मुम्बई– मुम्बईको सात बडलामा सूफी गायक कैलाश खेरको ‘कैलाश स्टुडियो’ छ। जुन एशियामा गीत रेकर्डका लागि उत्कृष्ट मध्येमा पर्दछ। यो स्टुडियोमा काठमाडौंनिवासी ३४ वर्षीय निरज सिह पनि काम गर्छन्। उनी साउन्ड ईन्जिनियर हुन्। उनकै सहयोगले कैलाश खेरसँग अन्तर्वार्ता लिने समय जुट्यो। बेलाबेलामा काठमाडौं आइरहने खेरले नेपालीसँग उनको संगत पुरानो भएको सुनाए। र, उनले संघर्षका दिनमा आफूले थुप्रै नेपालीसँग संगत गर्ने अवसर पाएको बताए।
उनले नेपालीहरुसँग घुलमिल गरेर बस्दा नेपालको एउटा चर्चित गीत आफूलाई कण्ठै भएको भन्दै मिठो आवाजमा गाउन थालिहाले, ‘कान्छी हे कान्छी, कान्छीको हित बोलन, मनको कुरा खोलन, म मादल घन घन घनकाउला तिमी जुरेली जस्तै नाचन।’
शान्त स्वभावका खेरले अन्तर्वार्ताकै क्रममा नेपाली गीत संगीतको खुलेर तारिफ गरे। भने–‘नेपाली गीत संगीतको मर्म गम्भीर छ। नेपाली लोक गीतले कुनै दिन विश्व बजारमा राम्रो उपस्थिति जनाउने छ।’
उनले पनि बलिउड नायक सोनु सुदले जस्तै नेपालीहरु निकै मेहनती र इमान्दार देखेको बताउन भुलेनन्।
उनले नेपालीहरु मेहनती र इमान्दार भएका कारण विश्वको जुनसुकै ठाउँमा गए पनि सफलता हात पार्ने विश्वास गर्छन्। नेपालमा आफ्नो फ्यानहरु धेरै भएकोमा उनी निकै खुसी छन्। उनले काठमाडौंमा कार्यक्रम गर्न जाँदा श्रोताहरुले आफूलाई खुब माया गरेको स्मरण गर्न भुलेनन्। ‘म आभारी छु, मेरा सबै नेपाली फ्यानप्रति’ उनले भने।
खेरले नेपाली फिल्ममा पनि गीत गाएका छन्। उनले काठमाडौंमाथि गाएको गीत ‘सुखी–दुखी सबैको काठमाडौं’ निकै लोकप्रिय छ।
महादेव भगवानका परमभक्त खेर नेपाल पुग्ने जो कोही पनि पशुपतिनाथको देशमा पुगेर धन्य हुने विश्वास गर्छन्। ‘म बारम्बार नेपाल जान चाहन्छु,’ उनले भने।
खेर तीन पल्ट नेपाल आइसकेका छन्। उनी २०११ मा नेपाल पर्यटन वर्षको सदभावना राजदुत थिए। उनले त्यसै वर्ष नेपाली एल्बममा पनि काम गरे। उनको ‘फुलको थुङ्गा माथि मुटु’ र ‘बोल्नै पर्छ भन्ने के छ र’ गीत लोकप्रिय भएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।