एजेन्सी- स्पेनिस घरेलु लिग ला-लिगाका फुटबल खेलाडीहरुको घरमा चोरी भएको छ। चोरीमा संलग्न भएको आरोपमा स्पेन प्रहरीले ४ जनालाई पक्राउ गरेको छ। स्पेनिस प्रहरीले भनेको छ, ‘बिहीबार खेलाडीहरुको घर चोरी गर्ने समूहका ४ जना पक्राउ परेका छन्।’
प्रहरीका अनुसार पक्राउ पर्ने चारैजना अल्बानियाका नागरिक रहेका छन्। उनीहरुको साथबाट चोरी भएको १० हजार युरो र केही गहना तथा मेडल पनि बरामद भएको छ। बरामद भएका ती सामानहरु खेलाडीको भएको प्रहरीले जनाएको छ।
स्पेनिस पत्रिका 'एल डेरियो'लाई उद्धृत गर्दै 'डेली मेल'ले लेखेको छ, ‘च्याम्पियन्स लिग उपविजेता बन्दा प्राप्त गरेको एट्लेटिको मड्रिडका मिडफिल्डर थोमस पोर्टेको मेडल र पासपोर्टसमेत चोरबाट बरामद भएको छ।’ पोर्टेको घरमा चोरी भएको यो दोस्रोपटक भएको प्रहरीले जनाएको छ।
त्यसैगरी, चोरको समूहले रियल मड्रिडका मिडफिल्डर कासेमिरोको घरमा पनि चोरी गरेका छन्। गत महिना एट्लेटिको मड्रिडसँगको खेलका क्रममा कासेमिरोको घरमा कोही नभएको मौका पारेर चोरी भएको स्पेनिस प्रहरीले जनाएको छ।
एट्लेटिको मड्रिडका स्ट्राइकर अल्भारो मोराटाको घरमा पनि चोरी भएको प्रहरीले जनाएको छ। चोरको समूहबाट रियल मड्रिडका प्रशिक्षक जिनेदिन जिदान, रियल मड्रिडकै अर्का खेलाडी इस्को पनि पीडित भएको डेली मेलले उल्लेख गरेको छ।
‘यस्तो कार्य राम्रो होइन,' रियल मड्रिडका प्रशिक्षक जिदानले पत्रकार सम्मलेनमा भनेका छन्, ‘हामी पीडित खेलाडी र उनीहरुका परिवारसँग कुराकानी गर्ने प्रयासमा छौं। उनीहरुलाई शान्त हुन आग्रह गर्छौं।’
रिपोर्टअनुसार केही वर्षखदेखि खेलाडीहरुको घर चोरी भएका घटना दजर्नौं पुगेका छन्। तर, अघिल्ला वर्षका चोरीका घटनामा अहिलेका चोरहरुको संलग्नता नभएको प्रहरीले जनाएको छ। यसअघि बार्सिलोनाका डिफेन्डर जेराड पिके, स्यामुल उम्टिटी, जोर्डी अल्बा र रियल मड्रिडका लुकास भास्क्वेजको घरमा पनि चोरी भएको थियो।
भास्क्वेजकी श्रीमती माका क्यापिलाले इन्स्टाग्राममा लेखेकी छिन्, ‘एकपछि अर्को गर्दै हाम्रो घर चोरी भएको छ। घरमा शान्तसँग बस्ने वातारण पनि बनेन। चिन्ता नलिई घर बाहिर जानसक्ने अवस्था पनि रहेन।’
प्रहरीले मड्रिड र टोलेडो सिटीमा भएको अपरेसन अझै बाँकी रहेकाले चोरी समूहका अन्य व्यक्ति पनि पक्राउ पर्ने भन्दै ढुक्क हुन आग्रह गरेको छ। गिरोहका एक सदस्य भने देश छाडेर भागिसकेको प्रहरीले अनुमान गरेको छ।
अधिकारीहरुका अनुसार चोरीको गिरोहले कार लिएर चोरी गरेको थियो। सेक्युरेटी क्यामेराबाट जोगिन उनीहरुले कारमा सञ्चार उपकरणसमेत जडान गरेका थिए। चोरहरुले सामाजिक सञ्जालमार्फत खेलाडीको गतिविधि नियालेर घरमा नभएको मौका पारेर चोरी गर्ने गरेका थिए।
चोरहरुले खेलाडीका उच्च पदस्थ छिमेकीहरुको घर समेत चोरी गर्ने योजना बनाएको पाइएको स्पेनिस प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
