काठमाडौं– नेपाली राष्ट्रिय क्रिकेट टिम शनिबार राति एकदिवसीय विश्वकप छनोट प्रतियोगिता खेल्न जिम्बावेतर्फ प्रस्थान गर्दैछ। विश्वकप छनोट प्रतियोगिताका लागि नेपालले छोटो तयारी गर्न पायो। १० देशले प्रतिस्पर्धा गर्ने छनोटबाट शीर्ष २ टिम विश्वकपमा छानिनेछन्। छनोटमा सहभागी नेपालसहित ५ एसोसिएट देशमध्ये ३ देशले एकदिवसीय टिमको मान्यता पाउनेछन्। त्यसैले नेपालका लागि प्रतियोगिता महत्वपूर्ण हुनेछ। जिम्बावे उड्नुअघि नेपाली टिमका कप्तान पारस खड्काले पनि एकदिवसीय मान्यताका लागि प्रतिस्पर्धा गर्ने बताएका छन्। खड्कासँग लिएको अन्तर्वार्ता विस्तृतमा:
आइसिसी एकदिवसीय विश्वकपका लागि केही दिन मात्र तयारी भयो। पर्याप्त तयारी हुन नसकेको हो?
अलि धेरै सयम भएको भए योजना बनाउन सजिलो हुन्थ्यो। तर, हामीसँग कम समय थियो। सकारात्मक कुरा के हो भने, हामीले क्रिकेट खेलिरहेका छौं। त्यसैले लय समाप्न सक्छौं। डिभिजन–२ मा हामीले जुन स्तरको क्रिकेट खेल्यौं त्यही स्तरको प्रदर्शन दोहोर्याुउने हो भने हामीले छनोट प्रतियोगितामा राम्रो नतिजा ल्याउन सक्छौं।
नेपाल रहेको समूहमा बलिया टिम छन्। बलिया टिमसँग प्रतिस्पर्धाका लागि कस्तो रणनीति छ?
छनोट प्रतियोगिता सजिलो छैन। हरेक टिमको लक्ष्य विश्वकपसम्म पुग्नु हो। तर जम्मा २ वटा टिम मात्र पुग्नेछन्। हरेक टिम उतिकै राम्रा छन्। विश्व क्रिकेट लिग च्याम्पियनसिपबाट छानिएका शीर्ष चार टिम, चार वटा टेस्ट प्लेइङ राष्ट्र र डिभिजन–२ बाट नेपाल र युएइ पुगेका छन्। प्रतियोगिता रोचक हुने पक्का छ।
विश्व क्रिकेटमा एसोसिएट राष्ट्रले पनि चुनौती दिन थालेका छन्। विगतमा अफगानिस्तान एसोसिएट राष्ट्र हुँदा राम्रो खेलेको थियो। आयरल्यान्डले पनि राम्रो खेल पस्केको थियो।
सबै टिम उत्तिकै सक्षम छन्। यो प्रतियोगिताबाट राम्रा २ टिम छनोट हुनेछन्। आइसिसीलाई पनि यो प्रतियोगिताले विश्वकप १० भन्दा बढी राष्ट्रको हुनुपर्छ भन्ने सन्देश जानेछ।
जिम्बावेसँग हामीले पहिलो पटक खेल्दैछौं। अरुसँग खेलिसकेका छौं। प्रतिद्वन्द्वीलाई नेपालले कसरी लिएको छ?
हामी यस्तो स्तरमा पुगिसक्यौं जहाँ सजिलो भन्ने केही पनि छैन। सबै टिमको बलियोदेखि कमजोर पक्षबारे थाहा छ। जुन दिन हामी प्रतिस्पर्धा गर्छौं, त्यो दिन रणनीति कति लागू हुन्छ त्यो महत्वपूर्ण हुन्छ। हामीले राम्रो क्रिकेट खेल्नुपर्छ। पहिला जस्तो बलिङ र फिल्डिङले मात्र जित्ने हुनु हुँदैन। हामीले ब्याटिङ, बलिङ र फिल्डिङ तीनै क्षेत्रमा राम्रो गर्नुपर्छ।
प्रतियोगितामा हाम्रो लक्ष्य के हो?
विश्वकपमा छनोट हुन सके सबैभन्दा ठूलो क्षण हुनेछ। तर, अहिलेका लागि हाम्रो पहिलो लक्ष्य सुपर सिक्समा पुग्ने हुनेछ। त्यहाँ पुगेपछि हामीले विश्वकपको सपना देख्न सक्छौं । तर, विश्वकपमा २ वटा मात्र टिम छानिने भएकाले सजिलो हुनेछैन।
विश्वकपका लागि कतिपय टिमले २ वर्षदेखि तयारी गरिरहेका छन्। त्यसैले अहिलेका लागि लक्ष्य भनेको एकदिवसीय मान्यता र सुपरसिक्स हो। त्यसपछि हामीले विश्वकपको सपना देख्न सक्छौं।
यसका लागि राम्रो क्रिकेट खेल्नुपर्छ। नखेलेसम्म केही थाहा हुन्न। पछिल्लो पटक हामीले अफगानिस्तानलाई पनि हराइसकेका छौं। आशा छ हामीले फेरि त्यो प्रदर्शन दोहोर्याफउन सकौं।
हामीले सन् २०१४ पछि सबैभन्दा माथिल्लो लेभलको क्रिकेट खेल्दैछौं। स्कटल्यान्ड, हङकङ र जिम्बावे राम्रो टिम हुन्। बटम लाइन भनेकै हामीले राम्रो क्रिकेट खेल्नै पर्छ।
सन् २०१४ को छनोट प्रतियोगितामा हामीले खराब प्रदर्शन गरेका थियौं। विगतको छनोटबाट के–के सिक्यौं?
पछिल्लो पटक हाम्रा धेरै खेलाडी घाइते थिए। ३–४ जना मुख्य खेलाडी घाइते भएपछि गाह्रो भयो। अर्कोतर्फ हामी त्यो लेभलका लागि अनुभवी थिएनौं जस्तो लाग्यो। पहिलो पटक डिभिजन१ का टिमसँग प्रतिस्पर्धा गर्दा गाह्रो भएको थियो।
तर, सन् २०११ को टी–२० छनोटदेखि हाम्रो प्रदर्शन सुधार हुँदै आएको छ। हामीले आफ्नो लेभलको टिमसँग ३ वर्ष क्रिकेट खेलिरहेका छौं। राम्रो टिमसँग र राम्रो प्रतियोगितामा भाग लिइरहेका छन्। पहिलाको छनोट र अहिलेको छनोटको फरक भनेको हामीले एक्सपोजर बढी पाएका छौं।
पहिलो खेलमा आयोजक जिम्बावेसँग खेल्दैछौं। कतिको दबाब छ?
हामी उत्साहित छौं। पछिल्लो पटक हामीले २००८ को यू–१९ विश्वकपमा मेरै कप्तानीमा जिम्बावेसँग खेलेका थियौं। त्यो बेला हामीले जिम्बावेलाई हराएका थियौं। अब सिनियर टिमसँग खेल्ने अवसर पाएका छौं। जसरी उनीहरु आफ्नो देशका लागि प्रतिनिधित्व गरिरहेका छन् हामी पनि त्यसैगरी प्रतिनिधित्व गरिरहेका छौं, जसरी होस् जिताउन कोसिस गर्छौं।
हामीमा क्षमता छ। त्यसैले राम्रो क्रिकेट खेलेर राम्रो टिमलाई चुनौती दिन्छौं।
टिममा एक जना स्पिनर थपिएका छन्। यसको कारण के होला?
कन्डिसन हेरेर हामीले स्पिनर थपेका हौं। जिम्बावेमा हामीले खेलेका त छैनौं। तर पछिल्लो रेकर्ड र कन्डिसन हेरेका छौं। अफगानिस्तान र जिम्बावेको सिरिज हेर्दा स्पिनरले एकदम राम्रो प्रदर्शन गरेका छन्। त्यसबाहेक हाम्रो समूहमा रहेको स्कटल्यान्ड फास्ट बलिङमा राम्रो खेल्ने टिम हो। हाम्रो बलियो पक्षअनुसार विपक्षीलाई च्याप्न सक्छौं भन्ने सोचले स्पिनर राखेका हौं।
पहिला गएर हामी पिच हेर्छौं। २ वटा प्राक्टिस म्याच पनि छ। यो म्याचको नजिताबाट हामीले प्लेइङ ११ छान्न सक्छौं। अहिलेको टिममा सबै खेलाडी पहिलो रोजाइमा पर्न सक्षम छन्।
पछिल्लो सयम ओपनिङ र ब्याटिङमा समस्या देखिएको थियो। यसपटक पनि ब्याटिङ र ओपनिङ नै मुख्य चुनौती हो?
ब्याटिङ र ओपनिङलाई हामी दोष दिने पक्षमा छैनौं। तथ्याङ्कले अर्कै देखाउला। तर, डिभिजन–२ मा हामीले पछ्याएको लक्ष्य अन्य टिमले पछ्याउन सकेका थिएनन्। फाइनलमा पनि हामीले राम्रो स्कोर गरेका थियौं। हाम्रो ब्याटिङ खराब होइन। तर हामीले एकै प्रकारको ब्याटिङमा भने ध्यान दिनुपर्छ।
सधैं सबैको राम्रो हुन्छ भन्ने पनि छैन। अनुभवी खेलाडी छन्। युवा खेलाडीले पनि घरेलु क्रिकेट खेलेर अनुभव बटुलेका छन्। जुन उनीहरुले डिभिजन–२ मा देखाइसकेका छन्। यो लय जिम्बावेमा पनि देखाउन सक्छौं भन्ने आशा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
