काठमाडौं- अर्थमन्त्री डा. युवराज खतिवडाले राष्ट्रिय वाणिज्य बैंकले नेपाका मात्र नभई अन्तर्राष्ट्रिय बैंकसँग पनि प्रतिस्पर्धा गर्ने बेला आएको बताएका छन्। बुधबार बैंकका १४ शाखाको एकसाथ उद्घाटन गर्दै मन्त्री खतिवडाले बैंकका चुनौती औंल्याउँदै यस्तो बताएका हुन्।
राष्ट्रिय वाणिज्य बैंकका लागि आगामी दिनमा मुख्यतया दुई चुनौती रहेको पनि मन्त्री खतिवडाको भनाई छ। ‘अब नेपालभित्रैका अरु वाणिज्य बैंक मात्र नभई अन्तर्राष्ट्रिय बैंकसँग पनि प्रतिस्पर्धा गर्नु पर्ने अवस्था आएको छ। अर्को कुरा, वित्तीय साक्षारता बढाएर स्वस्थ र प्रतिस्पर्धी बैंकका रुपमा आफ्नो पहिचान बनाई राख्न साना लगानीकर्तालाइ पनि हेरियोस्। तपाईंहरुले बढी नाफा दिन सक्नु भयो भने पूँजीबजार पनि बढ्छ,’ अर्थमन्त्री खतिवडाले भने।
पूर्ण प्रविधिमैत्री बनाएर बैंकको संचालन खर्च तथा कर्मचारी कटौतीमा जोड दिन निर्देशन मन्त्री खतिवडाले दिएका छन्।
प्रतिस्पर्धी बैंकहरुको तुलनामा राष्ट्रिय वाणिज्य बैंकमा धेरै कर्मचारी रहेको तथा संचालन खर्च पनि बढी भएका भन्दै अर्थमन्त्री खतिवडाले स्मार्ट बैकिङको अवधारणा कर्मचारीमा पनि देखिनुपर्ने बताए। ‘यही बैंकको जति कारोबार भएको बैंकमा योभन्दा आधा मात्रै कर्मचारी छन्। तपाईंहरूको पनि कर्मचारी घटाउनुहोस्,' बैंकको व्यवस्थापनलाई निर्देशन दिँदै अर्थमन्त्री खतिवडाले भने।
वार्षिक नाफाका हिसाबले गत आर्थिक वर्षमा राष्ट्रिय वाणिज्य बैंक सबैभन्दा अगाडि देखिएपनि यतिमै सन्तुष्ट हुने अवस्था नरहेको पनि मन्त्री खतिवडाले स्पष्ट पारे।
‘बैंकको धेरै शाखा भएको र पूँजी बढी भएको अवस्थामा यत्तिको नाफा कमाउनु खासै ठूलो उपलब्धि होइन। तपाईहरूले सगरमाथा नै चढेको भन्न मिल्दैन। यो स्वभाविक हो। बैंकको २५ अर्ब जतिको पूँजी कोष छ भने त्यस्को २० प्रतिशत अर्थात् ५ अर्बको नाफा औसत नै हो। यसमा राज्यको ठूलो लगानी छ। त्यसको प्रतिफल त राज्यले खोज्छ नै,’ अर्थमन्त्री खतिवडाले उल्लेख गरे।
राष्ट्रिय वाणिज्य बैंकले नाफामा मात्र नभई सेवामा पनि उष्कृष्ट भए अर्को वर्ष प्रोत्साहन स्वरुप बैंकलाई मन्त्रालयमै बोलाएर पुरस्कृत गर्नेसम्मको आश्वासन मन्त्री खतिवडाले दिए।
‘तपाईहरुले नाफा यति कमायौं उति कमायौं भन्दा पनि सेवा कति र कस्तो दिइएको छ भन्ने कुरा महत्वपूर्ण हो। सरकारले केही महत्वाकांक्षी कार्यक्रम ल्याएको छ। त्यस्ता कार्यक्रमअन्तर्गत कृषि क्षेत्र, युवा रोजगार, गरिब विपन्न वर्ग कर्जाजस्ता सेवा बैंकले दिनुपर्छ। नाफा मात्र भयो भनेर भएन। सेवा पनि राम्रो दिइयोस्,’ बैंकलाई निर्देशन दिँदै उनले भने।
यसरी बेला बेला बैंक तथा वित्तीय संस्थाहरूलाई निर्देशन दिइरहनु आफ्नो दायित्व भएको भनी मन्त्री खतिवडाले स्मरण गराए। उनले भने, ‘केही समस्या आउने बित्तिकै सरकारले गरेर भनिन्छ। हामीले तपाईहरुलाई व्यवस्थित गर्ने र निर्देशन दिन नपाउने हो भने हामीले संसदमा के जवाफ दिने भन्ने प्रश्न रहन्छ? त्यसकारण हामीले भनेका कुरा पनि मान्नुस्, जवाफदेही बन्नुहोस्।’
सोही कार्यक्रममा बोल्दै नेपाल राष्ट्र बैंकका डेपुटी गभर्नर चिन्तामणि सिवाकोटीले बैंकको वित्तीय अवस्था सुदृढ हुँदै गएको मात्र नभई राष्ट्रिय वाणिज्य बैंकले सरकारले लिएको नीति र राष्ट्र बैंकको वित्तीय स्थायित्वमा सकारात्मक भुमिका खेलेको बताए।
बैंकले आधुनिक प्रविधिको प्रयोगमा फड्को मारिसकेको तथा वाणिज्य बैंक पुरानै तरिकाले चलेको छ भन्ने सोचाइमा परिवर्तन भएको उनको भनाई थियो। यद्यपि बैंकले प्रयोग गरिरहेको सफ्टवेयर प्रणाली भने परिवर्तन गर्नुपर्ने अवस्थामा पुगिसकेको उनको भनाई थियो। ‘बैंकको सफ्टवेयर निकै पुरानो भैरहेको छ। र त्यसका कारण प्रणालीमा समस्या आएको भन्ने गुनासो आएको छ। सफ्टवेयर बदल्नु पर्ने बेला भएको छ,’ सिवाकोटीले भने।
राष्ट्रिय वाणिज्य बैंकका प्रमुख कार्यकारी अधिकृत किरणकुमार श्रेष्ठले ७७ वटै जिल्लामा शाखा स्थापना भएको एकमात्र बैंक राष्ट्रिय वाणिज्य बैंक रहेको भन्दै वित्तीय साक्षरता मा उल्लेख्य ध्यान दिएको बताए।
२०२२ माघ १० गते स्थापना भएको उक्त बैंकका देशभर गरी २२२ शाखा संख्या रहेकोमा बुधबार १४ वटा नयाँ शाखा एकसाथ थपिएपछि अब शाखा संख्या २ सय ३४ पुगेको छ।
राष्ट्रिय वाणिज्य बैंकले गत आर्थिक वर्ष २०७५/७६ मा ५ अर्ब ३२ करोड रुपैयाँ खुद नाफा गरेको छ। यस अवधिमा बैंकको निक्षेप १ खर्ब ९० अर्ब रुपैयाँ, बेस रेट ५ दशमलव ५० प्रतिशत रहेको जनाएको छ।
बैंकको हाल २३४ वटा शाखा कार्यालय, १७५ वटा एटिएम, र ९३ वटा शाखा रहित बैंकिङ रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
