धनगढी– प्रदेश नम्बर ७ को आइतबार बसेको प्रदेशसभाको पहिलो बैठकमा प्रदेश संसदमा प्रतिनिधित्व गर्ने चार दलका चार सांसदले मन्तव्य राखे।
राजनीतिक मुद्दा सामान्य रुपमा उठाएका सांसदहरुले मूलरूपमा प्रदेशको आर्थिक समृद्धिलाई प्रमुख लक्ष्य र कार्यभारका रूपमा चर्चा गरे।
इमानदार भएर जुटे केही वर्षमै प्रदेशको स्वरुप बदल्न सक्छौं : प्रकाशबहादुर शाह
बाजुराबाट प्रतिनिधित्व गर्ने नेकपा एमालेका सांसद प्रकाशबहादुर शाहले प्रदेश नम्बर ७ प्रचुर मानवीय र प्राकृतिक स्रोतको धनी भएको भन्दै प्रदेशको समृद्धि नै अबको मुख्य लक्ष्य भएको बताए।
'हामीले इमानदारीपूर्वक काम गर्यौं भने केही वर्षभित्र प्रदेशको स्वरुप नै बदल्न सक्छौं', उनले भने।
सांसद शाहले १० हजार मेगावाटको कर्णाली, साढे आठ हजार बढी क्षमताको पञ्चेश्वर, साढे सात सय मेगावाट क्षमताको पश्चिम सेती लगायतका जलस्रोतको उपयोग मात्रैले पनि प्रदेश नम्बर ७ लाई मुलुककै सबैभन्दा धनी प्रदेशमा स्थापित गर्न सकिने चर्चा गरे।
सांसद शाहले किसान नेता भीमदत्त पन्त, मानवतावादी राजा जयपृथ्वीबहादुर सिंह, साहित्यकारहरू पहलमानसिंह स्वार लगायतको चर्चा गर्दै भने, 'हामी सबैले हाम्रा अग्रजहरूले गरेका महान् योगदानको स्मरण गर्दै पार्टी राजनीतिभन्दा माथि उठेर काम गर्ने प्रण गरौं।'
उनले समृद्धि र विकासका लागि हडताल लगायत आन्दोलन सधैंका लागि बन्द गर्नुपर्ने र पक्ष र प्रतिपक्षमा विभाजित भएर लड्न छाडेर नयाँ राजनीतिक संस्कारको सुरुवात गर्न सबै सांसदलाई आग्रह समेत गरे।
विकासका लागि सुनौलो अवसर : भरतबहादुर खड्का
डोटीबाट प्रतिनिधित्व गर्ने नेपाली कांग्रेसका सांसद भरतबहादुर खड्काले सधैं विकासका दृष्टिले पछाडि पारिएको सुदूरपश्चिममा प्रदेशसभाबाट द्रुत आर्थिक विकासका लागि सुनौलो अवसर आएको चर्चा गरे।
'यो लोकतन्त्र तथा राष्ट्रिय स्वाधिनतालाई बलियो बनाउँदै दिगो शान्ति, स्थिरता र आर्थिक समृद्धिका लागि संकल्प गर्ने बेला हो', उनले भने।
सांसद खड्काले गरिबीको रेखामुनि रहेका, अभाव र कष्ट बेहोरेर जसोतसो बाँचिरहेका तथा सामाजिक, जातीय थिचोमिचो एवं विभेदमा पारिएका जनताको अनुहारमा उज्यालो ल्याउन दृढतापूर्वक लाग्न आग्रह गरे।
सांसद खड्काले कैलाली र कञ्चनपुर जस्ता उर्वर भूमिलाई तीव्र गतिमा घरघडेरी बन्नबाट जोगाउन जरुरी भएकोमा जोड गरे।
उनले भने, 'हाम्रो भूगोलको अहिलेको अवस्था भनेको पहाड रित्तिएको र तराई ओइरिएको जस्तो छ।'
जडिबुटीको प्रयोगबाट औषधिमा आत्मनिर्भर बनौं- त्रिलोचन भट्ट
डोटीबाटै प्रतिनिधित्व गर्ने माओवादी केन्द्रका सांसद त्रिलोचन भट्टले प्रदेश नम्बर ७ मा उपलब्ध प्राकृतिक स्रोत-साधनको अधिकतम उपयोग गर्दै समृद्धिको यात्रामा सबै एकजुट भएर अघि बढ्न आग्रह गरे।
सांसद भट्टले जातीय तथा क्षेत्रीय विविधता रहेको यो प्रदेशमा कसैले कुनै पनि किसिमको उपेक्षा र विभेदको महसुस गर्न नपरोस् भन्ने ढंगले काम गर्नुपर्ने बताए। उनले थपे, ‘हामीले हाम्रै जडीबुटीबाट बनेको औषधि अरुबाट किनेर खाइरहेका छौं। अब हामी आफैंले यहीँको जडिबुटी उपयोग गरेर औषधिमा आत्मनिर्भर बन्नुपर्छ।'
टीकापुर घटनामा समातिएका सबैलाई रिहा गरियोस् : मालामती राना
कैलालीबाट प्रतिनिधित्व गर्ने राष्ट्रिय जनता पार्टीकी सांसद मालामती रानाले विगतमा कैलालीका डगौरा, कठरिया, रानाथारु लगायतले गरेका आन्दोलनका मुद्दालाई सम्बोधन गर्नुपर्ने बताइन्।
सांसद रानाले मधेस आन्दोलनको प्रतिवेदन सरकारलाई बुझाइसके पनि कैलालीको टीकापुर घटनाको प्रतिवेदन अझैसम्म प्रस्तुत नभएकोमा आपत्ति जनाइन्। उनले टीकापुरको घटना राजनीतिक घटना भएकाले जेलमा रहेका सबैलाई रिहा गर्नुपर्ने भन्दै कैलाली निर्वाचन क्षेत्र नम्बर १ बाट निर्वाचित रेशमलाल चौधरीलाई वारेस मार्फत प्रमाणपत्र दिन माग गरिन्।
उनले प्रदेश ७ का नौ जिल्लाको पायक पर्ने ठाउँमा प्रदेश राजधानी तोकिनुपर्ने माग समेत गरिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
