बुटवल– प्रदेश नम्बर ५ को आइतबार बसेको पहिलो बैठकले सभामुखको निर्वाचन आउँदो फागुन २ गते गर्ने निर्णय गरेको छ।
सांसदहरुमध्ये ज्येष्ठ सदस्य ८० वर्षीय बलदेव शर्मा पोखरेलले सभामुखको भूमिका निर्वाह गरेको बैठकको सुरुमा पोखरेलले प्रदेशसभा आह्वान सम्बन्धी पत्र पढेर सुनाएका थिए।
बैठकले कार्यसञ्चालन कार्यविधि पारित गर्नुका साथै सभामुखको अनुपस्थितिमा बैठक सञ्चालनका लागि पाँच सदस्यीय समिति गठन समेत गरेको छ। जसमा प्रदेशसभाका सदस्य कमलराज श्रेष्ठ, दधिराम न्यौपाने, अष्टभुजा पाठक, सन्तोषकुमार पाण्डे र तारा जिसी रहेका छन्।
त्यस लगत्तै सहिदको सम्झनामा मौनधारण गरिएको थियो।
बैठकमा बोल्दै नेकपा एमाले पाँच नम्बर प्रदेश संसदीय दलका नेता शंकर पोखरेलले स्थानीय तह र केन्द्र सरकार पूर्ववत् संरचनाबाट अगाडि बढेको र प्रदेश सरकार शून्य अवस्थाबाट सञ्चालन गर्नुपरेकाले चुनौती र अवसर रहेको बताए।
पोखरेलले छोटो समयमा प्रदेशका धेरै कानुन निर्माण गर्नुपर्ने भएकाले जिम्मेवारीबोधका साथ सामूहिक प्रयत्न र उत्साहका साथ बैठकमा सहभागी हुन सांसदहरुलाई आग्रह गरे।
यस्तै, माओवादी केन्द्रका सांसद कुलप्रसाद केसीले दलीय सहमति र सहकार्यबाट आइपर्ने सबै प्रकारका समस्याको समाधान गरिने बताए। उनले पाँच नम्बर प्रदेशलाई नमुना प्रदेशका रुपमा स्थापित गरेर यस क्षेत्रका जनताको आर्थिक उन्नति गर्नुपर्नेमा जोड दिए।
नेपाली कांग्रेसका सांसद वीरबहादुर रानाले यस प्रदेशमा रहेका ऐतिहांसिक तथा प्राकृतिक स्थल र सम्पदाहरुलाई आधार बनाएर विकासमा जुट्नुपर्ने बताए। प्रदेशलाई नमुना प्रदेश बनाउन संसदमा सत्तापक्ष र प्रतिपक्षको भावना राख्न नहुनेमा समेत उनले जोड दिए।
यस्तै, संघीय समाजवादी फोरमका सांसद सहराम यादवले दलीय सहमति र सहकार्यका साथ अगाडि बढ्नुपर्ने बताए भने राष्ट्रिय जनमोर्चाकी सांसद तारा जिसीले सरकारले ५ नम्बर प्रदेशको अस्थायी राजधानी बुटवल तोके पनि स्थायी राजधानीका लागि उच्चस्तरीय आयोग बनाएर टुंगो लगाउनुपर्ने माग गरिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
