निर्वाचन कानुनको उल्लङ्घन गरेको आरोपपछि जापानमा एक साताभित्रै दोस्रो मन्त्रीद्वारा राजीनामा

विश्व

नेपाल लाइभ शुक्रबार, कात्तिक १५, २०७६ ०६:२४

टोकियो- जापानका न्यायमन्त्री कात्सुयुकी कावाईले बिहीबार राजीनामा दिएका छन्। एक हप्तामा दुई जना मन्त्रीको राजीनामापछि प्रधानमन्त्री सिन्जो आवेलाई ठूलो धक्का लागेको छ।

कावाईकी पत्नीले निर्वाचन कानुनको उल्लङ्घन गरेको आरोपपछि न्यायमन्त्री कावाईले नैतिकताका आधारमा राजीनामा दिएका हुन्।

जापानी साप्ताहिक पत्रिका 'शुकान भुनशुन'ले जुलाईमा जापानी संसद्‌को माथिल्लो सदनमा ४६ वर्षीया एन्द्री कावाईले आफ्ना कर्मचारीलाई कानुनले तोकेभन्दा बढी भत्ता दिएको कुरा सार्वजनिक गरेपछि ५६ वर्षीय न्यायमन्त्री कावाईले राजीनामा दिएका हुन्।

कावाईले कर्मचारीलाई दिएको दैनिक खर्च जापानी कानुनले निर्धारण गरेको खर्चभन्दा बढी भएको उक्त पत्रिकाको बुधबारको अनलाइन संस्करणमा छापिएको थियो।

पत्रिकाले सार्वजनिक गरेको तथ्याङ्कअनुसार एन्द्री कावाईका १३ महिला निर्वाचन अभियानकर्मीलाई कानुनमा व्यवस्था भएभन्दा दोब्बर अर्थात् प्रतिदिन २ सय ७६ डलर बराबर खर्च उपलब्ध गराएकी थिइन्।

मन्त्री कावाईसमेतलाई आफ्नो निर्वाचन क्षेत्रमा मतदातालाई आलु तथा मकैको उपहार दिएर मत प्रभावित गराएको आरोप पत्रिकामा लगाइएको छ।

प्रधानमन्त्री आवेलाई राजीनामा बुझाएपछि बिहीबार पत्रकार सम्मेलनमा उनले भने, 'मेरी पत्नी एन्द्री वा ममाथि लगाइएका आरोप निराधार छन्। हामीले कुनै अनियमितता गरेका छैनौँ। यसलाई तल्लो तहसम्म पुगेर आरोपलाई निराधार पुष्टि गर्नु नै अहिलेको मेरो जिम्मेवारी हो।'

हिरोसिमाको निर्वाचन क्षेत्र नं ३ बाट संसद्‌को तल्लो सभाका लागि ७ पटकसम्म निर्वाचित कावाईले सेप्टम्बरदेखि न्यायमन्त्रीको जिम्मेवारी सम्हालेका थिए। उनले न्यायराज्य मन्त्री तथा विशेष कूटनीतिक सल्लाहाकारका रूपमा काम गरिसकेका छन्।

गत शुक्रबार सोही पत्रिकाले त्यहाँका उद्योग मन्त्रीलाई पनि आफ्ना सहयोगीलाई कानुनविपरीत नगद तथा उपहार वितरण गरेको समाचार छापेपछि उनले पनि राजीनामा दिएका थिए।

यसैबीच जापानी प्रधानमन्त्री आवेले दुई मन्त्रीको राजीनामाको जिम्मेवारी लिँदै जापानी जनतासँग क्षमायाचना गरेका छन्। उनले भने, 'न्यायमन्त्री कावाईलाई जिम्मेवारी दिएको र उहाँमाथि अनियमितता गरेको आरोप लागेकाले यसको जिम्मेवारी लिँदै जापानी जनतासमक्ष क्षमायाचना गर्छु।' रासस/सिन्ह्वा

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एमाले इलामको अध्यक्षमा बराल निर्वाचित

राष्ट्रिय कर दिवसः उत्कृष्ट करदाता सम्मानित

मायादेवी मन्दिरमा लुम्बिनी लायन्सको जर्सी सार्वजनिक