रुपन्देही - पर्यावरणमा परेको असरले खोलाका माछा हरेक वर्ष घट्दै गएपछि रुपन्देहीका किसानले तिनाउ खोलामा माछाका भुरा राखेका छन्।
विश्व मत्स्य दिवसको अवसर पारेर रौउ र नैनी जातका १ लाख भुरा माछा खोलामा छोडिएको हो। पछिल्लो समय चुरे क्षेत्रमा भएको अत्याधिक दोहन, तराईका खोलामा हुने उत्खनन् तथा बजार र कलकारखानाबाट खोलामा बगाइने फोहोरले खोलाको पानी दुषित बनेको छ।
खोलामा प्रदुषण बढेपछि त्यसको असर माछामा देखिएको प्रधानमन्त्री कृषि आधुनिकीकरण कार्यक्रम परियोजना इकाई मत्स्य सुपर जोनका अधिकृत रमेश जेशवालले बताए।
विश्व मत्स्य दिवसको अवसरमा मत्स्य सुपर जोन, मत्स्य व्यवसायी संघ रुपन्देही लगायतका संघ सस्थाहरुले बिहीबार पश्चिमअमुवामा र्याली समेत निकालेका थिए।
स्थानीय जनप्रतिनिधि, माछा किसान, व्यवसायी, कर्मचारी, विद्यार्थी र पत्रकार सहितको र्यालीद्वारा बजार परिक्रमा गरी तिनाउ खोलामा माछाका भुरा राखिएको जिल्ला मत्स्य व्यवसायी संघ रुपन्देहीका अध्यक्ष दिपु भुषालले बताए।
विसं २०७० सालसम्म रुपन्देहीका दक्षिण भेगका बाजिया, कलवार ठहरे लगायतका जाति तिनाउ नदीमा माछा मारी जिविका चलाउँदै आएका थिए।
अहिले खोलामा माछा कम छन्। ‘दिनभरि माछा मार्दा पाँच किलोसम्म मार्नेले आजभोली एक किलो बनाउन सक्दैन‚’ भुषालले भने। माछा मारेर जीविका चलाउनेलाई कम्तिमा हामीले राखेको भुराले १ वर्षपछि फेरी सजिलो हुनेछ भनेरै भुरा खोलामा राखिएको उनले बताए।
माछालाई खोलामा बाँच्न सक्ने गरी खोलालाई सफा राख्न सबै स्थानीयसँग रुपन्देहीका किसानले आग्रह गरेका छन्। यसरी खोलामा छाडिने भुरा दुषित पानीमा बाँच्न कठिन हुने जानकार बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770205330.png)
-1764146706.png)
