काठमाडौं- राष्ट्रिय मानव अधिकार आयोगले यौनजन्य हिंसा तथा बलात्कारका घटनाको उजुरी दर्ता, छानबिन र तथ्य संकलनमा नेपाल प्रहरी गम्भीर एवं संवेदनशील नहुँदा पीडित न्याय पाउनबाट वञ्चित भएको जनाएको छ।
बुधबार आयोगका प्रवक्ता मोहना अन्सारीद्वारा जारी एक विज्ञप्तिमा बलात्कार जस्तो गम्भीर प्रकृतिको घटनामा नेपाल प्रहरीले पीडितलाई न्याय दिन आनाकानी गरेको उल्लेख छ।
'बलात्कार जस्ता घटनामा उजुरी दर्ता गर्न आनाकानी गर्ने, उजुरी दर्ता भएपनि घटनाको अनुसन्धान प्रभावकारी नहुने जस्तो कारणबाट घटनालाई कमजोर बनाउन खोजिएको छ', विज्ञप्तिमा भनिएको छ, 'यस्ता प्रकृतिका घटनाबाट मृत्यु भएको अवस्थामा हत्याको अपराधमा मात्र मुद्दा चलाउने तथा न्यायमा ढिलाइ गरिने प्रवृत्तिका कारण यौनजन्य हिंसाबाट पीडित महिला न्याय पाउनबाट वञ्चित हुनपुगेको पाइएको छ।'
आयोगले मानव अधिकारको रक्षार्थ स्थापना भएका निकायबाटै यस प्रकारका कार्य हुनु कदाचित उचित मान्न सकिन्न भन्दै यस्तो कार्य मानव अधिकारसम्बन्धी अन्तर्राष्ट्रिय तथा राष्ट्रिय कानुन विपरीत पनि भएको पनि स्पष्ट गरेको छ।
आयोगले यौनजन्य हिंसा तथा बलात्कारका घटनासँग सम्बन्धित उजुरीको दर्ता, छानबिन तथा तथ्य संकलन कार्यलाई प्रभावकारी बनाई नागरिकको मानवअधिकारको सम्मान र रक्षा गर्न एवं हिंसा पीडितलाई न्यायमा पहुँच पुर्याउन समेत आग्रह गरेको छ।
यसैगरी, आयोगले यही माघ ११ गते काठमाडौंको ल्यान्डमार्क होटलमा भएको सामूहिक बलात्कार भनिएको घटनाको अनुसन्धान सुरु गरेको पनि जनाएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
