काठमाडौं- गत जुलाई १४ मा पुरुषतर्फ एकदिवशीय विश्वकप क्रिकेटको उपाधिका लागि आयोजक इंग्ल्यान्ड र न्युजिल्यान्ड आमनेसामने भए। खेलमा निर्धारित ५० ओभरमा दुवै टोलीले समान २ सय ४१ रन बनाए।
विश्वकप उपाधि कसको पोल्टामा जाने भन्ने निर्णय गर्न खेल सुपर ओभरसम्म लम्बियो। सुपर ओभरमा दुवै टोलीले एक/एक ओभर ब्याटिङ गर्न पाउँछन्। अर्थात् जित हात पार्न टस जितेर पहिले ब्याटिङ गर्ने टोलीले दिएको लक्ष्य विपक्षी टोलीले १ ओभरमै पार गर्नुपर्ने हुन्छ।
यसका लागि बढीमा एक टोलीबाट ३ ब्याट्सम्यान मैदानमा उत्रिन पाउँछन्। बलर भने दुवै टोलीबाट एक/एक जनामात्रै। यदि बलिङमा क्रममा बलर घाइते भएमा भने अर्को बलरलाई बलिङका लागि निम्यात्याउन सकिने व्यवस्था छ।
तर, सुपर ओभरमा पनि खेल बराबर भए कसरी हुन्छ त निर्णय? यसका लागि क्रिकेटको नियामक निकाय इन्टरनेसनल क्रिकेट काउन्सिल (आइसिसी)ले खेलमा प्रहार भएको बाउन्ड्रिज(चौका र छक्का)लाई आधार मान्ने व्यवस्था गरेको छ।
लर्ड्स मैदानमा भएको विश्वकप क्रिकेटको फाइनलमा पहिले ब्याटिङ गर्दै इंग्ल्यान्डले १५ रन जोड्यो। यसमा उसले २ चौका प्रहार गरेको थियो।
१६ रनको लक्ष्य पछ्याएको न्युजिल्यान्डले १ ओभरमा समान १५ रननै बनायो। उसले उक्त ओभरमा एकमात्र छक्का प्रहार गरेको थियो। पूरा खेलभर इंग्ल्यान्डले न्युजिल्यान्डभन्दा बढी चौका-छक्का प्रहार गरेका कारण उ विश्वविजेता घोषित भयो।
उक्त नतिजापछि आइसिसीको सुपर-ओभरसम्बन्धी नियममाथि टिकाटिप्पणी सुरु भयो। प्रशंषकदेखि क्रिकेटका जानकार तथा खेलाडीसमेतले यसमा परिमार्जन हुनुपर्ने आवाज उठाए।
फलस्वरुप आइसिसीले यस नियममा केही हेरफेर गरेको छ।
संयुक्त अरब इमिरेट्सको दुबईमा सोमबार भएको आइसिसीको बोर्ड बैठकले सुपर ओभरसम्बन्धी नियममा केही फेरबदल गरेको हो। जसअनुसार अब सुपर ओभरमा दुवै टिमले बराबर रन बनाएको अवस्थामा एक टिमले स्पष्ट जित हात नपारुन्जेलसम्म पुनः सुपर ओभरको खेल खेलाइने भएको छ।
यो व्यवस्था आइसिसीको कुनै पनि टुर्नामेन्टको फाइनल र सेमिफाइनल खेलका लागि मात्र लागू हुने आइसिसीका चेयरम्यान संशाक मनोहरले बताए।
यदि यस्तो नियम यसअघि नै व्यवस्था गरिएको भए न्युजिल्यान्ड र इंग्ल्यान्डबीचको विश्वकप फाइनलको निर्णय चौकाछक्काको आधारमा हुँदैनथ्यो। जसको पूरा फाइदा इंग्ल्यान्डलाई मिलेको थियो। समान रन बनाए पनि न्युजिल्यान्ड विश्वविजेता हुनबाट चुकेको थियो।
बैठकपछि आइसिसीबाट जारी विज्ञप्तिमा भनिएको छ, ‘धेरै रन बनाउनेले खेल जित्छ भन्ने साधारण नियमका आधारमा यस्तो व्यवस्था गरिएको हो।’
बैठकले सुपर ओभर अब २० तथा ५० ओभरको विश्वकपमा सबै खेलहरुमा लागू गर्ने समेत निर्णय गरेको छ। यसअघि नकआउट खेलहरुमा मात्र सुपर ओभरबाट निर्णय लिइने गरिन्थ्यो।
यदि सूमह चरणका खेलमा सुपर ओभरमा पनि बराबरी भएमा दुवै टोलीलाई बराबर अंक बाँडिनेछ, न कि फेरि सुपर ओभर खेलाइनेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।