धनगढी- माओवादी केन्द्रले प्रदेश नम्बर ७ को मुख्यमन्त्रीका लागि डोेटीबाट प्रदेशसभामा निर्वाचित सांसद त्रिलोचन भट्टलाई सिफारिस गरेको छ।
वाम गठबन्धनले प्रदेश नम्बर ७ मा मुख्यमन्त्री माओवादी केन्द्रलाई दिने सहमति गरेसँगै उक्त दलले शुक्रबार पार्टीको प्रदेश कार्यालयबाट सांसद भट्टको नाम सिफारिस गरेको हो।
उक्त दलका प्रदेश नं ७ संयोजक लक्ष्मणदत्त जोशीले शुक्रबार काठमाडौँमा भएको प्रदेश कार्यालयको बैठकले भट्टलाई मुख्यमन्त्रीमा सिफारिस गरेको जानकारी दिए।
उनले भने, 'अब दुई/तीन दिनभित्र केन्द्रले निर्णय गर्छ होला।'
यसअघि भट्ट २०६४ र २०७० सालको संविधानसभाको निर्वाचनमा पराजित भएका थिए।
बिहीबारसम्म माओवादीभित्र भट्टसँगै कैलालीबाट निर्वाचित सांसद वीरमान चौधरी र दार्चुलाका सांसद मानबहादुर धामीको नाम चर्चामा थियो। प्रदेशसभामा उक्त दलबाट प्रत्यक्ष र समानुपातिक गरी १४ सांसद छन्।
प्रदेश नम्बर ७ को अस्थायी राजधानी धनगढीलाई नै कायम गर्ने गरी पहाडलाई मुख्यमन्त्री दिन सन्तुलन मिलाउने क्रममा भट्टलाई माओवादीले सिफारिस गरेको आकलन गरिएको छ।
त्यसैगरी, प्रदेशसभामा १२ जना सांसद रहेको नेपाली कांग्रेसले पनि आवश्यकता अनुसार निर्णय लिएर मुख्यमन्त्रीका लागि अघि बढ्ने संकेत गरेको छ।
डडेल्धुराबाट प्रदेशसभामा निर्वाचित सांसद एवं पार्टीका जिल्ला सभापति कर्णबहादुर मल्लले मुख्यमन्त्रीको उम्मेदवारका सम्बन्धमा केन्द्रको निर्देशन अनुसार शनिबारदेखि छलफल गरेर अघि बढ्ने बताए।
'पार्टीले सातवटै प्रदेशमा केन्द्रबाट नेता खटाएको छ', सांसद मल्लले भने, 'छलफल गरेर आवश्यताअनुसार निर्णय लिन्छौं।'
प्रदेश नम्बर ७ मा कांग्रेसबाट चार निर्वाचित र आठ समानुपातिक गरी १२ सांसद छन्।
यो प्रदेशमा दुई जना सांसद रहेका राष्ट्रिय जनता पार्टी (राजपा)ले पनि पार्टीमा छलफल गरेर मात्रै मुख्यमन्त्रीमा कुन दललाई सहयोग गर्ने भन्ने टुंगो लगाउने भएको छ। राजपाका प्रदेश सांसद मालामती रानाले वाम गठबन्धनले मुख्यमन्त्रीको उम्मेदवार टुंगो लगाएपछि मात्रै आफूहरु निर्णय लिन छलफल गर्ने बताए।
५३ जना सांसद रहेको प्रदेश नं ७ मा नेकपा एमालेका २५, माओवादी केन्द्रका १४, कांग्रेसका १२ र राजपाका २ सांसद छन् । रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
