काठमाडौं- नेपाली कांग्रेसले राष्ट्रियसभाका लागि मनोनित गर्न अघिल्लो सरकारले सिफारिस गरेका तीन जना सदस्यको प्रस्तावको सम्बन्धमा चालिएको असंवैधानिक कदम सच्चाउन राष्ट्रपति विद्यादेवी भण्डारीसँग माग गरेको छ।
संविधान बमोजिम साविकको मन्त्रिपरिषद्ले गरेको निर्णयमा ढिलाई गरी नयाँ सरकारले प्रस्ताव गरेको असंवैधानिक प्रस्ताव पारित गरेको कदमप्रति गम्भिर आपत्ति जनाउँदै कांग्रेसले संविधानको संरक्षक भएकाले राष्ट्रपतिलाई असंवैधानिक कदम सच्याउन माग गरेको हो।
सिंहदरबारमा शनिबार बसेको कांग्रेसको संसदीय दलको बैठकले असंवैधानिक कदमलाई सच्याएर संविधानको पूर्ण पालना गर्न राष्ट्रपति भण्डारीलाई जोड दिने निर्णय गरेको हो।
बैठकले संसदीय दलको विधान पारित गर्दै आइतबारदेखि सुरु हुने केन्द्रीय कार्यसमिति बैठकलाई अनुमोदनका लागि पठाउने निर्णय गरेको छ।
कांग्रेस नेता मीन विश्वकर्माका अनुसार कांग्रेसको संशोधित विधानमा राष्ट्रियसभाका कांग्रेसका सदस्यले संसदीय दलको निर्वाचनमा मताधिकार बनाउने लगायतका विषय उल्लेखछ। विधानमा संघीय र प्रादेशिक संरचना अनुसार संसदीय कार्यसमिति सानो आकारको बनाउने उल्लेख छ।
त्यस्तै, बैठकले स्थानीय, प्रदेशसभा, प्रतिनिधिसभा र राष्ट्रियसभा निर्वाचन सफलतापूर्वक सम्पन्न गरेकोमा पार्टी सभापति शेरबहादुर देउवा नेतृत्वको मन्त्रिपरिषदलाई धन्यवाद ज्ञापन गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
