काठमाडौं- अन्तर्राष्ट्रिय क्रिकेट काउन्सिल (आइसिसी)ले नेपाल क्रिकेट संघ (क्यान)को निलम्बन सशर्त फुकुवा गर्ने निर्णय गरेको छ।
दुबईमा सोमबार सम्पन्न आइसिसीको बैठकले सशर्त रूपमा क्यानको निलम्बन फुकुवा गर्ने निर्णय गरेको हो।
तर, आइसिसीले के कस्ता सर्त क्यानले पालना गर्नुपर्ने वा अन्य विषयमा भने केही पनि खुलाएको छैन।
यस्तै आईसीसीले जिम्बावेमाथि लगाएको निलम्बनसमेत सशर्त फुकुवा गर्ने निर्णय गरेको छ।
'दुबईमा सकिएको आइसिसी बोर्डको बैठकले जिम्बावे र नेपाललाई आईसीसी सदस्यको रूपमा स्वीकार गरेको छ,' आईसीसीले जारी गरेको विज्ञप्तिमा भनिएको छ।
नेपाली क्रिकेटमा सरकारी हस्तक्षेप भएको र निर्वाचन स्वतन्त्र र निष्पक्ष नभएको भन्दै आईसीसीले २०७३ बैशाखमा नेपाल क्रिकेट संघमाथि निलम्बन गरेको थियो।
त्यसपछि आईसीसीकै प्रत्यक्ष संग्लग्नतामा गठन गरिएको सल्लाहकार समिति र स्वतन्त्र समितिको मातहत जिल्ला, प्रदेश र असोज ३ गते केन्द्रीय निर्वाचन सम्पन्न भएको थियो।
निर्वाचनबाट चतुरबहादुर चन्दको नेतृत्वमा १७ सदस्यीय कार्यसमिति चयन भएसँगै नेपालको निलम्बन फुकुवाको बाटो खुलेको हो।
दुबईमा भएको बोर्ड बैठकपछि आइसिसीका चेयरम्यान संशाक मनोहरले नेपालले अब एसोसियट राष्ट्रको रुपमा पाउने सबै सुविधा पाउने स्पष्ट पारे।
‘तर, यसका लागि एक योजना बनाइनेछ, जसमा निश्चित रकम मात्रै निकासा गर्ने व्यवस्था सामेल हुनेछ,’ उनले भने।
निलम्बन खारेज भएसँगै जिम्बाबेले भने आगामी जनवरीमा हुने १९ वर्ष मुनिको विश्वकप क्रिकेट र सन् २०२० मा हुने आइसिसी सुपर लिगमा सहभागिता जनाउन पाउने बाटो खुलेको छ।
सरकारबाट हस्तक्षेप भएको भन्दै जिम्बाबेको क्रिकेट बोर्डलाई गत जुलाईमा आइसिसीले निलम्बन गरेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।