बुटवल- प्रदेशको अस्थायी केन्द्र तोकिएपछि रूपन्देहीमा प्रदेशका विभिन्न कार्यालय स्थापना हुने भवनको करिब टुंगो लागेका छन् ।
प्रदेश नं ५ मा सात मन्त्रालयका लागि भवन व्यवस्थापन करिब टुंगिएर आज मात्र प्रदेश नं ५ मा मुख्यमन्त्री तथा मन्त्रिपरिषद्को कार्यालय स्थापना भएको छ । जिल्लामा रहेका सरकारी भवनमध्येकै अत्याधुनिक छतले श्रम कार्यालयको भवनमा चार मन्त्रालय स्थापना गरिएका छन् । उक्त भवनमा मुख्यमन्त्री तथा मन्त्रिपरिषद्को कार्यालय स्थापना गरिएको छ । उक्त भवनकोे चौथो र पाँचाँै तलामा मुख्यमन्त्री तथा मन्त्रिपरिषद्को कार्यालय बस्ने प्रमुख सचिव शंकर पाठकले जानकारी दिए । मुख्यमन्त्रीको कार्यालयमा प्रमुख सचिव, दुई सहसचिवसहित २१ कर्मचारी हुनेछन् ।
त्यस्तै मुख्यमन्त्रीको निवास राजश्व अनुसन्धानको भवन बुटवलमा व्यवस्थापन गरिएको प्रमुख सचिव पाठकले जानकारी दिए । मुख्यमन्त्रीसहित आन्तरिक मामिला तथा कानून, आर्थिक मामिला तथा योजना र उद्योग, पर्यटन तथा वन मन्त्रालय रहनेछन् । यस्तै सामाजिक विकास मन्त्रालय सीप विकास तालीम केन्द्रको भवन रामनगरमा तथा भौतिक पूर्वाधार मन्त्रालय यातायात व्यवस्था कार्यालयको भवनमा राख्ने तयारी छ ।
कृषि तथा सहकारी मन्त्रालय भूमिगत जलस्रोत कार्यालय हाटबजारमा रहनेछ । मन्त्रालय व्यवस्थापनका लागि केही सचिवसमेत बुटवल आइसकेका छन् । रूपन्देही व्यापार संघको भवनमा प्रदेश प्रमुखको कार्यालय स्थापना गरिएको छ । हालसम्म निवासको व्यवस्थापन नहुँदा प्रदेश प्रमुख उमाकान्त झा र सचिव सनतकुमार दुवाडी सडक डिभिजन अतिथिगृहमा बस्दै आएका छन्।
सभामुख र छ मन्त्रीसहित केही कर्मचारीका लागि भैरहवास्थित भैलभुजको कार्यालयमा आवासको व्यवस्थापन गरिनेछ । प्रदेशको अस्थायी केन्द्र तोकिएपछि प्रदेशसभाका सदस्यलाई शपथ गराइएको बुटवल उद्योग वाणिज्य संघको सचिवालयलाई संसद् सचिवालयका रुपमा स्थापना गरी त्यहाँ रहेको सभागृहलाई प्रदेशसभा भवनका रुपमा अहिले धमाधम तयारी थालिएको छ ।
बैठकका लागि तोकिएको उक्त भवनलाई विभिन्न खण्डमा विभाजन गरिएको छ । त्यहाँ आवश्यक कुर्सी, टेबललगायत फर्निचर ल्याइएको छ । यस्तै उद्योग वाणिज्य संघको सचिवालय भवनमा प्रदेशसभा सचिवालय स्थापना गरिएको छ । उक्त भवनको पहिलो तलामा सभामुख, उपसभामुख, प्रमुख सचिव र कर्मचारी कक्ष रहनेछन् । सभामुख र प्रमुख सचिवको कक्ष व्यवस्थापनको काम सकिएको छ ।
बैठकको कार्य्विधि तय
प्रदेशको पहिलो बैठकको कार्य्विधि आज सर्वदलीय बैठक बसेर तय गरिएको छ । कार्यव्यवस्था परामर्श समिति गठन भइनसकेकाले राष्ट्रिय पार्टीका स्थानीय नेतृत्वको सर्वदलीय बैठकले पहिलो बैठकका कार्यसूची तय गरेको प्रदेशका ज्येष्ठ सदस्य बलदेव शर्मा पोखरेलले जानकारी दिनुभयो ।
उहाँका अनुसार बैठकको प्रारम्भमा प्रदेश प्रमुखले बैठक आह्वान गरेको पत्र पढेर सुनाइने कार्यसूची रहेको छ । यस्तै सभामुखको निर्वाचनका लागि यही माघ २७ गते उम्मेदवारी दर्ता र माघ २८ गते निर्वाचनको मिति तोक्नेसमेत कार्यसूची रहेको उहाँले जानकारी दिनुभयो । यससँगै पहिलो बैठकमा दलीय प्रतिनिधित्वका आधारमा प्रत्येकलाई १० मिनेट मन्तव्य राख्न दिइने जनाइएको छ ।
१५ मर्यादापालक
संसद्मा आन्तरिक मर्यादापालकको भूमिकामा नेपाल प्रहरीबाट १५ मर्यादापालक खटिएका छन् । प्रहरी निरीक्षक ओमप्रकाश चौधरीको नेतृत्वमा प्रहरीहरु मर्यादापालकका रुपमा खटिएको रुपन्देहीका प्रहरी प्रमुख प्रहरी उपरीक्षक श्याम ज्ञवालीले बताउनुभयो । उनीहरुलाई संघीय संसद्बाट आएको सहजीकरण टोलीले मर्यादापालकसम्बन्धी सहजीकरण गरेको छ ।
मर्यादापालकका लागि पुरुषलाई सेतो दौरासुरुवाल, कालोकोट र टोपी तथा महिलाका लागि साडी, चोलो र कालो कोटको पोशाक तय गरिएको बताइएको छ । संसद् अधिवेशनको सुरक्षाका लागि बाहिर करिब १५० प्रहरी खट्ने भएका छन् । सभाकक्षभित्र मर्यादापालक र बाहिरपट्टिको सुरक्षा जाँचमा प्रहरी नै रहनेछन् ।
पार्टी एकीकरणबारे यस्तो छ ईश्वर पोखरेलेको धारणा
पोखरा नेकपा (एमाले)का महासचिव ईश्वर पोखरेलले एमाले र नेकपा(माओवादी केन्द्र)बीच सिद्धान्त र विचारका आधारमा एकीकरण हुन लागेको बताएका छन्।
नेपाल राष्ट्रिय वाणिज्य संघले आयोजना गरेको दोस्रो राष्ट्रिय महाधिवेशनको उद्घाटन गर्दै उहाँले एकीकरण सुव्यवस्थित बनाउँदै लैजानका लागि विचार र संगठनको व्यवस्थापन गर्न छुट्टाछुट्टै कार्यदल बनाएर अघि बढ्ने बताए । अब बन्ने सरकारले प्राथमिकताका आधारमा के के गर्ने भन्ने सम्बन्धमा पनि कार्यदलमार्फत योजना बनाइने तयारी भएको बताउदै उनले सरकार गठन र एकीकरणका प्रक्रिया सँगसँगै बढ्दै जाने जानकारी दिए।
सो अवसरमा एमालेका सचिव पृथ्वी सुब्बा गुरुङले दक्ष जनशक्ति स्वदेशमा नै तयार गरी उनीहरूको उपयोग गरिनुपर्ने उल्लेख गरे। एमाले प्रदेश नं ४ का संयोजक किरण गुरुङले प्राकृतिक, सांस्कृतिक रुपमा समृद्ध प्रदेश नं ४ मा विकासका पर्याप्त सम्भावना रहेको बताए।
वाणिज्य संघका अध्यक्ष धनराज आचार्यले कर तिर्ने व्यवसायीको योगदानको उचित कदर हुनुपर्नेमा जोड दिए । पोखरा लेखनाथ महानगरपालिकाका प्रमुख मानबहादुर जिसीले व्यवसायीले बाहिरबाट ल्याएको सामान बेच्ने मात्र नभै मुलुकभित्रै उत्पादन गरी बेच्न सक्ने गरी तयारी गर्नुपर्ने औँल्याए।
कार्यक्रममा एमाले स्थायी कमिटीका सदस्य एवम् राष्ट्रिय व्यवसायी महासंघका इञ्चार्ज मुकुन्द न्यौपाने, संघका कास्की अध्यक्ष सञ्जीवबहादुर कोइरालालगायतले आर्थिक विकासमा योगदान गर्ने व्यवसायी राज्यको प्राथमिकतामा पर्नुपर्नेमा जोड दिए । सो अवसरमा वाणिज्य संघमा आबद्ध भई स्थानीय, प्रदेश एवम् संघमा नवनिर्वा्चित जनप्रतिनिधिलाई सम्मान गरिएको थियो । दुईदिने महाधिवेशनमा देशका ६८ जिल्लाका ४०० प्रतिनिधिको सहभागिता छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
