काठमाडौं- राष्ट्रिय, क्षेत्रीय, अन्तर्राष्ट्रिय तथा विश्वस्तरका समसामयिक एवं साझा चासोका विषयमा नेपालमा विश्वस्तरको संवाद सञ्चालन गर्ने उद्देश्यले सगरमाथा संवाद सचिवालय स्थापना गरिएको छ।
नारायणहिटी दरबारको पश्चिम ढोकास्थित राहदानी विभाग परिसरमा स्थापना भएको उक्त सचिवालयको परराष्ट्रमन्त्री प्रदीपकुमार ज्ञवालीले बुधबार उद्घाटन गरेका छन्।
सचिवालयको जिम्मेवारी परराष्ट्र मन्त्रालयको नीति, योजना महाशाखाका प्रमुख कुमारराज खरेलले सम्पादन गर्नेगरी तोकिएको छ। परराष्ट्रमन्त्री ज्ञवालीले बुधबार सगरमाथा संवादको सफल एवं सार्थक आयोजना गर्ने सन्दर्भमा नेपालको विकासका साझेदारहरुसँग विचारविमर्श गरेका छन्।
मन्त्री ज्ञवालीसहित वन तथा वातावरणमन्त्री शक्तिबहादुर बस्नेत र अर्थमन्त्री युवराज खतिवडा उपस्थित बैठकमा काठमाडौँस्थित कूटनीतिक नियोगहरु, अन्तर्राष्ट्रिय तथा क्षेत्रीय सङ्घ–सङ्गठनहरुसँग गहन छलफल भएको थियो।
मन्त्री ज्ञवाली सगरमाथा संवाद निर्देशक तथा आयोजक समितिका संयोजक हुन् भने मन्त्रीद्वय बस्नेत र खतिवडा सदस्य रहेका छन्।
बैठकमा सहभागी नेपालको विकास साझेदार तथा कूटनीतिक नियोगका प्रमुख एवं पदाधिकारीले जलवायु परिवर्तन, पर्वतीय वातावरण र मानव जातिको भविष्य विषयमा पहिलोपटक आयोजना हुन लागेको सगरमाथा संवादलाई सफल तुल्याउन आ-आफ्नातर्फबाट सक्दो सहयोग गर्ने प्रतिबद्धता व्यक्त गरेका थिए। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770205330.png)
-1764146706.png)
