काठमाडौं- २०७४ मंसिरमा भएको निर्वाचनमा दोलखा जिल्लाबाट प्रतिनिधिसभा सदस्यमा प्रत्यक्षतर्फ पार्वत गुरुङ विजयी भए। गुरुङ नेपाली काँग्रेसका प्रतिस्पर्धी रुद्रबहादुर खड्कालाई ३० हजार मतान्तरले पराजित गरेका थिए।
प्रतिनिधिसभाको निर्वाचनमा उनले नेकपातर्फबाट ५५ हजार ४ सय ५७ मत ल्याएका थिए।
सर्वाधिक मतान्तरबाट विजयी भएका गुरुङ निर्वाचनपछि तत्कालै गठन हुने भनिएको मन्त्रीमण्डलमा नै सदस्य हुने चर्चा थिए।
तत्कालीन समयमा उनलाई कानुन र भौतिक पूर्वाधार मन्त्रालय दिने चर्चा चलेपनि उनी पर्न सकेका थिएनन्।
तर तेस्रो पटक मन्त्रीमण्डल पुनर्गठन हुदाँ उनी महिला बालबालिका तथा जेष्ठ नागरिकमन्त्री हुन सफल भएका छन्।
मन्त्री थममाया थापालाई बिदाई दिँदै प्रधानमन्त्री ओलीले गुरुङलाई उक्त मन्त्रालयको जिम्मेवारी दिएका हुन्।
गुरुङ प्रधानमन्त्री केपी शर्मा ओली निकट मानिन्छन्। त्यस्तै नेकपा संसदीय दलका उप नेता सुवास नेम्बाङसँग पनि राम्रो सम्बन्ध भएको मानिन्छ।
दोलखाबाट नेकपा एमालेको सांसदको रुपमा अघिल्लो पटक पनि निर्वाचित भएका गुरुङ दुवै पार्टी एक भएर नेकपा बनेपछि झनै शक्तिशाली भएका थिए।
२०२५ सालमा दुर्गम क्षेत्र दोलखाको सुरीमा जन्मेका गुरुङ व्यवस्थित संगठन, वामगठबन्धनको प्रभाव र उनको लोकिप्रियताका आधारमा सबैभन्दा धेरै मतान्तरले निर्वाचन जित्न उम्मेदवार बनेका थिए।
मकरध्वज गुरुङ र आमा जीतमाया गुरुङबाट जन्मिएका उनले २०३७ सालदेखि राजनीति सुरु गरेका हुन्।
२०७० सालमा संविधानसभा सदस्यमा निर्वाचितपछि दोलखाको राजनीतिमा जमेका छन्।
ज्यान मार्ने उद्योगमा पक्राउ पुर्जी
सत्तारुढ नेपाल कम्युनिस्ट पार्टी (नेकपा)का सांसद रहेको समयमा गुरुङ विरुद्ध जिल्ला अदालत काठमाडौंले ३५ दिने म्याद जारी गरेको रहस्य असोज २९ गते सार्वजनिक भयो।
काठमाडौँ जिल्ला अदालतमा विचाराधीन रहेको मुद्दामा बयान दिनका लागि ३५ दिने म्याद जारी भएको थियो।
अदालतको म्याद जारी भएको एक महिना बितिसक्दा पनि गोप्य भनिएको विषय सार्वजनिक भएपछि उनी कात्तिक ३ गते जिल्ला अदालतमा हाजिर भएका थिए।
जिल्ला अदालतले उनको बयान गराई साधारण तारेखमा रिहा गर्ने आदेश गरेको थियो।
सांसद गुरुङसहित ७ जनाविरुद्ध अदालतले म्याद जारी गरेको थियो। उनीहरूमाथि निर्वाचनका समयमा एक व्यक्तिमाथि ज्यान मार्ने उद्देश्यले सांघातिक आक्रमण गरेको भन्दै मुद्दा दायर भएको थियो।
गुरुङविरुद्ध दोलखाका वीरध्वज खड्काले किटानी जाहेरी दिएका थिए।
उक्त जाहेरीका आधारमा नेकपाका केन्द्रीय सदस्यसमेत रहेका सांसद गुरुङसहित ७ जनाविरुद्ध २९ वैशाख ०७६ मा काठमाडौँ जिल्ला अदालतमा कर्तव्य ज्यान मुद्दा दायर भएको थियो।
सो मुद्दामा सुनुवाई गर्दै अदालतले बयानका लागि बोलाएको हो।
२०७४ वैशाखमा भएको स्थानीय निर्वाचनमा खड्कामाथि काठमाडौँमा आक्रमण भएको थियो।
त्यसमा गुरुङ पनि संलग्नता भएको भन्दै उनीविरुद्ध खड्काले ज्यान मार्ने उद्योगमा जाहेरी दिएका थिए।
याे पनि:
ज्यान मार्ने उद्योग आरोपमा नेकपा सांसद पार्वत गुरुङविरुद्ध ३५ दिने म्याद जारी
सांसद पार्वत गुरुङलाई साधारण तारखेमा छाड्न अदालतको आदेश
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
