काठमाडौं- विभागीय त्रिभुवन आर्मी क्लबलाई पराजित गर्दै ब्रिगेड ब्वाइज क्लब (बीबीसी) राजधानीमा जारी तेस्रो संस्करणको चन्द्रागिरी मेयर गोल्डकप फुटबल प्रतियोगिताको सेमिफाइनलमा प्रवेश गरेको छ।
चन्द्रागिरी नगरपालिकास्थित नैकाप फुटबल मैदानमा बिहीबार भएको खेलमा बीबीसीले आर्मीलाई १–० ले पराजित गर्दै सेमिफाइनलमा प्रवेश गरेको हो। बीबीसीले खेलको ३०औं मिनेटमा विदेशी खेलाडी उदे ग्लोरीको गोलबाट खेलमा अग्रता बनाएको थियो। त्यही गोल नै बीबीसीको जितमा निर्णायक बन्यो।
पहिलो हाफमा बीबीसीले आर्मीलाई दवावमा राखेको थियो। १५औं मिनेटमा ग्लोरीले नै पहिलो पोस्ट आक्रमण बुनेको थियो। १९औं मिनेटमा कप्तान जय गुरुङको प्रहार पोस्टबाट थोरै बाहिरिएको थियो। ३०औं मिनेटमा विदेशी खेलाडी ग्लोरीले कर्नर क्षेत्रबाट ३ डिफेन्डरलाई बिट गर्दै पहिलो बारमा गोल गर्दा आर्मीका गोलरक्षक विश्वास चौधरीले रोक्ने कुनै मौका नै पाएन।
एक गोलले पछि परेपछि आर्मीले सुधारिएको खेल पस्केपनि गोल गर्न नसक्दा पहिलो खेलबाटै घर फर्किन बाध्य बन्यो। आर्मीले दोस्रो हाफमा लगातार पोस्ट आक्रमण बुनेपनि गोलरक्षक बिशाल सुनुवार बाधक बन्यो।
अब बीबीसीले सेमिफाइनलमा पुलिस र च्यासल युथ क्लबीचको विजेतासँग मंसिर १० मा खेल्नेछ। पुलिस र च्यासलबीच ७ मंसिरमा क्वाटरफाइनल खेल हुनेछ। प्रतियोगितामा शुक्राबार दोस्रो क्वाटरफाइनलमा फ्रेन्डस र रुस्लान थ्री स्टार क्लबबीच खेल हुनेछ। खेल दिउँसो २ः३० बजेपछि हुनेछ।
विजेताले ६ लाख ५० हजार रुपैयाँ पाउनेछ। दोस्रो हुनेले ३ लाख ५० हजार रुपैयाँ पाउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
