राजविराज- आय-व्यय विवरण सार्वजनिक गर्न माग गर्दै सप्तरीको विष्णुपुर गाउँपालिका १, खुरहुरीया स्थित जनता माद्यमिक विद्यालयमा बुधबारदेखि रिले अनसन सुरु भएको छ। विद्यालय व्यवस्थापन समितिका सदस्य र अभिभावकहरू रिले अनसनमा बसेका छन्।
विद्यालय व्यवस्थापन समितिका सदस्यहरू रामनारायण यादव, सञ्जीव यादव तथा अभिभावकहरू उमेश नारायण यादव, झवर यादव र सातैन यादव अनसनमा छन्। सदस्य सचिव समेत रहेका प्रअ र अध्यक्षसहित ९ जनाको समितिमा ७ जना सदस्य आन्दोलनको पक्षमा रहेको विद्यालय व्यवस्थापन समितिका पूर्व अध्यक्ष दिलिप कुमार यादवले बताए।
विद्यालयका प्रधानाध्याक सूर्यनारायण यादवले आव ०७२/०७३ देखि लगातार तीन आर्थिक वर्षको आय-व्यय सार्वजनिक नगरेपछि दबाब दिन अनसन बस्नु परेको उनको भनाइ छ। विद्यालयमा अनियमितता गरेका कारण पटक–पटक हिसाब माग गर्दा प्रअले अटेर गर्ने र उनको अटेरीमा अध्यक्ष चित्तरन्जन यादवले समेत साथ दिने गरेको अनसनकारी सञ्जीव यादवको आरोप छ।
विद्यालयको आर्थिक अनियमितता छानबिन र हिसाब सार्वजनिक गर्न माग गर्दै मंगलबार जिल्ला प्रशासन कार्यालय सप्तरीमा निवेदन समेत दर्ता गरिएको छ। अनियमितता ढाकछोप गर्न आय-व्यय माग गर्दा अटेर गर्ने प्रअ यादवलाई कारबाही गर्न निवेदनमा माग गरिएको छ।
जिल्ला प्रशासन कार्यालय सप्तरीले भने उक्त निवेदन शिक्षा विकास तथा समन्वय इकाई राजविराजलाई पठाएको छ। निवेदनका विषयमा छानबिन तथा आवश्यक छलफल गरी समस्या समाधान गरेर जानकारी पठाउन समन्य इकाईलाई पत्राचार समेत गरिएको प्रशासन कार्यालयले जनाएको छ।
यसअघि मंसिर १ गते आन्दोलनकारीहरूले प्रधानाध्यापक, लेखा र विद्यालय व्यवस्थापन समितिका अध्यक्षको कार्यकक्षमा तालाबन्दी गरेका थिए। व्यवस्थापन समितिको पटक–पटकको निर्णय बेवास्ता गरिएको, लेखा समितिले निकालेको ८१ लाख भन्दा बढीको वेरुजु फरफराक नगरेको, प्रअको अनुपस्थिति र लापरबाहीले पठन–पाठन बिग्रँदै गएको लगायतका आरोप सहित कार्यकक्षमा तालाबन्दी गरिएको हो। विद्यालयमा करिव १ हजार ३ सय ५० विद्यार्थी अध्ययनरत छन्।
निरन्तर विवाद, पठन पाठन प्रभावित
विद्यालयमा विवाद र पढाइ प्रभावित भएको यो पहिलो घट्ना भने होइन। यसअघि गत असारमा पनि विद्यालय व्यवस्थापन समितिका पूर्व अध्यक्ष दिलिपकुमार यादव र प्रधानाध्यापक बीच विवाद भएको थियो। विवादका कारण करिव एक हप्ता विद्यालयको पढाइ प्रभावित भएको थियो।
विद्यालय व्यवस्थापन समितिको बैठक चलिरहेका बेला पूर्व अध्यक्ष यादवले विद्यालयमा प्रवेश गरी आफूमाथि दुव्र्यवहार गरेको आरोप लगाएपछि विवाद सुरु भएको थियो। पूर्वअध्यक्ष यादवले भने आफनो कार्यकालमा भएको भवन निर्माणको विषयलाई लिएर प्रअले अनर्गल प्रचार गर्न थालेपछि विवाद भएको बताउँदै आएका छन्।
आव २०६-०६९ मा आफू अध्यक्ष हुँदा २४ लाखको विद्यालय भवन बनेको र सोही भवनको हिसाब देखाउन नसकेपछि प्रअले आफूमाथि आरोप लगाउने गरेको उनको भनाइ छ।
सबै आरोप निराधार : प्रअ
प्रधानाध्याकप सूर्यनारायणले भने आफूमाथि लागेका सबै आरोप निराधार भएको बताए। १५ दिनअघि विद्यालयमा निस्किएको शिक्षकको नियुक्तिको परीक्षामा फेल भएकाहरूले आफना अभिभावहरूलाई उचालेर आन्दोलन गरेको उनको भनाइ छ।
‘आय-व्यको कुरा बाहाना मात्रै हो,’ उनले भने, ‘राहत र प्राविधिकतर्फ गरी तीन जनाको परीक्षा भएको थियो, त्यसमा फेल भएकाहरू आन्दोलनमा सहभागी छन्।’
उनीहरुले माग गरेको आयव्यको हिसाब पनि यसअघि सार्वजनिक भएकाले आन्दोलनको तुक नभएको उनको दाबी छ। ‘सामाजिक लेखा परीक्षा र लेखा परीक्षण समेत भइसकेको विषय कति पटक उचाल्ने,’ उनले थपे, ‘यो सबै बाहानाबाजी मात्रै हो, आन्दोलनको कुनै अर्थ छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
