काठमाडौं- स्पेनिस क्लब बार्सिलोनाका खेलाडीहरु फ्रेन्च क्लब पिएसजीमा रहेका स्टार स्ट्राइकर नेमारलाई बार्सिलोना फर्काउन आफ्नो तलब कम गर्नसमेत तयार भएका छन्। बार्सिलोना डिफेन्डर जेरार्ड पिकेले एक अन्तर्वार्तामा आफूहरु नेमारलाई फर्काउन सम्भव हुनेसम्म सहयोग गर्न तयार रहेको बताएका हुन्।
अहिले चलिरहेको नयाँ सिजन सुरु हुनुअघि नै पिएसजीबाट नेमार बार्सिलोना फर्कने खबरहरु महत्वका साथ फैलिरहेका थिए। तर, पिएसजीले नेमार बेच्न नचाहनु र बार्सिलोनामा नेमारका लागि ठूलो रकम खर्च गर्ने अवस्था नहनु उनका लागि दुःखद बनिदियो र फ्रान्समा नै अड्किएका थिए।
२०१७ को अगस्टमा फुटबल बजारका ठूला हल्ला, अनेक अनुमान र किनबेचका मोलमोलाइबीच नेमार विश्व कीर्तिमानी २ सय २२ मिलियन युरोमा बार्सिलोनाबाट पिएसजी पुगेका थिए।
पिकेले नेमार ल्याउनका लागि आफूहरु तलब कम गर्न मात्रै होइन तलब ढिलो लिन पनि तयार भएको बताएका छन्। ‘हामी हाम्रो सम्झौतामा पुनर्विचार गर्न सक्छौँ, पैसा नै दिएर सहयोग गर्न त सक्दैनौँ तर हामीले हाम्रो तलब ढिलो लिनेगरी क्लबलाई सहयोग भने गर्न सक्छौँ’ पिकेले भनेका छन्।
‘क्लबका अध्यक्ष जोसेप मारिया बर्टामेउसँग हाम्रो सम्बन्ध राम्रो नै रहेको छ, यसैले हामीले अध्यक्षलाई नेमार ल्याउनका लागि हाम्रोतर्फबाट आवश्यक सहयोग गर्न तयार रहेको बताएका छौँ’ उनले भनेका छन्।
पिकेले नेमार बार्सिलोना आउन असमर्थ भए उनी रियल मड्रिड जाने सम्भावना रहेकोसमेत बताएका छन्।
बार्सिलोनाले गएको समर ट्रान्सफरका बेला फ्रान्की डि योङ र एन्टोनियो ग्रिजम्यान जस्ता खेलाडी किनेर दुई सय मिलियन पाउण्ड भन्दा धेरै खर्च गरिसकेको छ। यसैले नेमारलाई ठूलो रकम तिरेर ल्याउँदा ‘फाइनान्सियल फेयर प्ले’ नियम तोडिने डर क्लबमा देखिन्छ।
पिएसजी छाड्न लागिपरेका नेमारले गएको ट्रान्सफरकै समयमा अपुग रकममा २० मिलियन पाउण्डसम्म आफै तिर्न पनि तयार भएका थिए। तर पनि दुई क्लबबीच सम्झौता भने हुन सकेन।
नेमारले जे सोचेर बार्सिलोना छाडेका थिए, पिएजसीमा दुई सिजन त्यो भएन। २०१४ कै विश्वकपमा ब्राजिलियन टिमको भार सम्हाल्ने जिम्मेवारी पाएका उनका लागि २०१८ को विश्वकपमा पनि भनेजस्तो हुन सकेन।
बार्सिलोनामा लियोनल मेस्सीको छायामा हराएँ कि भन्ने सोचेका नेमार पिएसजीमा पुनः केलियन एमबाप्पेको छायामा परे। पिएसजीलाई च्याम्पियन्स लिग जिताएर फुटबलमा ठूलो मानिने व्यक्तिगत अवार्ड ‘बालोना डिओर’ जित्ने उनको सोच धुमिल भयो। अहिले पनि ‘बालोन डिओर’को शीर्षभित्र मेस्सी देखिइरहँदा नेमार उसैगरी हराइरहेका छन्।
पिएसजीले चाहेको २ सय ५० मिलियन युरो तिर्न भर्खरै एन्टोनियो ग्रिजम्यान भित्र्याएको बार्सिलोनाका लागि असम्भव बनेको छ। बार्सिलोनाले केही खेलाडी दिएर रकम घटाउन गरेको प्रयास र लोनमा २०२० सम्मका लागि ल्याउने योजना पनि गएको ट्रान्सफरकै बेला तुहिएको थियो।
नेमारले बार्सिलोनालाई जसरी छाडेर गएका थिए त्यसले बार्सिलोना समर्थकमाझ पनि उनको पुरानो ‘क्रेज’ घटेको छ। नेमार पैसाको पछि लागेको, खेल र क्लबको महत्व नबुझेको, स्टारको वजन धान्न मुस्किल परेको जस्ता अनेक आरोप लगाउने समर्थकको समूह ठूलो छ। यसैले कतिपय नेमारलाई बार्सिलोनाले ल्याउँदा ठूलो खुसी या नल्याउँदा ठूलो नमजामा देखिएका छैनन्।
बार्सिलोनाका स्टार खेलाडी लियोनल मेस्सी, लुइस स्वारेजदेखि जेरार्ड पिकेसम्म नेमारको फिर्तीमा लागिपरेका कारण र क्बल सकरात्मक देखिएका कारण उनी फर्कने सम्भावना भने अझै देखिन्छ।
यो पनि पढ्नुहोस्
भित्री कथा : न बेच्नेको इच्छा न किन्नेको, बीचमा अड्किएका नेमार
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
