ट्विटरले राजनीतिक विज्ञापन हटाउने

नेपाल लाइभ | २०७६ कार्तिक १५ शुक्रबार | Friday, November 01, 2019 ०६:४४:०० मा प्रकाशित

वासिङ्टन- विश्वकै लोकप्रिय सामाजिक सञ्जाल ट्विटरले आफ्नो प्ल्याटफर्मबाट राजनीतिक विज्ञापन स्वीकार नगर्ने बुधबार घोषणा गरेको छ। राजनीतिक व्यक्तिहरुबाट सामाजिक सञ्जालमा गलत सूचना प्रवाह हुने गरेको भन्दै सबै क्षेत्रबाट चासो व्यक्त भएपछि उक्त निर्णय गरिएको ट्विटरले जनाएको छ।

ट्विटरका प्रमुख कार्यकारी ज्याक डोर्सेले ट्विट गर्दै इन्टरनेट विज्ञापन निकै सशक्त र ज्यादै प्रभावकारी देखिए पनि यो शक्तिलाई राजनीतिक व्यक्तिहरुले दुरुपयोग गर्ने सम्भावना बढी देखिएको बताएका छन्। उनले यही हतियारका आधारमा लाखौं जनतालाई मतदानका बेला दिग्भ्रमित पार्ने खतरा रहेको उल्लेख गरे।

अर्को सामाजिक सञ्जाल फेसबुकमाथि पनि राजनीतिक विज्ञापन गर्नुअघि तथ्य जाँच गर्न तीब्र दबाब परेको छ।

डोर्सेले नयाँ नीति बमोजिम राजनीतिक मामिलाका साथै उम्मेदवारका सबै विज्ञापनमाथि रोक लगाइने स्पष्ट पारे। उनले अर्को महिना विज्ञापनसँग सम्बन्धित विस्तृत विवरण सार्वजनिक गरिने र आगामी नोभेम्बर २२ देखि यो नीति लागू हुने पनि जानकारी दिए।

तर, फेसबुकका प्रमुख कार्यकारी मार्क जुकरबर्गले राजनीतिक विज्ञापन फेसबुकका लागि ठूलो आम्दानीको स्रोत नभएको बताउँदै राजनीतिक विज्ञापनमा प्रतिबन्ध लगाउँदा बहालवाला राजनीतिक व्यक्तिलाई नै फाइदा पुग्ने दाबी गरे। प्रतिबन्धले स्वतन्त्र र नयाँ 'आवाज'लाई दबाउने जुकरबर्गको तर्क छ।

यता डोर्से भने जुकरबर्गको तर्कसँग सहमत छैनन्। डोर्सेले कुनै राजनीतिक विज्ञापन बेगर पनि ठूला र धेरै सामाजिक अभियानहरु सञ्चालनमा आएको तर्क गरे।

'अमेरिका र विश्वकै लोकतन्त्रको रक्षाका लागि यो सही निर्णय हो,' अमेरिकामा सन् २०१६ की राष्ट्रपति पदकी उम्मेदवार हिलारी क्लिन्टनले ट्विट गरेकी छिन्। 'फेसबुकको भनाइ के छ?,' क्लिन्टनले प्रश्न गरेकी छिन्। रासस-एएफपी