लहान– भवनको अभाव भएपछि सिरहाको लहान नगरपालिका वडा नम्बर १६ को कार्यालय चौतारोमै सञ्चालन गर्नुपरेको छ। कार्यालयका दैनिक क्रियाकलाप चौतारोबाटै सम्पादन भइरहेका छन्।
डेढ दशक अगाडिसम्म पूर्वी पहाडी जिल्लाको मुख्य व्यापारिक केन्द्रको रुपमा रहेको लहान पुरानो र सुगम नगरपालिका मानिन्छ। यसै नगरपालिका भएर पूर्व–पश्चिम राजमार्ग सञ्चालनमा छ। तर, पूर्व–उत्तरमा रहेको १६ नम्बर वडा भने हरेक दृष्टिकोणले पछाडि छ।
यो वडा स्थानीय तह पुनर्संरचना गर्दा लहान नगरपालिकामा गाभिएको हो। २०७१ मंसिर १६ गतेको मन्त्रिपरिषद्को निर्णय अनुसार साविकको तरेगना गोविन्दपुर गाविसलाई लहान नगरपालिकामा गाभेर वडा नम्बर १ देखि ६ सम्मलाई वडा नम्बर १७ र ७, देखि ९ लाई वडा नम्बर १६ बनाइएको वडाध्यक्ष गडुलबहादुर जर्घा मगरले बताए।
उनले भने, ‘भएका सबै संरचना वडा नम्बर १७ मा परे, हामी चाहिँ चौतारोमा आयौं।’
कार्यालय सञ्चालनका लागि भवन नहुँदा स्थानीय आधारभूत विद्यालय तरेगनाको कार्यालयमा सामान राखेर काम चलाइएको उनले जानकारी दिए। विद्यालयमा सामान राख्दा विद्यालय र वडा कार्यालय दुवैतर्फको काम प्रभावित भइरहेको उनले बताए। विद्यालय बन्द भएको दिन कागजपत्र झिक्न नपाउँदा सेवाग्राहीलाई त्यत्तिकै फर्काउनुपरेको उनले बाध्यता सुनाए।
यति मात्रै होइन, भवन नहुँदा पाएको सुविधा समेत गुमेको मगरले जानकारी दिए।
‘स्थानीय तहको निर्वाचनपछि नगरपालिकाले फर्निचर दिने कुरा भयो, हामीसँग राख्ने ठाउँ थिएन’, वडाध्यक्ष जर्घा मगरले भने, ‘विद्यालयमा सामान राख्ने सहमति गरेर लिन जाँदा अर्को वडाले लगिसकेछ।’
संसदीय विकास कोष र लहान नगरपालिकाको २० लाख लागतमा आर्थिक वर्ष २०७३/०७४ मा निर्माण सुरु भएको एउटा ६ कोठे भवन पनि नगरपालिकाले कबोलेको रकम नदिँदा अलपत्र छ। डिपिसी, पिल्लर र छत ढलानसम्म पुगेर काम रोकिएको वडा सचिव राजकुमार साहले बताए।
१६ नम्बर वडामा बर्दमार, आहाले, टाँडे, कतले, अलमले, रुम्जाटार, भसुवा, भमरे, ओदाले, मैनाटार, तरेगना लगायतका गाउँहरु समेटिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
