जनकपुर- प्रदेश २ मा ‘बेटी पढाउ बेटी बचाउ’ अभियान जोडतोडका साथ चलिरहेको छ। अर्कोतर्फ 'बेटी' (छोरी)हरुमाथि नै आक्रमण हुने क्रम रोकिएको छैन। कतै छोरीलाई दाइजोका नाममा जलाएर जिउँदै मारिएको छ भने कतै बलात्कार र एसिड प्रहार भइरहेको छ।
प्रदेश २ कै आर्थिक राजधानीको रुपमा रहेको वीरगन्जमा त्यस्तै एक घटना भएको छ। शुक्रबार बिहानै बजार क्षेत्रमै एक किशोरीमाथि एसिड प्रहार भएको हो। उपचाररत एसिड प्रहारबाट घाइते किशोरीको अवस्था गम्भीर रहेको उनका परिवारजनले बताएका छन्।
यस्तो थियो घटना
बिहानै विद्यालय पढ्न भनेर हिँडेकी वीरगन्ज महानगरपालिका-११, श्रीपुर घर भई हाल वीरगन्ज-३, छप्कैयामा बस्दै आएकी १५ वर्षीया मुस्कान खातुनमाथि एसिड आक्रमण गरिएको हो।
छप्कैयास्थित मामाको घरमा बसेर अध्ययन गर्दै गरेकी मुस्कानमाथि विद्यालय जाँदै गरेको बेला शुक्रबार बिहान स्थानीय दुई किशोरले एसिड प्रहार गरेका थिए। एसिड प्रहारबाट खातुनको अनुहार, छाती, हातखुट्टा लगायत अंगहरु जलेका छन्।
वीरगन्ज-२ का स्थानीय सम्साद मियाँ हजार र माजिद मियाँ हजार मिलेर बिहान ६ बजेको समयमा मुस्कानमाथि एसिड छ्यापेको प्रहरीले जनाएको छ।
पक्राउ गरेका साम्सद मियाँ हजार।
जिल्ला प्रहरी कार्यालय पर्साका अनुसार एसिड प्रहार गरी फरार दुईमध्ये एक साम्सद मियाँ हजारलाई पक्राउ गरिएको छ। अर्का अभियुक्तको पनि खोजी भइरहेको प्रहरीले जनाएको छ।
प्रेम प्रस्ताव अस्वीकार गर्दा एसिड प्रहार
एकतर्फी प्रेम प्रस्ताव अस्वीकार गर्दा मुस्कानमाथि एसिड प्रहार भएको प्रहरीको प्रारम्भिक अनुसन्धानबाट खुलेको छ।
वीरगन्ज-२ का माजिदले आफ्नो प्रेम प्रस्ताव अस्वीकार गरेको भन्दै मुस्कानमाथि एसिड प्रहार गरेका थिए। वीरगन्ज-४, गणेशमान चोकमा साथी सम्सादको सहयोगमा माजिदले मुस्कानमाथि एसिड छ्यापेका थिए।
शुक्रबार बिहान वीरगन्जको ६ नम्बर गेटनजिकै रहेको श्री त्रिभुवन हनुमान माध्यमिक विद्यालय गइरहेकी उनलाई बाटोमै रोकेर ती युवकहरुले एसिड प्रहार गरेका प्रहरी नायव उपरीक्षक अनन्तराम शर्माले बताए।
कक्षा ९ मा अध्ययनरत खातुनलाई माजिदले एकतर्फी प्रेम गर्दै आएका थिए। मुस्कानलाई माजिदले पटक-पटक प्रेम प्रस्ताव राखेका थिए। तर, मुस्कानले उनको प्रेम प्रस्ताव अस्वीकार गरेपछि सो घटना घटाएको शर्माले बताए।
थप उपचारको लागि काठमाडौं रेफर
एसिड प्रहारबाट गम्भीर घाइते भएकी मुस्कानलाई तत्कालै उद्धार गरी वीरगन्जको नारायणी उपक्षत्रीय अस्पतालमा भर्ना गरिएको थियो। तर, त्यहाँ उपचार सम्भव हुने स्थिति नदेखिएपछि थप उपचारको लागि काठमाडौं रेफर गरिएको अस्पतालले जनाएको छ। उनलाई कीर्तिपुर अस्पतालमा उपचार भइरहेको छ।
गाला, घाँटी, छाती र हात जलेको उनको अवस्था चिन्ताजनक रहेको चिकित्सकहरुले जनाएका छन्।
एसिड प्रहारबाट घाइते भएकी मुस्कानको उपचारका लागि पर्सा क्षेत्र नम्बर '१' का प्रतिनिधिसभा सदस्य प्रदीप यादव र वीरगन्ज महानगरपालिकाका नगर प्रमुख विजयकुमार सरावगीले आर्थिक सहयोग गरेका छन्। यादवले ५० हजार र सरावगीले १५ हजार रुपैयाँ आर्थिक सहयोग गरेका हुन्।
फरार माजिदलाई पक्राउ गर्न प्रहरी परिचालन
एसिड प्रहार गरी भाग्न खोज्दा माजिदसँगै रहेका सम्सादलाई स्थानीयले नियन्त्रणमा लिई प्रहरीको जिम्मा लगाएका थिए।
मुख्य आरोपी माजिद भने फरार छन्। उनको खोजी भइरहेको प्रहरीले जनाएको छ। फरार माजिदलाई पक्राउ गर्न प्रहरी परिचालन गरिएको पर्साका प्रहरी नायव उपरीक्षक अनन्तराम शर्माले बताए।
दोषीलाई कारबाहीको माग गर्दै प्रदर्शन
मुस्कान खातुनमाथि एसिड प्रहार गर्ने दोषीलाई कारबाहीको माग गर्दै वीरगन्जका युवाहरुले आज प्रदर्शन गरेका छन्। युवा नेता शेख मुन्नाको अगुवाइमा युवाहरुको एक समूहले वीरगन्जको घण्टाघर चोकमा प्रदर्शन गरेका हुन्।
युवाहरुले एसिड प्रहारमा संलग्नलाई कडा कारबाही हुनुपर्ने, महिलाहरुको सुरक्षाको ग्यारेन्टी हुनुपर्ने, र पीडित परिवारलाई उचित क्षतिपूर्ति दिनुपर्ने माग गर्दै प्रदर्शन गरेका हुन्। प्रदर्शनपश्चात् आयोजित कोणसभामा बोल्दै समाजिक अभियन्ता ओम प्रकाश सरार्फले दोषीलाई हदैसम्मको कारबाही हुनुपर्ने माग गरे।
त्यस्तै, राजपाकी महिला नेतृ रम्भा मिश्र, कांग्रेसकी सुस्मा तिवारी, देशभक्त लोकतान्त्रिक पार्टीका जलेश्वर सरार्फ, समाजिक अभियन्ता मोनिका सिंह लगायतले एसिड प्रहार घटनाको निन्दा गर्दै दोषीलाई कारबाही पीडितलाई क्षतिपूर्तिको माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
