भैरहवा- भैरहवामा रहेको भीम अस्पतालमा अत्याधुनिक आकस्मिक भवन (इमरजेन्सी ब्लक) निर्माण हुने भएको छ। लीलाराम कुन्तीदेवी न्यौपाने प्रतिष्ठान काठमाडाैं– ७ सिफलचौरको सहयोगमा भवन निर्माण हुने भएकाे हाे।
यसअघि २४ घण्टे फार्मेसी सेवा सुरु भएको अस्पतालमा अत्याधुनिक आकस्मिक भवन बनाउन लागिएकाे हाे। आकस्मिक भवनको शुक्रबार लीलाराम कुन्तीदेवी न्यौपाने प्रतिष्ठानका संरक्षक कुन्तीदेवी न्यौपानेले शिलान्यास गरिन्।
शिलान्यास कार्यक्रममा बोल्दै प्रदेश ५ सरकारका सामाजिक विकासमन्त्री सुदर्शन बरालले सरकारी अस्पतालमा उपचार सम्भव छ भन्ने विरामीको मनोबल बढाउन मन्त्रालयले विभिन्न कार्यक्रमहरु अगाडि बढाएको बताए। उनले तीनै तहका सरकारले उपचारात्मक सेवालाई सबै नागरिक समक्ष पुर्याउनुपर्ने बताए।
सबै जिल्ला अस्पतालमा कम्तीमा ४ बेड आइसियू सेट गर्ने योजनाका लागि चाहिने जनशक्ति र उपकरणका बारेमा अध्ययन भइरहेको उनले बताए। प्रदेश ५ का १२ जिल्लामा रहेको स्वास्थ्यसँग सम्बन्धित प्रतिष्ठानलाई एकीकृत योजनाको साथ अगाडि बढाइएको मन्त्री बरालको भनाइ थियो।
प्रतिष्ठानले स्वास्थ्य सेवामा पहुँच नभएका नागरिकहरुलाई पनि न्यूनतम सेवा सुविधा पुर्याउने उद्देश्यले भवन निर्माण गर्न लागेको संस्थाका अध्यक्ष शोभाखर न्यौपानेले बताए। भवन निर्माण गर्न करिब १ करोड ५० लाख रुपैयाँ, उपकरणका लागि ७० देखि ९० लाख रुपैयाँ लाग्ने प्रतिष्ठानका महासचिव विष्णुप्रसाद न्यौपानेले बताए।
न्याैपानेका अनुसार १ वर्षसम्म भवन निर्माण गरेर अस्पतालाई हस्तान्तरण गर्ने लक्ष्य छ। इमरजेन्सी ब्लकमा सम्पूर्ण उपकरणहरु अत्याधुनिक रहनेछन्। २ बेडसहितको आइसियु रहनेछ। जसमध्ये एउटै बेडको उपकरणसहित झण्डै १५ देखि २० लाखसम्म खर्च लाग्नेछ। हाल २ तले भवन बन्ने र पछि ५ तलेसम्म बनाउन सकिने उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
