काठमाडौं- क्रिस्टियानो रोनाल्डोले सोमबार फुटबल करियरमा नयाँ उचाइ कायम गरेका छन्। युरोकप २०२० छनोट खेलमा युक्रेनसँग गोल गर्दै उनले करियरको गोल संख्यालाई ७ सय पुर्याएका छन्।
३४ वर्षीय पोर्तुगिज फर्वार्डले यो आँकडा भेट्टाउन ९ सय ७३ खेल खेलेका छन्। जसमध्ये ४ सय ५८ खेलमा उनले कम्तीमा एक गोल गरेका छन्।
उनले खेलको ७२औं मिनेटमा पेनाल्टीमार्फत गोल गरे पनि टोलीलाई हारबाट भने बचाउन सकेनन्। पोर्तुगल युक्रेनसँग २-१ ले पराजित भएको हो। जितसँगै युक्रेन भने युरोकपका लागि छनोट भएको छ।
रोनाल्डो उक्त गोल पोर्तुगलको जर्सीमा प्रहार गरेको ९५औं गोल थियो। कुनै पनि देशका लागि गरेको सर्वाधिक गोल संख्यामा उनी इरानी फुटबलर अलि देई (१ सय ९ गोल) भन्दा पछि छन्।
करियरमा सर्वाधिक गोल गर्नेको सूचीमा उनी कम्तीमा ७ सय गोल गर्ने इलिट ग्रुपमा समेत समावेश भएका छन्। ग्रेड मुलर, फेरेन पुसकास, पेले, रोमारियो र जोसेफ बिकानपछि उनी करियरमा सर्वाधिक गोल गर्ने खेलाडी बनेका छन्। यो मुकाम हासिल गर्ने उनी हाल सक्रिय खेल जीवनमा रहेका एकमात्र खेलाडी हुन्।
यो सूचीमा रोनाल्डोभन्दा अघि रहेका जोसेफ बिकानको नाममा ८ सय ५, ब्राजिलियन लिजेन्डद्वय रोमारियोको नाममा ७ सय ७२ र पेलेको नाममा ७ सय ६७ गोल छ।
फुटबल करियरमा रोनाल्डोका लागि स्पेनिस क्लब रियल मड्रिड निकै फापेको देखिन्छ। उनले ७ सयमध्ये १ सय १८ गोल रियलको जर्सीमा खेल्दा गरेका थिए। जसका लागि उनले ४ सय ५० खेल खेलेका छन्। यसअघि इंग्लिस क्लब म्यानचेस्टर युनाइटेड (२००३-२००९ सम्म)बाट खेल्दा उनी लाइमलाइटमा आएका थिए।
पोर्तुगलको राष्ट्रिय टोलीबाट गरेको व्यक्तिगत गोल संख्यालाई हेर्ने हो भने कुनै दोस्रो खेलाडी उनको भन्दा आधा पनि गोल गरेको छैन। ९५ गोल गरेका रोनाल्डोपछि पोर्तुगलका पाउलेटाको नाममा ४७ गोल मात्रै दर्ता भएको छ।
अन्डोरा, अर्मेनिया, लात्भिया र स्विडेन यस्ता देश हुन् जोविरुद्ध खेल्दा रोनाल्डोले ५ गोल हानेका छन्। इस्टोनिया, फरोइ आइल्यान्ड, हंगेरी, लिथुजानिया, लक्जम्बर्ग र नेदरल्यान्ड्सविरुद्ध ४/४ गोल गरेका उनले फ्रान्स, जर्मनी, इटाली र इंग्ल्यान्डविरुद्ध भने हालसम्म गोल गर्न सकेका छैनन्।
क्लबतर्फ सेभिल्लाविरुद्ध २७, एट्लेटिको मड्रिडविरुद्ध २५, गेटाफेविरुद्ध २३, सेल्टाभिगोविरुद्ध २० र बार्सिलोनाविरुद्ध १८ पटक बललाई जाली चुमाएका छन्।
करियरको लामो कालखण्डमा उनको नाममा दर्जनौं रेकर्डहरु दर्ता भएका छन्। जसमध्ये च्याम्पियन्स लिगमा सर्वाधिक गोल, च्याम्पियन्स लिगको एकै सिजनमा सर्वाधिक गोल, रियल मड्रिडबाट सबैभन्दा बढी गोल, युरोपेली प्रतियोगितामा सबैभन्दा बढी सहभागीता तथा पोर्तुगलबाट सबैभन्दा बढी क्याप जित्ने खेलाडी उनको नाममा रहेका केही रेकर्ड हुन्।
खेल जीवनको सर्वाधिक उचाइमा रहेका विश्व चर्चित स्ट्राइकर रोनाल्डो अझै पनि सक्रिय रहेकाले उनको नाममा थप रेकर्ड बन्नेमा उनका प्रशंषकहरु विश्वस्त रहेको बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782043740-1782045652.jpeg)
-1764146706.png)
