष्ट्रपति इनले दिएका थिए।
हालै मात्र पनि उत्तर कोरिया दक्षिण कोरियासँग विना शर्त वार्ता गर्न इच्छुक रहेको कुरा बाहिर आएको थियो। तर त्यस विषयमा दक्षिणको कुनै प्रतिक्रिया भने आएको छैन।
यही फेब्रुअरी ९ देखि २५ सम्म दक्षिण कोरियामा सम्पन्न भएको शीतकालीन ओलम्पिक खेलकूदमा यी दुई देशका प्रतिनिधि तथा खेलाडीको सहभागिताबाट कोरियाली सम्बन्धमा पछिल्लो समयमा केही सुधार आएको महसुश गरिएको छ।
ओलम्पिक खेलकूदको उद्घाटन समारोहका क्रममा उत्तर कोरियाले आफ्नो देशका तर्फबाट उच्चस्तरीय प्रतिनिधि दक्षिण कोरिया पठाएको थियो। ती प्रतिनिधिहरुबाट भएका वार्ता र भ्रमण आदानप्रदानबाट यी दुई देशबीच सम्बन्धमा सुधार आएको पाइएको समाचारमा जनाइएको छ।
यसै खेलकूदका समयमा विकसित सम्बन्धका कारण उत्तर कोरियाको उच्चस्तरीय सरकारी प्रतिनिधिमण्डलले अमेरिकी अधिकारीसँग पनि भेटवार्ता गर्न चाहेको समाचार पनि हालै सार्वजनिक भएको थियो।
केही दिन अघिमात्र पनि दक्षिण कोरियाली राष्ट्रपति इन र अमेरिकी राष्ट्रपति डोनाल्ड ट्रम्पबीच फोनवार्ता भएको थियो।
सो वार्ताका क्रममा कोरियाली राष्ट्रपति मुनले उक्त ओलम्पिक खेलकूद, त्यसको समापन, सो खेलकूदका कारण उत्तर र दक्षिण कोरियाबीच बढ्दो सम्बन्ध र पछिल्लो कार्यकारी तहका अधिकारीहरुबीचको वार्तामा भएको प्रगतिका बारेमा जानकारी गराएका थिए।
सो फोनवार्ताका क्रममा उनीहरुबीच उत्तर कोरियालाई निशस्त्रीकरणका लागि सहमत गराउने र शान्ति वार्ताका लागि आवश्यक पहल गर्ने विषयमा पनि कुराकानी भएको दक्षिण कोरियाली राष्ट्रपतिको कार्यालय ब्ल्यु हाउसले जनाएको छ।
दक्षिण कोरियामा आयोजना भएको शीतकालीन ओलम्पिकका कारण उत्तर र दक्षिण कोरियाका साथै उत्तर कोरियाको अन्य देशसँगको सम्बन्धमा पनि सुधारको संकेत देखिएको अनुमान गरिएको छ। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
